IPL Auction: ಗುಜರಾತ್‌ ಟೈಟಾನ್ಸ್‌ ಪಾಲಾದ ಸಿರಾಜ್‌; ಆರ್‌ಸಿಬಿಗೆ ಹೃದಯಸ್ಪರ್ಶಿ ಸಂದೇಶ

ಆರ್‌ಸಿಬಿ ಅಭಿಮಾನಿಗಳ ಕೊಂಡಾಡಿದ ವೇಗಿ

Team Udayavani, Nov 28, 2024, 6:40 AM IST

ಬೆಂಗಳೂರು: ಆರ್‌ಸಿಬಿಯಿಂದ ಹೊರಬಿದ್ದು, 12.25 ಕೋಟಿ ರೂ.ಗೆ ಗುಜರಾತ್‌ ಟೈಟಾನ್ಸ್‌ ಸೇರಿರುವ ವೇಗಿ ಮೊಹಮ್ಮದ್‌ ಸಿರಾಜ್‌, ಆರ್‌ಸಿಬಿ ಕುರಿತು ಇನ್‌ಸ್ಟಾಗ್ರಾಮ್‌ನಲ್ಲಿ ಭಾವನಾತ್ಮಕ ಪೋಸ್ಟ್‌ ಹಾಕಿದ್ದಾರೆ. ಆರ್‌ಸಿಬಿ ತಂಡದಲ್ಲಿ 7 ವರ್ಷ ಕಳೆದಾಗಿನ ವೀಡಿಯೋ ತುಣುಕುಗಳನ್ನು ಪೋಸ್ಟ್‌ ಮಾಡಿದ್ದು, “ಆರ್‌ಸಿಬಿ ಬರೀ ತಂಡವಲ್ಲ, ಮನೆ’ ಎಂದು ಸುದೀರ್ಘ‌ ಸಂದೇಶವೊಂದನ್ನು ಪೋಸ್ಟ್‌ ಮಾಡಿದ್ದಾರೆ.

“ಆರ್‌ಸಿಬಿ ಶರ್ಟ್‌ ಧರಿಸಿದಾಗಿನ ದಿನಗಳತ್ತ ತಿರುಗಿ ನೋಡಿದರೆ ನನ್ನ ಹೃದಯವು ಗೌರವ, ಪ್ರೀತಿ ಮತ್ತು ಭಾವನೆಗಳಿಂದ ತುಂಬಿ ಬರುತ್ತದೆ. ಆರ್‌ಸಿಬಿ ಜೆರ್ಸಿಯನ್ನು ಮೊದಲ ಬಾರಿಗೆ ಧರಿಸಿದಾಗ ಈ ಮಟ್ಟಿನ ಬಾಂಧವ್ಯ ನಮ್ಮ ಮಧ್ಯೆ ಉದಯಿಸುತ್ತದೆ ಎಂದು ನಾನು ಭಾವಿಸಿರಲಿಲ್ಲ. ಆರ್‌ಸಿಬಿ ಪರ ನಾನು ಎಸೆದ ಮೊದಲ ಎಸೆತ, ಪಡೆದ ಮೊದಲ ವಿಕೆಟ್‌, ಆಡಿದ ಪ್ರತಿಯೊಂದು ಪಂದ್ಯ, ನಿಮ್ಮೊಂದಿಗೆ ಕಳೆದ ಪ್ರತಿಯೊಂದು ಕ್ಷಣವೂ ಅದ್ಭುತ’ ಎಂದಿದ್ದಾರೆ ಸಿರಾಜ್‌.

“ಪಂದ್ಯ ಸೋತಾಗ ಅತ್ಯಂತ ನೋವಿ ನಿಂದ ರಾತ್ರಿಗಳನ್ನು ಕಳೆದಿದ್ದೇನೆ. ಆದರೆ ಸ್ಟಾಂಡ್‌ನ‌ಲ್ಲಿ ಭೋರ್ಗರೆಯುತ್ತಿದ್ದ ನಿಮ್ಮ ಧ್ವನಿ ಹಾಗೂ ಕರತಾಡನ, ಸಾಮಾಜಿಕ ಮಾಧ್ಯಮದ ನಿಮ್ಮ ಸಂದೇಶಗಳು, ನೀವಿರಿಸಿದ ನಿರಂತರ ನಂಬಿಕೆ ಎನ್ನುವುದು ನನ್ನನ್ನು ಹೊಸ ಉತ್ಸಾಹದಿಂದ ಆಡುವಂತೆ ಮಾಡಿತು’ ಎಂದು ಸಿರಾಜ್‌ ಬರೆದಿದ್ದಾರೆ.

“ಅಭಿಮಾನಿಗಳಾದ ನೀವೇ ಈ ತಂಡದ ಆತ್ಮ. ನೀವು ತುಂಬುವ ಶಕ್ತಿ, ನೀಡುವ ಪ್ರೀತಿ, ತೋರುತ್ತಿದ್ದ ನಂಬಿಕೆ ಸಾಟಿಯಿಲ್ಲದ್ದು’ ಎಂದು ಆರ್‌ಸಿಬಿ ಅಭಿಮಾನಿಗಳನ್ನು ಕೊಂಡಾಡಿದ್ದಾರೆ.