Karnataka: ಅನ್ನ ಭಾಗ್ಯಕ್ಕೆ ಅಕ್ಕಿ ಸಿಗುತ್ತಿಲ್ಲ ಎಂದು BJPಗೆ ಖುಷಿ- ದಿನೇಶ್‌ ಗುಂಡೂರಾವ್‌

Team Udayavani, Jun 18, 2023, 7:09 AM IST

ಬೆಂಗಳೂರು: ರಾಜ್ಯ ಸರಕಾರ ಅನ್ನಭಾಗ್ಯದ ಅಕ್ಕಿ ಖರೀದಿಸಿ ಪೂರೈಸಲು ಶತ ಪ್ರಯತ್ನ ನಡೆಸುತ್ತಿದೆ. ನಮ್ಮ ಸರಕಾರದ ಕಡೆಯಿಂದ ಯಾವುದೇ ಲೋಪ ನಡೆಯುತ್ತಿಲ್ಲ. ಆದರೆ ಬಡವರಿಗೆ ಅಕ್ಕಿ ಕೊಡುವ ಈ ಯೋಜನೆಗೆ ಕೈ ಜೋಡಿಸದೆ ಬಿಜೆಪಿ ಮುಖಂಡರು ವಿಕೃತ ಖುಷಿ ಅನುಭವಿಸುತ್ತಿದ್ದಾರೆ ಎಂದು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವ ದಿನೇಶ್‌ ಗುಂಡೂರಾವ್‌ ಆರೋಪಿಸಿದ್ದಾರೆ.

ನಗರದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಭಾರತೀಯ ಆಹಾರ ನಿಗಮ ರಾಜ್ಯಕ್ಕೆ ಅಕ್ಕಿ ಕೊಡುತ್ತೇವೆಂದು ಹೇಳಿ ಬಳಿಕ ಹಿಂದೆ ಸರಿದಿಲ್ಲ. ಖಾಸಗಿಯವರಿಗೆ ಅಕ್ಕಿ ಕೊಡುವ ಆಹಾರ ನಿಗಮ, ನಾವು ಹಣ ಕೊಡುತ್ತೇವೆ ಎಂದರೂ ನಮಗೆ ಕೊಡುತ್ತಿಲ್ಲ. ನಾನು ಆಹಾರ ಸಚಿವನಾಗಿದ್ದಾಗ ಆಹಾರ ನಿಗಮದಿಂದಲೇ ಅಕ್ಕಿ ಖರೀದಿಸಿ ಕೊಡುತ್ತಿದ್ದೆವು. ಕೇಂದ್ರದ ಈಗಿನ ನಡೆ ಸಂಶಯಾಸ್ಪದವಾಗಿದೆ ಎಂದರು.

ನಮ್ಮ ಸರಕಾರದ ಕಾರ್ಯಕ್ರಮ ಚೆನ್ನಾಗಿ ನಡೆಯಬಾರದು ಎಂಬ ಉದ್ದೇಶ ಕೇಂದ್ರ ಸರಕಾರಕ್ಕಿದೆಯಾ? ನಾವು ಕರ್ನಾಟಕದಲ್ಲಿ ಸೋತು ಬಿಟ್ಟಿದ್ದೇವೆ ಎಂದು ಜನರಿಗೆ ತೊಂದರೆ ಕೊಡಲು ಕೇಂದ್ರ ಸರಕಾರ ಮುಂದಾಗಿದೆಯೇ ಎಂದು ದಿನೇಶ್‌ ಗುಂಡೂರಾವ್‌ ಪ್ರಶ್ನಿಸಿದರು.

ರಾಜ್ಯದಲ್ಲಿ ಬಿಜೆಪಿಗೆ ಮತ ಹಾಕಿದ ಶೇ. 35 ಮಂದಿಗೂ ಅನ್ನಭಾಗ್ಯ ಯೋಜನೆ ಸಿಗುತ್ತದೆ. ಆದ್ದರಿಂದ ಬಿಜೆಪಿ ಅವರು ಈ ರೀತಿ ಅಲೋಚನೆ ಮಾಡಿ ರಾಜ್ಯದ ಜನರ ಪರ ನಿಲ್ಲಲಿ ಎಂದ ದಿನೇಶ್‌ ಗುಂಡೂರಾವ್‌ ಹೇಳಿದರು.