ಮೋದಿಯಿಂದ ಉಗ್ರರಿಗೆ ತಕ್ಕ ಪಾಠ; ಉ. ಪ್ರದೇಶದಲ್ಲಿ ಅಮಿತ್‌ ಶಾ ಮಾತು

Team Udayavani, Feb 3, 2022, 6:50 AM IST

ಲಕ್ನೋ: “ಕೇಂದ್ರದಲ್ಲಿ ಮೋದಿ ಸರಕಾರ ಅಧಿಕಾರಕ್ಕೆ ಬರುವ ಮುನ್ನ 10 ವರ್ಷ ಕಾಂಗ್ರೆಸ್‌ ಆಡಳಿತ ನಡೆಸಿತ್ತು. ಆ ಸಂದರ್ಭ ದಲ್ಲಿ ಪಾಕಿಸ್ಥಾನದ ಉಗ್ರರು ನಮ್ಮ ಗಡಿಯೊಳಗೆ ಬಂದು ನಮ್ಮ ಸೈನಿಕರನ್ನು ಕೊಂದು ಹೋಗಿದ್ದರು. ಆಗ ಪ್ರಧಾನಿಯಾಗಿದ್ದ ಮನಮೋಹನ್‌ ಸಿಂಗ್‌ ಅವರು ಏನೂ ಕ್ರಮ ಕೈಗೊಳ್ಳಲಿಲ್ಲ. ಆದರೆ ನಮ್ಮ ಪ್ರಧಾನಿ ಮೋದಿಯವರು ಉರಿ ಹಾಗೂ ಪುಲ್ವಾಮಾ ಮೇಲೆ ದಾಳಿಗಳಾದ ಕೇವಲ 10 ದಿನಗಳೊಳಗೆ ಪಾಕಿಸ್ಥಾನದ ಉಗ್ರರ ತಾಣಗಳ ಮೇಲೆ ಸರ್ಜಿಕಲ್‌ಸ್ಟ್ರೈಕ್‌ ನಡೆಸಿ, ಅವರನ್ನು ನಿರ್ನಾಮ ಮಾಡಿದರು” ಎಂದು ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ತಿಳಿಸಿದರು.

ಉತ್ತರ ಪ್ರದೇಶ ಚುನಾವಣೆ ಹಿನ್ನೆಲೆಯಲ್ಲಿ ಆಯೋಜಿಸಲಾಗಿದ್ದ ಬಹಿರಂಗ ಸಭೆಯಲ್ಲಿ ಮಾತನಾಡಿದ ಅವರು, “ಈವರೆಗೆ ಉತ್ತರ ಪ್ರದೇಶವನ್ನು ಆಳಿರುವ ಎಸ್ಪಿ ಹಾಗೂ ಬಿಎ ಸ್‌ ಪಿ ಪಕ್ಷಗಳು, ಚಿಕ್ಕಮ್ಮ – ಸೋದರಳಿಯರ ದರ್ಬಾರ್‌ ನಡೆಸಿವೆ’ ಎಂದು ಟೀಕಿಸಿದರು. ಸಹಸ್ವಾನ್‌ನಲ್ಲಿಯೂ ಬಹಿರಂಗ ಪ್ರಚಾರ ನಡೆಸಿದ ಶಾ, ಬದೌನ್‌ನಲ್ಲಿ ಬಹಿರಂಗ ಪ್ರಚಾ ರದ ಜತೆಗೆ ಮನೆ-ಪ್ರಚಾರ ನಡೆಸಿದರು.

ಬೂತ್‌ಗಳಲ್ಲಿ ಸಂಗೀತ!
ನೋಯ್ಡಾ: ಉತ್ತರ ಪ್ರದೇಶದಲ್ಲಿ ಫೆ. 10ರಂದು ಮೊದಲ ಹಂತದ ಮತದಾನ ನಡೆಯಲಿದೆ. ಮತದಾರರಿಗೆ ಮತ ಚಲಾಯಿಸಿದ್ದು ನೆನಪಿನಲ್ಲಿ ಉಳಿಯುವಂತಾಗಲು ಗೌತಮಬುದ್ಧ ನಗರ ಜಿಲ್ಲೆಯ ವಿವಿಧ ಭಾಗಗಳಲ್ಲಿ ಮತ್ತು ನೋಯ್ಡಾಗಳಲ್ಲಿ 250 ಮಾದರಿ ಚುನಾವಣ ಬೂತ್‌ಗಳನ್ನು ಸ್ಥಾಪಿಸಲಾಗುತ್ತದೆ. ಅವುಗಳನ್ನು ಬಲೂನ್‌ಗಳು, ವಿವಿಧ ಹೂವುಗಳಿಂದ ಮತ್ತು ಮಧುರ ಸಂಗೀತಗಳಿಂದ ಇರುವಂತೆ ಸಿದ್ಧ ಪಡಿಸಲಾಗುತ್ತದೆ. ಗೌತಮ ಬುದ್ಧನಗರ ಜಿಲ್ಲೆಯಲ್ಲಿ 1,840 ಚುನಾವಣ ಕೇಂದ್ರಗಳನ್ನು ಸ್ಥಾಪಿಸಲಾಗುತ್ತದೆ. ಅವುಗಳ ಪೈಕಿ 243 ಮಾದರಿ ಚುನಾವಣ ಬೂತ್‌ಗಳಾಗಿವೆ. ಅದರಲ್ಲಿ 20 ಬೂತ್‌ಗಳನ್ನು ಪೂರ್ಣ ಪ್ರಮಾಣದ ಮಹಿಳೆಯರೇ ನಿರ್ವಹಿಸಲಿದ್ದಾರೆ.

ಭ್ರಷ್ಟಾಚಾರ ಮಾಡೆವು: ಅಭ್ಯರ್ಥಿಗಳ ವಾಗ್ಧಾನ
ಗೋವಾ ಚುನಾವಣೆಗೆ ಸ್ಪರ್ಧಿಸಿರುವ ಆಮ್‌ ಆದ್ಮಿ ಪಾರ್ಟಿಯ ಎಲ್ಲ 40 ಅಭ್ಯರ್ಥಿಗಳು, ತಾವು ಯಾವುದೇ ಭ್ರಷ್ಟಾಚಾರ ಪ್ರಕರಣಗಳಲ್ಲಿ ಭಾಗವಹಿಸುವುದಿಲ್ಲ ಎಂಬ ವಿವರಣೆಯಿರುವ ಅಫಿಡವಿಟ್‌ಗೆ ಬುಧವಾರ ಸಹಿ ಹಾಕಿದ್ದಾರೆ. ಪಣಜಿಯಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಪಕ್ಷದ ರಾಷ್ಟ್ರೀಯ ಸಂಚಾಲಕ ಕೇಜ್ರಿ ವಾಲ್‌ ಅವರ ಸಮ್ಮುಖದಲ್ಲಿ ಅಫಿಡವಿಟ್‌ಗೆ ಸಹಿ ಹಾಕಿದರು. “ಗೋವಾದಲ್ಲಿ ಪಕ್ಷಾಂತರ ಚಟು ವಟಿಕೆಗಳು ನಡೆಯುತ್ತಿವೆ. ಇದರಿಂದ ಜನರಿಗೆ ರಾಜಕೀಯ ನಾಯಕರಲ್ಲಿ ವಿಶ್ವಾಸವೇ ಹೊರಟು ಹೋಗುತ್ತಿದೆ. ಹಾಗಾಗಿ ಜನರ ವಿಶ್ವಾಸವನ್ನು ಉಳಿಸಿಕೊಳ್ಳುವ ನಿಟ್ಟಿನಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಕೇಜ್ರಿವಾಲ್‌ ಹೇಳಿದ್ದಾರೆ.

ಇದನ್ನೂ ಓದಿ:ವಂದೇ ಭಾರತ್‌ ರೈಲು ಓಡಿಸಿ: ಕಾಂಗ್ರೆಸ್‌ ಸಂಸದ ಶಶಿ ತರೂರ್‌ ಒತ್ತಾಯ

ಬಡವರಿಗೆ ವಾರ್ಷಿಕ 40 ಸಾವಿರ ನೆರವು
ಉತ್ತರಾಖಂಡದ ಐದು ಲಕ್ಷ ಬಡ ಕುಟುಂಬಗಳಿಗೆ ವಾರ್ಷಿಕವಾಗಿ 40 ಸಾವಿರ ರೂ. ನೀಡಿಕೆ. ನಾಲ್ಕು ಲಕ್ಷ ಯುವಕರಿಗೆ ಉದ್ಯೋಗ, ಉತ್ತರಾಖಂಡವನ್ನು ಪ್ರವಾಸಿಗರ ಸ್ವರ್ಗವನ್ನಾಗಿಸುವ ಗುರಿ. ರಾಜ್ಯದಲ್ಲಿ ಎಲ್‌ಪಿಜಿ ಸಿಲಿಂಡರ್‌ನ ಬೆಲೆ 500 ರೂ. ದಾಟದಂತೆ ಕ್ರಮ-ಇವು ಉತ್ತರಾಖಂಡ ಚುನಾವಣೆ ಹಿನ್ನೆಲೆಯಲ್ಲಿ ಕಾಂಗ್ರೆಸ್‌ ಬಿಡುಗಡೆ ಮಾಡಿರುವ ಚುನಾವಣ ಪ್ರಣಾಳಿಕೆಯ ಪ್ರಮುಖಾಂಶ. ಪಕ್ಷದ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ವಾದ್ರಾ ಅವರು, ವರ್ಚುವಲ್‌ ಕಾನ್ಫರೆನ್ಸ್‌ ಮೂಲಕ ಈ ಪ್ರಣಾಳಿಕೆಯನ್ನು ಬಿಡುಗಡೆ ಮಾಡಿದ್ದಾರೆ.
ಮೋದಿ ವಿರುದ್ಧ ಆರೋಪ: ಇದೇ ಸಂದರ್ಭದಲ್ಲಿ ಮೋದಿ ಸರಕಾರದ ವಿರುದ್ಧ ಆರೋಪ ಮಾಡಿದ ಅವರು, ಪ್ರಧಾನಿಯವರು ತಮ್ಮ ಬಳಕೆಗೆ ಎರಡು ಹೆಲಿಕಾಪ್ಟರ್‌ಗಳನ್ನು 16 ಸಾವಿರ ಕೋಟಿ ರೂ. ವೆಚ್ಚ ಮಾಡಿ ಕೊಂಡಿದ್ದಾರೆ. ದೇಶಾದ್ಯಂತ ಕಬ್ಬು ಬೆಳೆಗಾರರಿಗೆ 14,000 ಕೋಟಿ ರೂ. ಬಾಕಿಯಿದೆ. ಹೆಲಿಕಾಪ್ಟರ್‌ ಖರೀದಿಗೆ ವ್ಯಯಿಸಿದ ಹಣವನ್ನು ಕಬ್ಬು ಬೆಳೆಗಾರರಿಗೆ ಕೊಡಬಾರದಿತ್ತೇ ಎಂದು ಪ್ರಶ್ನಿಸಿದ್ದಾರೆ.

ಉಚಿತ ವಿದ್ಯುತ್‌: ಇದೇ ವೇಳೆ ಮಾತನಾಡಿದ ಮಾಜಿ ಸಿಎಂ ಹಾಗೂ ಕಾಂಗ್ರೆಸ್‌ ನಾಯಕ ಹರೀಶ್‌ ರಾವತ್‌, ರಾಜ್ಯದಲ್ಲಿ ಕಾಂಗ್ರೆಸ್‌ ಅಧಿಕಾರಕ್ಕೆ ಬಂದರೆ ಪ್ರತೀ ಮನೆಗೆ ವಾರ್ಷಿಕವಾಗಿ 100 ಯೂನಿಟ್‌ ವಿದ್ಯುತ್ತನ್ನು ಮೊದಲ ವರ್ಷ, 200 ಯೂನಿಟ್‌ ವಿದ್ಯುತ್ತನ್ನು ಎರಡನೇ ವರ್ಷ ಕೊಡುವುದಾಗಿ ಆಶ್ವಾಸನೆ ನೀಡಿದ್ದಾರೆ.