Mangaluru: ಉಳ್ಳಾಲ ಗೂಡ್ಸ್‌ ಶೆಡ್‌ ಕಾರ್ಯಾಚರಣೆ ಆರಂಭ

ಆಂಧ್ರದಿಂದ ಆಗಮಿಸಿದ 10 ವ್ಯಾಗನ್‌ ಸಿಮೆಂಟ್‌; ರೈಲ್ವೇ ಇಲಾಖೆ 8.44 ಲಕ್ಷ ಆದಾಯ

Team Udayavani, Aug 25, 2024, 1:23 AM IST

ಮಂಗಳೂರು: ಉಳ್ಳಾಲದಲ್ಲಿ ನೂತನವಾಗಿ ನಿರ್ಮಿಸಲಾಗಿರುವ ಗೂಡ್ಸ್‌ ಶೆಡ್‌ ಶನಿವಾರದಿಂದ ಕಾರ್ಯಾಚರಣೆ ಆರಂಭಿಸಿದೆ. ಆಂಧ್ರಪ್ರದೇಶದ ಗೂಟಿ ಪಟ್ಟಣದ ಅಲ್ಟ್ರಾಟೆಕ್‌ನಿಂದ ಆ.21ರಂದು 10 ವ್ಯಾಗನ್‌ ಸಿಮೆಂಟ್‌ ಲೋಡ್‌ನೊಂದಿಗೆ ಹೊರಟಿದ್ದ ಗೂಡ್ಸ್‌ ರೈಲು ಆ.24ರಂದು ಉಳ್ಳಾಲ ತಲುಪಿದೆ. ಆ ಮೂಲಕ ಈ ಪ್ರದೇಶದ ಅಭಿವೃದ್ಧಿಯ ಹೊಸ ಮೈಲಿಗಲ್ಲು ಆರಂಭವಾಗಿದ್ದು, ರೈಲ್ವೇ ಇಲಾಖೆಗೆ 8,44,753 ರೂ. ಆದಾಯ ತಂದಿದೆ.

ಉಳ್ಳಾಲ ಗೂಡ್ಸ್‌ ಶೆಡ್‌ ದಕ್ಷಿಣ ರೈಲ್ವೇಯ ಪಾಲಕ್ಕಾಡ್‌ ವಿಭಾಗದಿಂದ ಅಭಿವೃದ್ಧಿಪಡಿಸಲಾಗಿದ್ದು, ಮಂಗ ಳೂರಿನ ಬಂದರಿನಲ್ಲಿದ್ದ ಗೂಡ್ಸ್‌ ಶೆಡ್‌ನ್ನು ಉಳ್ಳಾಲಕ್ಕೆ ಸ್ಥಳಾಂತರಿಸಲಾಗಿತ್ತು. 650 ಮೀ. ಉದ್ದ ಮತ್ತು 15 ಮೀ. ಅಗಲದ ಪ್ಲಾಟ್‌ಫಾರ್ಮ್ ಹೊಂದಿದ್ದು, 42 ಬಿಸಿಎನ್‌ ವ್ಯಾಗನ್‌ಗಳನ್ನು ನಿಲ್ಲಿಸಲು ಸಾಧ್ಯವಾಗಲಿದೆ. ಉಳ್ಳಾಲದಲ್ಲಿ ಗೂಡ್ಸ್‌ ಶೆಡ್‌ ಮರು ನಿರ್ಮಾಣ ಮಾಡಿರುವುದರಿಂದ ದಕ್ಷಿಣ ಕನ್ನಡ ಜಿಲ್ಲೆಯ ಕೃಷಿ, ಕೈಗಾರಿಕೆ ಮತ್ತು ಮೂಲ ಸೌಕರ್ಯ ಕ್ಷೇತ್ರದ ಅಭಿವೃದ್ಧಿಗೆ ಸಾಕಷ್ಟು ಅವಕಾಶ ನೀಡಿದೆ.

ಉಳ್ಳಾಲಕ್ಕೆ ಬರುವ ಸರಕುಗಳನ್ನು ಪಣಂಬೂರು, ಬೈಕಂಪಾಡಿ, ಮರೋಳಿ ಮತ್ತು ಇತರ ಕಡೆಗಳಲ್ಲಿರುವ ಗೋದಾಮುಗಳಿಗೆ ನೇರವಾಗಿ ವರ್ಗಾಯಿಸಲು ಸಾಧ್ಯವಾಗಲಿದೆ. ನಗರದ ವಾಹನ ದಟ್ಟಣೆ, ಮಾಲಿನ್ಯ ಮೊದಲಾದವು ಇದರಿಂದ ಸಾಕಷ್ಟು ಕಡಿಮೆಯಾಗಲಿದೆ. ನಿರ್ಮಾಣ ವಾಗಿರುವ ಉಳ್ಳಾಲ ಗೂಡ್ಸ್‌ ಶೆಡ್‌ ಈ ಪ್ರದೇಶದ ಆರ್ಥಿಕ ಅಭಿವೃದ್ಧಿಯಲ್ಲೂ ಪ್ರಮುಖ ಪಾತ್ರವಹಿಸಲಿದೆ ಎಂದು ಪಾಲಕ್ಕಾಡ್‌ ವಿಭಾಗದ ಪ್ರಕಟನೆ ತಿಳಿಸಿದೆ.