ಡ್ಯಾರೆನ್‌ ಸ್ಯಾಮಿಯನ್ನು “ಕಲೂ’ ಎಂದಿದ್ದು, ಇಶಾಂತ್ ಶರ್ಮಾ!

Team Udayavani, Jun 11, 2020, 10:27 AM IST

ನವದೆಹಲಿ: ಐಪಿಎಲ್‌ ಟಿ20 ಕೂಟದ ವೇಳೆ ಸನ್‌ ರೈಸರ್ಸ್‌ ಹೈದರಾಬಾದ್‌ ತಂಡದೊಳಗೆ ವೆಸ್ಟ್‌ ಇಂಡೀಸ್‌ ಮಾಜಿ ನಾಯಕ ಡ್ಯಾರೆನ್‌ ಸ್ಯಾಮಿಯನ್ನು “ಕಲೂ’ ಎಂದು ಕರೆದದ್ದು ಅಂದು ಅದೇ ತಂಡದಲ್ಲಿದ್ದ ವೇಗಿ ಇಶಾಂತ್‌ ಶರ್ಮ ಎನ್ನುವ ಸುದ್ದಿ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗುತ್ತಿದೆ.

ಐಪಿಎಲ್‌ನಲ್ಲಿ ನನಗೆ ಜನಾಂಗೀಯ ನಿಂದನೆಯಾಗಿತ್ತು, ಅದೂ ಸನ್‌ರೈಸರ್ಸ್‌ ತಂಡದ ಡ್ರೆಸ್ಸಿಂಗ್‌ ಕೊಠಡಿಯಲ್ಲಿ ಅನ್ನುವ ಆಘಾತಕಾರಿ ವಿಷಯ ಸ್ಯಾಮಿ ಹೊರಹಾಕಿದ್ದರು, ಈ ವಿಷಯ ಕ್ರಿಕೆಟ್‌ ವಲಯದಲ್ಲಿ ಭಾರೀ ಚರ್ಚೆಯಾಗುತ್ತಿರುವಾಗಲೇ 2014ರಲ್ಲಿ ನಡೆದ ಐಪಿಎಲ್‌ ವೇಳೆ ಇಶಾಂತ್‌ ಶರ್ಮ ಇನ್ಸ್ಟಾಗ್ರಾಮ್ ‌ನಲ್ಲಿ ಪ್ರಕಟಿಸಿದ ಫೋಟೊಗೆ ಮರು ಜೀವ ಬಂದಿದೆ. ಈ ಫೋಟೊದಲ್ಲಿ ಇಶಾಂತ್‌ ಶರ್ಮ, ಭುವನೇಶ್ವರ ಕುಮಾರ್‌, ಡ್ಯಾರೆನ್‌ ಸ್ಯಾಮಿ ಹಾಗೂ ಡೇಲ್‌ ಸ್ಟೇನ್‌ ಅವರನ್ನು ಕಾಣಬಹುದಾಗಿದೆ. 2014ರ ಮೇ 14ರಂದು ಇಶಾಂತ್‌ ಶರ್ಮ “ನಾನು, ಭುವಿ, ಕಲೂ, ಮತ್ತು ಗನ್‌ ರೈಸರ್ಸ್‌’ ಎಂಬ ಶೀರ್ಷಿಕೆಯೊಂದಿಗೆ ಫೋಟೊ ಪ್ರಕಟಿಸಿದ್ದರು, ಇಲ್ಲಿ ಕಲೂ ಎಂದು ಕರೆದಿರುವುದು ಸ್ಯಾಮಿಯವರನ್ನು ಎನ್ನುವುದು ಸ್ಪಷ್ಟವಾಗಿ ಕಾಣುತ್ತಿದೆ. ಹೀಗಾಗಿ ಇಶಾಂತ್‌ ಶರ್ಮ ಕೂಡ ಸೇರಿಕೊಂಡಿದ್ದಾರೆ ಎನ್ನುವ ಅನುಮಾನ ವ್ಯಕ್ತವಾಗಿದೆ.

ವರ್ಣಭೇದ ನೀತಿಯ ವಿರುದ್ಧ, ಕಪ್ಪು ಜನರ ವಿರುದ್ಧದ ಹಲ್ಲೆಯನ್ನು ಖಂಡಿಸಿ ಮಾತನಾಡುತ್ತಿದ್ದ ವೇಳೆ ಇತ್ತೀಚೆಗೆ ತನ್ನ ಸಾಮಾಜಿಕ ಜಾಲತಾಣದ ಖಾತೆಯಲ್ಲಿ ತನಗಾಗಿರುವ ಕಹಿ ಅನುಭವವನ್ನು ಡ್ಯಾರೆನ್‌ ಸ್ಯಾಮಿ ಹಂಚಿಕೊಂಡಿದ್ದರು. ವರ್ಣಭೇದ ನೀತಿಯ ವಿರುದ್ಧ ನಾನು ಮಾತ್ರವಲ್ಲ ಐಸಿಸಿ ಸೇರಿದಂತೆ ಇಡೀ ಕ್ರಿಕೆಟ್‌ ಕುಟುಂಬ ಒಗ್ಗಟ್ಟಾಗಿ ಹೋರಾಡಬೇಕು ಎಂದು ಒತ್ತಾಯಿಸಿದ್ದರು.