ಐಪಿಎಲ್‌ ವೇಳಾಪಟ್ಟಿ ಬಿಡುಗಡೆ : ಮುಂಬೈ-ಚೆನ್ನೈ ಮೊದಲ ಮುಖಾಮುಖಿ

Team Udayavani, Sep 6, 2020, 5:35 PM IST

ದುಬಾೖ: ಕ್ರಿಕೆಟ್‌ ಪ್ರೇಮಿಗಳ ಕಾಯುವ ದಿನಗಳಿಗೆ ತೆರೆ ಬಿದ್ದಿದೆ. 2020ರ ಐಪಿಎಲ್‌ ವೇಳಾಪಟ್ಟಿಯನ್ನು ಬಿಸಿಸಿಐ ರವಿವಾರ ಬಿಡುಗಡೆಗೊಳಿಸಿದೆ. ಸೆ. 19ರಂದು ಅಬುಧಾಬಿಯಲ್ಲಿ ಹಾಲಿ ಚಾಂಪಿಯನ್‌ ಮುಂಬೈ ಇಂಡಿಯನ್ಸ್‌ ಮತ್ತು ರನ್ನರ್ ಅಪ್‌ ಚೆನ್ನೈ ಸೂಪರ್‌ ಕಿಂಗ್ಸ್‌ ಎದುರಾಗುವುದರೊಂದಿಗೆ ಐಪಿಎಲ್‌ ಕಾವೇರಿಸಿಕೊಳ್ಳಲಿದೆ.

ಕೋವಿಡ್ ನಿಂದಾಗಿ ಇಡೀ ಪಂದ್ಯಾವಳಿ ಯುಎಇಗೆ ಸ್ಥಳಾಂತರಗೊಂಡಿದ್ದು, ಇಲ್ಲಿನ ದುಬಾೖ, ಅಬುಧಾಬಿ ಮತ್ತು ಶಾರ್ಜಾ ಕ್ರೀಡಾಂಗಣಗಳಲ್ಲಿ ಪಂದ್ಯಗಳು ನಡೆಯಲಿವೆ. ಪ್ರೇಕ್ಷಕರಿಗೆ ನಿರ್ಬಂಧವಿದ್ದರೂ ಕೂಟದ ರೋಚಕ ಕ್ಷಣಗಳಿಗೇನೂ ಕೊರತೆಯಾಗದು ಎಂಬುದು ಸಂಘಟಕರ ಲೆಕ್ಕಾಚಾರ. ಚೆನ್ನೈ ತಂಡದ 13 ಸದಸ್ಯರಲ್ಲಿ ಪಾಸಿಟಿವ್‌ ಕಂಡುಬಂದ ಹಿನ್ನೆಲೆಯಲ್ಲಿ ಅದು ಆರಂಭಿಕ ಪಂದ್ಯದಲ್ಲಿ ಪಾಲ್ಗೊಳ್ಳದು ಎಂಬ ನಿರೀಕ್ಷೆ ಇತ್ತು. ಇದು ಹುಸಿಯಾಗಿದೆ.

ಕೂಟದ 2ನೇ ದಿನ ದುಬಾೖಯಲ್ಲಿ ಮೊದಲ ಪಂದ್ಯ ನಡೆಯಲಿದ್ದು, ಡೆಲ್ಲಿ- ಪಂಜಾಬ್‌ ಮುಖಾಮುಖಿ ಆಗಲಿವೆ. ಸೆ. 21ರಂದು ದುಬಾೖಯಲ್ಲೇ ವಿರಾಟ್‌ ಕೊಹ್ಲಿ ಸಾರಥ್ಯದ ಆರ್‌ಸಿಬಿ ಅಖಾಡಕ್ಕಿಳಿಯಲಿದೆ. ಎದುರಾಳಿ ಸನ್‌ರೈಸರ್ ಹೈದರಾಬಾದ್‌. ಸೆ. 22ರಂದು ಶಾರ್ಜಾ ಆತಿಥ್ಯದಲ್ಲಿ ಮೊದಲ ಪಂದ್ಯ ಸಾಗಲಿದ್ದು, ರಾಜಸ್ಥಾನ್‌ ರಾಯಲ್ಸ್‌ ಮತ್ತು ಚೆನ್ನೈ ಎದುರಾಗಲಿವೆ. ದುಬಾೖಯಲ್ಲಿ ಗರಿಷ್ಠ 24, ಅಬುಧಾಬಿಯಲ್ಲಿ 20 ಹಾಗೂ ಶಾರ್ಜಾದಲ್ಲಿ 12 ಪಂದ್ಯಗಳನ್ನು ಆಡಿಸಲಾಗುವುದು.

ಅರ್ಧ ಗಂಟೆ ಬೇಗ
ಸದ್ಯ 53 ದಿನಗಳ ಈ ಕೂಟದ ಲೀಗ್‌ ಹಂತದ ವೇಳಾಪಟ್ಟಿಯನ್ನಷ್ಟೇ ಪ್ರಕಟಿಸಲಾಗಿದೆ. ಪ್ಲೇ-ಆಫ್ ಮತ್ತು ಫೈನಲ್‌ ಪಂದ್ಯಗಳ ಸ್ಥಳವನ್ನು ಮುಂದೆ ಪ್ರಕಟಿಸಲಾಗುವುದು ಎಂದು ಬಿಸಿಸಿಐ ತಿಳಿಸಿದೆ. ಪ್ರಶಸ್ತಿ ಸಮರ ನ. 10ರಂದು ನಡೆಯಲಿದೆ.

ಪಂದ್ಯಗಳನ್ನು ಅರ್ಧ ಗಂಟೆ ಬೇಗ ಆರಂಭಿಸುವುದು ಈ ಸಲದ ವಿಶೇಷ. ಭಾರತೀಯ ಕಾಲಮಾನದಂತೆ ಹಗಲು ಪಂದ್ಯಗಳು ಅಪರಾಹ್ನ 3.30ಕ್ಕೆ, ರಾತ್ರಿ ಪಂದ್ಯಗಳು 7.30ಕ್ಕೆ ಮೊದಲ್ಗೊಳ್ಳುತ್ತವೆ. ಒಟ್ಟು 10 ದಿನಗಳಂದು 2 ಪಂದ್ಯಗಳಿರುತ್ತವೆ.