Indian Railway: 100 ವಂದೇಭಾರತ್‌ ರೈಲು ಖರೀದಿ ಟೆಂಡರ್‌ ರದ್ದು!

Team Udayavani, Aug 14, 2024, 11:14 PM IST

ಹೊಸದಿಲ್ಲಿ: 100 ವಂದೇ ಭಾರತ್‌ ರೈಲುಗಳ ಉತ್ಪಾದನೆ ಮತ್ತು ನಿರ್ವಹಣೆ ಗಾಗಿ ಭಾರತೀಯ ರೈಲ್ವೇ ನೀಡಿದ್ದ 30,000 ಕೋಟಿ ರೂ. ಮೌಲ್ಯದ ಟೆಂಡರನ್ನು ರದ್ದು ಮಾಡಿದೆ.

ಇದಕ್ಕೆ ಅಲ್‌ಸ್ಟೋಮ್‌ ಇಂಡಿಯಾ ಕೋಟ್‌ ಮಾಡಿದ್ದ ಮೊತ್ತ ದುಬಾರಿ ಎನಿಸಿದ ಕಾರಣ ಟೆಂಡರನ್ನು ರದ್ದು ಮಾಡಿದೆ. ರೈಲುಗಳ ಉತ್ಪಾದನೆಗೆ ಫ್ರೆಂಚ್‌ ಮೂಲದ ಕಂಪೆನಿ ಅಲ್‌ಸ್ಟೋಮ್‌ ಇಂಡಿಯಾ ಕಡಿಮೆ ಮೊತ್ತದ ಬಿಡ್‌ ಸಲ್ಲಿಸಿತ್ತು. ಆದರೆ ಇದು ಗರಿಷ್ಠ ಎಂದು ರೈಲ್ವೇ ಇಲಾಖೆ ಟೆಂಡರ್‌ ರದ್ದು ಮಾಡಿದೆ. ಫ್ರೆಂಚ್‌ ಕಂಪೆನಿ ಪ್ರತೀ ರೈಲಿಗೆ 150.9 ಕೋಟಿ ರೂ. ನಿಗದಿ ಮಾಡಿತ್ತು. ಆದರೆ ಭಾರತೀಯ ರೈಲ್ವೇ 140 ಕೋಟಿ ರೂ. ಅಂತಿಮಗೊಳಿಸಲು ಮುಂದಾಗಿತ್ತು.

ರೈಲ್ವೇ ಕರೆದಿದ್ದ ಟೆಂಡ ರ್‌ಗೆ ಈ ಬಾರಿ ಹೆಚ್ಚಿನ ಸಂಖ್ಯೆಯಲ್ಲಿ ಬಿಡ್ಡರ್‌ಗಳು ಆಗಮಿಸಿರಲಿಲ್ಲ. ಹೀಗಾಗಿ ಮತ್ತೂಮ್ಮೆ ಇಲಾಖೆ ಈ ಟೆಂಡರ್‌ ಕರೆಯುವ ನಿರೀಕ್ಷೆ ಇದೆ. ಟೆಂಡರ್‌ ರದ್ದತಿಯನ್ನು ಅಲ್‌ಸ್ಟೋಮ್‌ ಇಂಡಿಯಾ ಕಂಪೆನಿ ಒಪ್ಪಿಕೊಂಡಿದ್ದು, ರೈಲ್ವೇ ಯಾವುದೇ ಅಧಿಕೃತ ಹೇಳಿಕೆ ನೀಡಿಲ್ಲ. ಕೇಂದ್ರ ಸರಕಾರವು ವಿವಿಧ ನಗರಗಳ ಮಧ್ಯೆ ಅತ್ಯಾಧುನಿಕ ರೈಲ್ವೇ ಸಂಪರ್ಕ ಸಾಧಿಸಲು ವಂದೇ ಭಾರತ್‌ ರೈಲುಗಳನ್ನು ಪರಿಚಯಿಸಿದೆ.