ತುಳು ಮೌಖೀಕ ಮಹಾಕವಿ ಮಾಚಾರು ಗೋಪಾಲ ನಾಯ್ಕ

Team Udayavani, Apr 26, 2023, 7:12 AM IST

ಜಾನಪದ ಕಲಾವಿದ, ತುಳು ಸಿರಿ ಕಾವ್ಯದ ಕಣಜ ಎಂದೇ ಖ್ಯಾತರಾಗಿದ್ದ ಬೆಳ್ತಂಗಡಿ ತಾಲೂಕಿನ ಬೆಳಾಲು ಗ್ರಾಮದ ಮಾಚಾರು ಗೋಪಾಲ ನಾಯ್ಕ (85) ಎ. 24ರಂದು
ನಿಧನ ಹೊಂದಿದ್ದು, ಅವರಿಗೆ ನುಡಿನಮನ ಇಲ್ಲಿದೆ…

ಮಾಚಾರು ಗೋಪಾಲ ನಾಯ್ಕ ಅವರು 15,683 ಸಾಲುಗಳ ದೀರ್ಘ‌ ತುಳುಸಿರಿ ಕಾವ್ಯವನ್ನು ಹಾಡಿದ ಪ್ರಸಿದ್ಧ ಜನಪದ ಮಹಾ ಗಾಯಕ. ಮೌಖೀಕ ಪರಂಪರೆಯ ಹಲವು ಸಂಧಿ, ಪಾಡªನ, ಕತೆ, ಕಬಿತೆಗಳ ಕಣಜ. ಸಿರಿ ಜಾತ್ರೆಯಲ್ಲಿ ಕುಮಾರನಾಗಿ ಹಲವು ದಶಕಗಳ ಕಾಲ ಸೇವೆ ಸಲ್ಲಿಸಿದ ಅವರು ಸಿರಿತಂಡದ ನಾಯಕರು, ಮಾರ್ಗದರ್ಶಕರು. ಕೌಟುಂಬಿಕ ಸಮಸ್ಯೆಗಳಿಗೆ ಸಲಹೆಗಾರರು.

ಉಡುಪಿಯ ಪ್ರಾದೇಶಿಕ ರಂಗಕಲೆಗಳ ಅಧ್ಯಯನ ಕೇಂದ್ರದ ಕು.ಶಿ. ಹರಿದಾಸ ಭಟ್‌, ಧರ್ಮಸ್ಥಳದ ಡಾ| ಡಿ. ವೀರೇಂದ್ರ ಹೆಗ್ಗಡೆ, ಫಿನ್ಲಂಡಿನ ಲೌರಿ ಹೋಂಕೊ ಮತ್ತು ಅನ್ನೆಲಿ ಹೋಂಕೊ, ಮಂಗಳೂರು ವಿ.ವಿ.ಯ ಬಿ.ಎ. ವಿವೇಕ ರೈ ಮತ್ತು ಕೆ. ಚಿನ್ನಪ್ಪ ಗೌಡ ಅವರನ್ನು ಒಳಗೊಂಡ ಅಪೂರ್ವ ತಂಡದ ಸಿರಿ ಪಠ್ಯದ ಸಂಗ್ರಹ ಮತ್ತು ಸಂಪಾದನೆ ಯೋಜನೆಯ ಕೇಂದ್ರ ಶಕ್ತಿ ಅವರು. ಅಂತಾರಾಷ್ಟ್ರೀಯ ಖ್ಯಾತಿಯ ಜಾನಪದ ವಿದ್ವಾಂಸ ಫಿನ್ಲಂಡ್‌ನ‌ ಲೌರಿ ಹೋಂಕೊ ಅವರು ಜನಪದ ಮಹಾಕಾವ್ಯಗಳ ರಚನೆ, ಮರುರಚನೆ, ಕಲಿಕೆ, ಪ್ರಸಾರ ಇವುಗಳಿಗೆ ಸಂಬಂಧಿಸಿದಂತೆ ರೂಪಿಸಿದ “ಮಾನಸಿಕ ಪಠ್ಯ’ ಮತ್ತು “ಸಿದ್ಧಮಾದರಿ’ ಸಿದ್ಧಾಂತಕ್ಕೆ ಆಕರ ಸಾಮಗ್ರಿಗಳನ್ನು ಒದಗಿಸಿದ ಸಂಶೋಧನ ಸಹಭಾಗಿ. ಅವರ ಸಿರಿಕಾವ್ಯ ಮೂಲ ತುಳುಪಠ್ಯ ಇಂಗ್ಲಿಷ್‌ ಅನುವಾದ ಸಹಿತ ದೀರ್ಘ‌ ಪ್ರಸ್ತಾವನೆಯೊಂದಿಗೆ ಎರಡು ಸಂಪುಟಗಳಲ್ಲಿ ಪ್ರಕಟವಾಗಿದೆ.

ಮಹಾಕವಿ ಪ್ರತಿಭೆ
ತುಳು ಸಿರಿ ಕಾವ್ಯವನ್ನು “ತುಳುನಾಡಿನ ಬೆಳಕು’ ಎಂದು ಗೋಪಾಲ ನಾಯ್ಕ ಬಣ್ಣಿಸಿದ್ದಾರೆ. ಅವರು ಹಾಡಿ ರುವ ಸಿರಿ ಸಂಧಿಯಲ್ಲಿ ಬರೋ ಬ್ಬರಿ 15,683 ಸಾಲುಗಳಿವೆ. ಗೋಪಾಲ ನಾಯ್ಕ ಅವರದು ಮಹಾಕವಿ ಪ್ರತಿಭೆ. ತನ್ನಷ್ಟೇ ಪ್ರತಿಭಾವಂತರಾದ ಮತ್ತು ಜನಪದ ಸಿರಿ ಮಹಾ ಕಾವ್ಯವನ್ನು ಮುರಿದು ಮರು ಕಟ್ಟುವ ಸಾಮರ್ಥ್ಯವುಳ್ಳ ಗಾಯ ಕರು ಇರುವುದನ್ನು ಗೋಪಾಲ ನಾಯ್ಕ ಮನಗಂಡಿದ್ದರು. ಪ್ರಕಟಿತ ಮತ್ತು ಅಪ್ರಕಟಿತ ಆದರೆ ಸಂಗ್ರಹ ವಾಗಿರುವ ಸಿರಿ ಸಂಧಿಯ ಎಲ್ಲ ಪಠ್ಯಗಳ ಸಾಲುಗಳನ್ನು ಲೆಕ್ಕ ಹಾಕಿದರೆ ಅಂದಾಜು ಅರುವತ್ತು ಸಾವಿರ ಸಾಲು ಗಳ ಗಡಿಯನ್ನು ಸಿರಿ ಕಾವ್ಯ ದಾಟಿದೆ.

ಸಿರಿ ಸಂಧಿಯ ಪೂರ್ಣ ಪಠ್ಯವನ್ನು ಹಾಡಿ ಮುಗಿಸಲು ಅವರು ತೆಗೆದುಕೊಂಡ ದಿನಗಳು ಒಂಬತ್ತು! ಸಿರಿ ಕಾವ್ಯವನ್ನು ಅಜ್ಜೆರು ಸಂಧಿ, ಸಿರಿ ಸಂಧಿ, ಸೊನ್ನೆಗಿಂಡೆ ಸಂಧಿ, ಅಬ್ಬಯ ದಾರಯ ಸಂಧಿ, ಕುಮಾರ ಸಂಧಿ ಮತ್ತು ಮುಕ್ತಾಯ ಹೀಗೆ ವ್ಯವ ಸ್ಥಿತವಾಗಿ ವಿಂಗಡಿಸಿ ಹಾಡಿದ್ದಾರೆ. ಸಿರಿ ಕಾವ್ಯ ಅಲ್ಲದೆ ಇವರು ಹಾಡಿದ ಇತರ ಸಂಧಿಗಳು/ ಜನಪದ ಕಾವ್ಯಗಳು ಇಂತಿವೆ. ಕೋಟಿ ಚೆನ್ನಯ ಬೈದ್ಯೆರೆ ಸಂಧಿ, ಏಕಸಾಲೆರೆ ಸಂಧಿ, ಮೈಸಂದಾಯ ಸಂಧಿ, ಈಶ್ವರ ಸಂಧಿ, ಕೋಡªಬ್ಬು ಸಂಧಿ. ಇಷ್ಟಲ್ಲದೆ ಅವ ರೊಬ್ಬ ಜನಪದ ವೈದ್ಯ, ಜನಪದ ಕುಣಿತ ಗಳ ನಾಯಕ. ಇವರು ಬೇಸಾ ಯದ ಗದ್ದೆಯಲ್ಲಿ ಕಬಿತೆ ಗಳನ್ನು ಮುಖ್ಯ ಗಾಯಕರಾಗಿ ಹಾಡು ತ್ತಿದ್ದರು. ಜನಪದ ಕತೆಗಳನ್ನು (ತುಳುವಿನ ಅಜ್ಜಿಕತೆ) ಹೇಳಬಲ್ಲ ಕತೆಗಾರನೂ ಹೌದು. ಸಿರಿ ಜಾತ್ರೆಯಲ್ಲಿ ಅವರ ನೇತೃತ್ವದಲ್ಲಿ ಒಂದು ಸಿರಿ ತಂಡ ಭಾಗವಹಿಸುತ್ತದೆ. ಬಳಗದ “ಮುಖ್ಯ ಕುಮಾರ’ ಅವರು. ಅವರು ಹಾಡುವ ಎಲ್ಲ ಸಂಧಿಗಳ ಸಾಲುಗಳನ್ನು ಒಟ್ಟು ಸೇರಿಸಿದರೆ 30,000 ದಾಟುತ್ತದೆ.

– ಡಾ| ಕೆ. ಚಿನ್ನಪ್ಪ ಗೌಡ