ಚಂದ್ರನಲ್ಲಿ ಉಂಟಾಗಿದೆ ಭೂಕುಸಿತ : ನಾಸಾ ಸಂಶೋಧನೆಯಲ್ಲಿ ಕಂಡು ಬಂದಿದೆ ಅಚ್ಚರಿ ಅಂಶ

Team Udayavani, May 14, 2021, 9:00 AM IST

ವಾಷಿಂಗ್ಟನ್‌: ಭೂಮಿಯಲ್ಲಿ ಹಲವು ಕಾರಣಗಳಿಂದ ಭೂಕುಸಿತ ಉಂಟಾಗುತ್ತದೆ. ಅದೇ ರೀತಿ ಚಂದ್ರ, ಮಂಗಳ ಗ್ರಹಗಳ ಅಂಗಳದಲ್ಲಿ ಆಗುವುದುಂಟಾ? ಹೌದು ಎನ್ನುತ್ತಾರೆ ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ, ನಾಸಾದ ವಿಜ್ಞಾನಿಗಳು.

ಭೂವಿಗೆ ಕಾಣದ ಚಂದ್ರನ ಭಾಗದಲ್ಲಿ ಇಂಥದ್ದೊಂದು ಸಂಗತಿ ನಡೆದಿದೆ. ಬಾಹ್ಯಾಕಾಶ ನೌಕೆಗಳ ಅವಶೇಷಗಳು, ಸೂರ್ಯನಿಂದ ಬರುವ ವಿಕಿರಣ, ಉಲ್ಕಾ ಪಾತಗಳಿಂದ ಚಂದ್ರನ ಒಳಭಾಗದಲ್ಲಿ ಭೂಕುಸಿತದಂಥ ಅಥವಾ ಕಂಪನದಂಥ ಬೆಳವಣಿಗೆಗಳು ನಡೆದಿವೆ.

ನಾಸಾದ ಲೂನಾರ್‌ ರೆಕನ್ನೈಸೆನ್ಸ್‌ ಆರ್ಬಿಟರ್‌ ಕೆಮರಾ (ಎಲ್‌ಆರ್‌ಒಸಿ) ಬಳಕೆ ಮಾಡಿಕೊಂಡು ನಾಸಾ ಸಂಶೋಧಕರು ಈ ಅಂಶವನ್ನು ಕಂಡುಕೊಂಡಿದ್ದಾರೆ. ಅದು ಕಳುಹಿಸಿರುವ ಚಿತ್ರದಲ್ಲಿ ದೊಡ್ಡ ಪ್ರಮಾಣದ ಕುಳಿಗಳು ಕಂಡುಬಂದಿದೆ.

ಉಲ್ಕಾ ಪಾತದಂಥ ಬೆಳವಣಿಗೆಯಿಂದಾಗಿ ಚಂದ್ರನ ಪಶ್ಚಿಮ ಭಾಗದ ಕ್ಲೂಟ್‌ ಕ್ರಾಟರ್‌ನ ಒಂದು ಅಂಶ ಕುಸಿದು ಬಿದ್ದಿದೆ. ಇದರಿಂದಾಗಿ ಈ ಪ್ರದೇಶದಲ್ಲಿ ಸಾಮೂಹಿಕ ಕೊರೆತ (ಮಾಸ್‌ ವೇಸ್ಟಿಂಗ್‌) ಉಂಟಾಗಿದೆ. ಗುರುತ್ವಾಕರ್ಷಣ ಬಲದ ಪ್ರಭಾವದಿಂದಾಗಿ ಮೇಲ್ಮೈ ಭಾಗದಿಂದ ಕೆಳಭಾಗಕ್ಕೆ ವಸ್ತುಗಳು ಸರಿದು ಹೋಗುತ್ತವೆ. ಚಂದ್ರನ ಮೇಲ್ಮೈ ನಲ್ಲಿ ಸಾಮೂಹಿತ ಕೊರೆತ ಅಥವಾ ಮಾಸ್‌ ವೇಸ್ಟಿಂಗ್‌ ಎನ್ನುವುದು ಸಾಮಾನ್ಯದ ಅಂಶ. ಚಂದ್ರನ ಮೇಲ್ಮೈನ ಒಳಭಾಗದಲ್ಲಿ
ಉಂಟಾಗುವ ಚಲನೆಗಳಿಂದಲೂ ಕೂಡ ಈ ರೀತಿಯಾಗುತ್ತದೆ. ಇಂಥದ್ದು ಮಂಗಳನಲ್ಲಿಯೂ ಆಗುತ್ತದೆ ಎನ್ನುತ್ತಾರೆ ನಾಸಾ ಸಂಶೋಧಕರು.