ನಾಳೆಯಿಂದ ಶಿರಸಿ ಮಾರಿಕಾಂಬ ದರ್ಶನ ಭಕ್ತರಿಗೆ ಲಭ್ಯ

Team Udayavani, Jun 7, 2020, 9:31 PM IST

ಶಿರಸಿ: ಮಾರಿಕಾಂಬಾ ದೇವಿ ಜಾತ್ರೆಯ ಬಳಿಕ ಯುಗಾದಿಯಂದು ಪುನಃ ಪ್ರತಿಷ್ಠೆ ಆಗಿದ್ದರೂ ಸಾರ್ವಜನಿಕರ ದರ್ಶನ ಇಲ್ಲದ ಮಾರಿಕಾಂಬಾ ದೇವಸ್ಥಾನದ ದ್ವಾರವನ್ನು ಸೋಮವಾರದಿಂದ ತೆರೆಯಲಾಗುತ್ತಿದೆ.

ಕೋವಿಡ್-19 ಲಾಕ್ ಡೌನ್ ಕಾರಣದಿಂದ ಕಳೆದ ಎರಡುವರೆ ತಿಂಗಳುಗಳಿಂದ ಸಾರ್ವಜನಿಕರ ಪ್ರವೇಶ ಇರದ ದೇವಾಲಯದಲ್ಲಿ ಸರಕಾರದ ಸೂಚನೆಯ ಪ್ರಕಾರ ಜೂ.8ರಿಂದ ದೇವಿ ದರ್ಶನ ಲಭಿಸಲಿದೆ. ಆದರೆ, ಯಾವುದೇ ಸೇವೆಗಳಿಗೆ, ಅನ್ನ ಪ್ರಸಾದಕ್ಕೆ ಅವಕಾಶ ಇಲ್ಲವಾಗಿದೆ.

ರವಿವಾರ ದೇವಸ್ಥಾನದ ಅಧ್ಯಕ್ಷ ವೆಂಕಟೇಶ ನಾಯ್ಕ ಮಾರ್ಗದರ್ಶನದಲ್ಲಿ ಸಾರ್ವಜನಿಕರಿಗೆ ದೈಹಿಕ ಅಂತರ ಕಾಪಾಡಿಕೊಳ್ಳಲು ಗುರುತು ಹಾಕುವ ಹಾಗೂ ಸೆನಿಟೈಸರ್ ವ್ಯವಸ್ಥೆ ಮಾಡಲಾಯಿತು. ಥರ್ಮಲ್ ಸ್ಕ್ರೀನಿಂಗ್ ವ್ಯವಸ್ಥೆ ಕೂಡ ಮಾಡಲಾಗುತ್ತಿದ್ದು, ಮಂಗಳಾರತ , ಹಣ್ಣುಕಾಯಿ ಸಮರ್ಪಣೆ, ತೀರ್ಥ ಪ್ರಸಾದ ಸೇವೆ ಕೂಡ ಇಲ್ಲವಾಗಿದೆ. ಭಕ್ತರು ಹೂವು ಇತರೇ ಸಾಮಗ್ರಿ ತಂದಲ್ಲಿ ಬುಟ್ಟಿಯಲ್ಲಿ ಹಾಕಿಡುವ ವ್ಯವಸ್ಥೆ ಮಾಡಲಾಗಿದೆ. ದೇವಿ ದರ್ಶನ ಬೆಳಿಗ್ಗೆ 8 ರಿಂದ 1 ಹಾಗೂ ಮಧ್ಯಾಹ್ನ 1:3೦ರಿಂದ ಸಂಜೆ 6 ಗಂಟೆ ತನಕ ಇರಲಿದೆ.