Small Savings Schemes: ಸಣ್ಣ ಉಳಿತಾಯ ಯೋಜನೆಗಳ ಬಡ್ಡಿ ಹೆಚ್ಚಳ

Team Udayavani, Jul 1, 2023, 7:18 AM IST

ಹೊಸದಿಲ್ಲಿ: ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಹಣ ಹೂಡಿದವರಿಗೆ ಕೇಂದ್ರ ಸರಕಾರ ಸಿಹಿಸುದ್ದಿ ನೀಡಿದೆ. ಜುಲೈ- ಸೆಪ್ಟಂಬರ್‌ ತ್ತೈಮಾಸಿಕ ಅವಧಿಗೆ ಆಯ್ದ ಉಳಿತಾಯ ಯೋಜನೆಗಳ ಬಡ್ಡಿ ದರವನ್ನು ಗರಿಷ್ಠ ಶೇ. 0.3ರಷ್ಟು ಹೆಚ್ಚಳ ಮಾಡಲಾಗಿದೆ. ಶನಿವಾರದಿಂದಲೇ ಪರಿಷ್ಕೃತ ದರ ಅನ್ವಯವಾಗಲಿದೆ.

ಐದು ವರ್ಷಗಳ ಅವಧಿಯ ಆರ್‌ಡಿ ಬಡ್ಡಿ ದರವನ್ನು ಅತ್ಯಧಿಕ ಅಂದರೆ ಶೇ. 0.3ರಷ್ಟು ಹೆಚ್ಚಳ ಮಾಡಲಾಗಿದೆ. ಹೀಗಾಗಿ ಪ್ರಸಕ್ತ ವರ್ಷದ 2ನೇ ತ್ತೈಮಾಸಿಕದಲ್ಲಿ ಆರ್‌ಡಿ ಗ್ರಾಹಕರಿಗೆ ಶೇ. 6.5ರಷ್ಟು ಬಡ್ಡಿ ಸಿಗಲಿದೆ. ಅಂಚೆ ಕಚೇರಿಯ ಒಂದು ವರ್ಷದ ಅವಧಿ ಠೇವಣಿ ಬಡ್ಡಿ ದರ ಶೇ. 0.1 ಹೆಚ್ಚಳವಾಗಿದ್ದು, ಈಗ ಶೇ.6.9ಕ್ಕೇರಿದೆ. ಎರಡು ವರ್ಷಗಳ ಅವಧಿ ಠೇವಣಿ ಬಡ್ಡಿ ದರವನ್ನು ಶೇ. 7ಕ್ಕೇರಿಸಲಾಗಿದೆ. ಮೂರು ಮತ್ತು ಐದು ವರ್ಷಗಳ ಅವಧಿ ಠೇವಣಿ ಬಡ್ಡಿ ದರ ಕ್ರಮವಾಗಿ ಶೇ. 7 ಮತ್ತು ಶೇ. 7.5ರಲ್ಲೇ ಮುಂದುವರಿಯಲಿದೆ.

ಪಿಪಿಎಫ್, ನ್ಯಾಶನಲ್‌ ಸೇವಿಂಗ್ಸ್‌ ಸರ್ಟಿಫಿಕೇಟ್‌(ಎನ್‌ಎಸ್‌ಸಿ), ಸುಕನ್ಯಾ ಸಮೃದ್ಧಿ ಯೋಜನೆ, ಹಿರಿಯ ನಾಗರಿಕರ ಉಳಿತಾಯ ಯೋಜನೆ, ಕಿಸಾನ್‌ ವಿಕಾಸ ಪತ್ರದ ಬಡ್ಡಿ ದರದಲ್ಲಿ ಬದಲಾವಣೆ ಆಗಿಲ್ಲ.