Kumbale: ಕೊಲ್ಲಿಗೆ ಪರಾರಿಯಾದ 6 ಮಂದಿ ವಿರುದ್ಧ ರೆಡ್‌ ಕಾರ್ನರ್‌ ನೋಟಿಸ್‌

Team Udayavani, Oct 23, 2024, 12:23 AM IST

ಕುಂಬಳೆ: ಹಣಕಾಸು ವ್ಯವಹಾರಕ್ಕೆ ಸಂಬಂಧಿಸಿದ ತರ್ಕದ ವಿಷಯದಲ್ಲಿ ಕೊಲ್ಲಿ ಉದ್ಯೋಗಿಯನ್ನು ಊರಿಗೆ ಕರೆಸಿ, ಅಪಹರಿಸಿ ಕೊಲೆಗೈದ ಪ್ರಕರಣದಲ್ಲಿ ತಲೆಮರೆಸಿಕೊಂಡಿರುವ ಮುಖ್ಯ ಆರೋಪಿ ಸಹಿತ ಆರು ಮಂದಿ ವಿರುದ್ಧ ಕ್ರೈಂ ಬ್ರಾಂಚ್‌ ತನಿಖೆ ತೀವ್ರಗೊಳಿಸಿದೆ.

ಕ್ರೈಂಬ್ರಾಂಚ್‌ ಕಾಸರಗೋಡು ಯೂನಿಟ್‌ ಡಿವೈಎಸ್‌ಪಿ  ಪಿ. ಮಧುಸೂದನನ್‌ ನೇತೃತ್ವದಲ್ಲಿ ತನಿಖೆ ನಡೆಸಲಾಗುತ್ತಿದೆ. ತನಿಖೆ ಅಂಗವಾಗಿ ಯುವಕನನ್ನು ಅಪಹರಿಸಲು ಉಪಯೋಗಿಸಿದ ಕಾರನ್ನು ಪೈವಳಿಕೆಯಿಂದ ಪತ್ತೆ ಹಚ್ಚಲಾಗಿದೆ. ಈ ಕಾರು ಮುಖ್ಯ ಆರೋಪಿ ಅಸ್ಕರ್‌ ಅಲಿಯ ಮಾಲಕತ್ವದಲ್ಲಿದೆ. ಕಾರಿನ ವಾರಸುದಾರ ಅಸ್ಕರ್‌ ಅಲಿ ಸಹಿತ ಆರು ಮಂದಿ ಕೊಲ್ಲಿಯಲ್ಲಿರುವುದಾಗಿ ತನಿಖಾ ತಂಡಕ್ಕೆ ಮಾಹಿತಿ ಲಭಿಸಿದೆ. ಇವರನ್ನು ಊರಿಗೆ ತಲುಪಿಸಲು ರೆಡ್‌ ಕಾರ್ನರ್‌ ನೋಟಿಸ್‌ ಕಳುಹಿಸುವ ಅಂತಿಮ ಕ್ರಮದಲ್ಲಿದೆ.

ನೋಟಿಸ್‌ ಹೊರಡಿಸಿದ ಬಳಿಕ ಇಂಟರ್‌ಪೋಲ್‌ ಸಹಾಯದೊಂದಿಗೆ ಆರೋಪಿಯನ್ನು ಬಂಧಿಸಲು ಸಾಧ್ಯವಾಗಲಿದೆ. 2022ರ ಜೂನ್‌ 26ರಂದು ಪುತ್ತಿಗೆ ಮುಗು ರೋಡ್‌ನ‌ ಅಬೂಬಕ್ಕರ್‌ ಸಿದ್ದಿಕ್‌ ಅವರನ್ನು ಕೊಲ್ಲಿಯಿಂದ ಕರೆಸಿ ಪೈವಳಿಕೆಯ ಜನವಾಸವಿಲ್ಲದ ಮನೆಯೊಂದರಲ್ಲಿ ಕೂಡಿ ಹಾಕಿ ಕೊಲೆಗೈದಿರುವುದಾಗಿ ಪ್ರಕರಣ ದಾಖಲಿಸಲಾಗಿದೆ.