ಕುಂದಾಪುರ : ಗರ್ಭಿಣಿ ಪತ್ನಿಗೆ ಸಿಗರೇಟಿನಿಂದ ಸುಟ್ಟು ವಿಕೃತಿ ಮೆರೆದ ಪತಿಯ ಬಂಧನ

Team Udayavani, Mar 1, 2022, 8:46 PM IST

ಕುಂದಾಪುರ : ಗರ್ಭಿಣಿ ಪತ್ನಿಗೆ ಸಿಗರೇಟಿನಿಂದ ಸುಟ್ಟು ಚಿತ್ರಹಿಂಸೆ ನೀಡಿ, ಕಿರುಕುಳ ಕೊಟ್ಟ ಆರೋಪಿ, ಪತಿ ಕುಂದಾಪುರ ಬರೆಕಟ್ಟು ನಿವಾಸಿ ಪ್ರದೀಪ್‌ನನ್ನು ಕುಂದಾಪುರ ಪೊಲೀಸರು ಮಂಗಳವಾರ ಸಿದ್ದಾಪುರದಲ್ಲಿ ಬಂಧಿಸಿದ್ದಾರೆ.

ಸಂತ್ರಸ್ತ ಮಹಿಳೆ, ಬೀಜಾಡಿ ನಿವಾಸಿ ಪ್ರಿಯಾಂಕಾ (21) ಕಿರುಕುಳಕ್ಕೊಳಗಾಗಿದ್ದು, ಕುಂದಾಪುರ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದರು. ವರದಕ್ಷಿಣೆ ಕಿರುಕುಳ ಪ್ರಕರಣ ದಾಖಲಾಗಿತ್ತು.
ಆರೋಪಿ ಪ್ರದೀಪ್‌ ತನ್ನ ಪತ್ನಿ ಪ್ರಿಯಾಂಕಾಗೆ ಸಿಗರೇಟಿನಿಂದ ಮುಖಕ್ಕೆ ಸುಟ್ಟು ಚಿತ್ರಹಿಂಸೆ ನೀಡುತ್ತಿರುವ ವೀಡಿಯೋ ಸೋಮವಾರದಿಂದ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದ್ದು, ಪತ್ನಿ ಪ್ರಿಯಾಂಕಾ ಕೈಮುಗಿದು ಬೇಡುವೆ, ಸುಡಬೇಡಿ ಎಂದು ಪರಿಪರಿಯಾಗಿ ಬೇಡಿಕೊಂಡರೂ, ಕಾಲಿಗೆ ಬೀಳುತ್ತೇನೆಂದರೂ ಕೂಡ ಪ್ರದೀಪ್‌ ದರ್ಪ ತೋರಿದ್ದ. ಸಿಗರೇಟಿನಿಂದ ಸುಟ್ಟು, ಮಗುವನ್ನು ಕೊಲ್ಲುವುದಾಗಿ ಹೇಳಿ ಹೊಟ್ಟೆಗೂ ತುಳಿದಿದ್ದ. ಈ ವೇಳೆಯಲ್ಲಿ ಪ್ರಿಯಾಂಕಾ ತಪ್ಪಿಸಿಕೊಂಡ ಪರಿಣಾಮ ಸೊಂಟಕ್ಕೆ ಪೆಟ್ಟು ಬಿದ್ದಿದೆ.

ವ್ಯಾಪಕ ಆಕ್ರೋಶ
ಈ ವೀಡಿಯೋವನ್ನು ಪ್ರದೀಪನೇ ಮಾಡಿದ್ದು, ಬಳಿಕ ಅದು ವೈರಲ್‌ ಆಗಿದೆ. ಎಲ್ಲೆಡೆಯಿಂದ ವ್ಯಾಪಕ ಆಕ್ರೋಶ ವ್ಯಕ್ತವಾಗಿದ್ದು, ಆತನನನ್ನು ಬಂಧಿಸಿ, ಕಠಿನ ಕ್ರಮ ಕೈಗೊಳ್ಳಬೇಕು ಎನ್ನುವ ಆಗ್ರಹ ಕೇಳಿಬಂದಿತ್ತು.

ಇದನ್ನೂ ಓದಿ : ಉಕ್ರೇನ್- ರಷ್ಯಾ ಯುದ್ದದಲ್ಲಿ‌ ಬಲಿಯಾದ ವಿದ್ಯಾರ್ಥಿ ಕುರಿತು Shivaram Hebbar ಹೇಳಿದ್ದೇನು?

ಡಿಜಿಟಲ್‌ ಎವಿಡೆನ್ಸ್‌
ಹಿಂಸೆ ನೀಡಿರುವ ಕುರಿತಾದ ವೀಡಿಯೋ ಸಾಕ್ಷ್ಯ ಆಧರಿಸಿ (ಡಿಜಿಟಲ್‌ ಎವಿಡೆನ್ಸ್‌) ಆರೋಪಿಯನ್ನು ಬಂಧಿಸಲು ಕುಂದಾಪುರ ಪೊಲೀಸರು ಮುಂದಾಗಿದ್ದರು. ಈ ವೇಳೆ ಪೊಲೀಸರಿಗೆ ಲೋಕೇಶ್‌ ಅಂಕದಕಟ್ಟೆ ಹಾಗೂ ಅವರ ಸ್ನೇಹಿತರು ಸಹಕರಿಸಿದ್ದು, ಮಂಗಳವಾರ ಬೆಳಗ್ಗೆ ಸಿದ್ದಾಪುರದಲ್ಲಿ ಆರೋಪಿಯನ್ನು ಬಂಧಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ.