Desi Swara: ಓಝೀ ಎಂಬ “ಗೂಳಿ’- ಜನರ ಮನಗೆದ್ದ ಕಾಮನ್‌ವೆಲ್ತ್‌ನ ಲೋಹದ ಪ್ರತಿಮೆ

ಮ್ಯೂಸಿಕ್‌ ಬ್ಯಾಂಡ್‌ನ‌ ಮೂಲಕ ಅತ್ಯಂತ ಪ್ರಖ್ಯಾತನಾದ, ಕೋಟ್ಯಾಧಿಪತಿಯಾದ.

Team Udayavani, Jul 20, 2024, 1:10 PM IST

Desi Swara: ಓಝೀ ಎಂಬ “ಗೂಳಿ’- ಜನರ ಮನಗೆದ್ದ ಕಾಮನ್‌ವೆಲ್ತ್‌ನ ಲೋಹದ ಪ್ರತಿಮೆ

ಇಂಗ್ಲೆಂಡಿನ ಎರಡನೇ ದೊಡ್ಡ ನಗರ ಬರ್ಮಿಂಗ್‌ಹ್ಯಾಮ್‌. ಇಲ್ಲಿನ ಜನರ ಇಂಗ್ಲಿಷಿಗೆ ಅವರದೇ ಆದ ಬರ್ಮೀ ಧಾಟಿಯಿದೆ, ಸಂಸ್ಕೃತಿಯೂ ಇದೆ. 2022ರಲ್ಲಿ ಇಲ್ಲಿ ಕಾಮನ್‌ವೆಲ್ತ್‌ ಗೇಮ್ಸ್‌ ನಡೆಯಿತು. ಆಗ ಇಡೀ ನಗರವನ್ನು ಶೃಂಗರಿಸಿ ಸಜ್ಜುಗೊಳಿಸಲಾಯಿತು. ಲೋಹದ ಮೆಕ್ಯಾನಿಕಲ್‌ ಗೂಳಿಯೊಂದನ್ನು ಒಂದು ಆಕರ್ಷಣೆಯಾಗಿ ನಿರ್ಮಿಸಿ, ನಿಲ್ಲಿಸಲಾಗಿತ್ತು. “ರೇಜಿಂಗ್‌ ಬುಲ್‌’ ಎಂದು ಹೆಸರಿನ ಈ ಗೂಳಿ ಅತ್ಯಂತ ಜನಪ್ರಿಯವಾಯ್ತು. ಹತ್ತು ದಿನಗಳ ಕ್ರೀಡೆಯ ಸಮಯದಲ್ಲಿ ನೂರಾರು ಸಾವಿರ ಜನರು ಈ ಗೂಳಿಯ ಮುಂದೆ ನಿಂತು ಫೋಟೋ ತೆಗೆಸಿಕೊಂಡರು.

ಕಣ್ಣು ಕೆಂಪಗೆ ಮಾಡಿಕೊಂಡು, ತಲೆಯಲ್ಲಾಡಿಸಿ, ಗುಟುರುಹಾಕುತ್ತ, ಬಾಲವನ್ನು ಎತ್ತಿ ಆಡಿಸುವ ಈ ಗೂಳಿ ಎಲ್ಲರ ಮನಸ್ಸನ್ನು ಗೆದ್ದಿತು. ಅನಂತರವೂ ಸಾವಿರಾರು ಜನರು ಪ್ರತೀದಿನ ಈ ಗೂಳಿಯನ್ನು ನೋಡಲು ಬರತೊಡಗಿದರು. ಕಾಮನ್‌ವೆಲ್ತ್‌ ಗೇಮ್ಸ್‌ ಮುಗಿದು ಐದು ತಿಂಗಳಾದರೂ, ಜನರು ಗೂಳಿಯ ಬಗ್ಗೆ ಮಾತಾಡುವುದನ್ನು ನಿಲ್ಲಿಸದಾದರು. ಇದರ ಭಾಗಗಳನ್ನು ಬಿಚ್ಚಿ ಇಡಬೇಕೆಂದು ಹೊರಟಾಗ, ಜನರು ಅದನ್ನು ಗಂಟಾಘೋಷವಾಗಿ ವಿರೋಧಿಸಿದರು. ಅವರ ಕರೆಯನ್ನು ಮನ್ನಿಸಿದ ಮೇಯರ್‌, ಅದನ್ನು ಶಾಶ್ವತವಾಗಿ ಉಳಿಸಿಕೊಳ್ಳುವ ತೀರ್ಮಾನ ತೆಗೆದುಕೊಂಡರು. ಆದರೆ ಅದು ಬಹುಕಾಲ ಇರಬೇಕೆಂದಿದ್ದರೆ, ಅದನ್ನು ಮಾರ್ಪಾಡುಗೊಳಿಸಬೇಕಿತ್ತು. ಐವತ್ತು ಜನ ಕಲಾವಿದರು, ಅಭಿಯಂತರುಗಳು ಇದಕ್ಕಾಗಿ ಮತ್ತೆ ಕೆಲಸ ಮಾಡಿದರು. ಜುಲೈ 26, 2023ರಂದು ಅದನ್ನು ಬರ್ಮಿಂಗ್‌ಹ್ಯಾಮ್‌ನ ನ್ಯೂ ಸ್ಟ್ರೀಟ್‌ ರೈಲ್ವೇ ನಿಲ್ದಾಣದಲ್ಲಿ ಮರು ಉದ್ಘಾಟನೆ ಮಾಡಲಾಯಿತು.

ಹತ್ತು ಮೀಟರ್‌ (33 ಅಡಿ) ಎತ್ತರವಿರುವ, 2.5 ಟನ್‌ ತೂಕದ ಬೃಹತ್‌ ಗಾತ್ರದ ಈ ಗೂಳಿ ತೂರಿ ಬರುವಷ್ಟು ಎತ್ತರಕ್ಕೆ ನಿಲ್ದಾಣದ ಯಾವ ಬಾಗಿಲುಗಳೂ ಇಲ್ಲ. ಹಾಗಾಗಿ ಅದನ್ನು ಬಿಚ್ಚಿ ತಂದು ಮತ್ತೆ ನಿರ್ಮಿಸುವ ಕೆಲಸವನ್ನು ತೆರೆ-ಮರೆಯಲ್ಲಿ ನಿಲ್ದಾಣದ ಒಳಗೇ ನಡೆಸಲಾಯಿತು. ಅದರ ಸ್ವರೂಪ ಮತ್ತೂ ಆಕರ್ಷಕವಾಯಿತು.

ಅದಕ್ಕೊಂದು ಹೆಸರು ಬೇಕೆಂದಾಗ, ಬರ್ಮಿಂಗ್‌ಹ್ಯಾಮ್‌ ನಗರದ ಯಾವ ಪ್ರಸಿದ್ಧ ವ್ಯಕ್ತಿಯ ಹೆಸರನ್ನು ಇಡಬಹುದು ಎಂದು ಸೂಚಿಸಲು ಜನತೆಗೆ ಕರೆ ಮಾಡಲಾಗಿತ್ತು. ಜನರು ಸೂಚಿಸಿದ್ದು ಅದೇ ಊರಿನಲ್ಲಿ ಹುಟ್ಟಿ ಬೆಳೆದಿದ್ದ “ಬ್ಲಾಕ್‌ ಸಬ್ಬತ್‌’ ಬ್ಯಾಂಡ್‌ನ‌ ಮುಖ್ಯ ರಾಕ್‌ ಸ್ಟಾರ್‌ ಓಝೀ ಓಸ್ಬೋರ್ನ ನ ಹೆಸರನ್ನು ಆಯ್ಕೆ ಮಾಡಿದರು. ಹೀಗಾಗಿ “ಓಝೀ ಗೂ’ ಎಂಬ ಹೊಸ ಹೆಸರಿನಲ್ಲಿ, ನಗರದ ರೈಲ್ವೇ ನಿಲ್ದಾಣವನ್ನು ಇದು ತನ್ನ ಶಾಶ್ವತ ಮನೆಯನ್ನಾಗಿಸಿಕೊಂಡು ನಿಂತಿದೆ. ಪ್ರತೀ ದಿನ ಬೆಳಗ್ಗೆ 8.15ರಿಂದ ರಾತ್ರಿ 8.15ರ ವರೆಗೆ ಗಂಟೆಗೊಮ್ಮೆ ಇದು ಜೀವ ತಾಳುತ್ತದೆ. ತನ್ನ ತಲೆಯನ್ನು ಆಡಿಸಿ, ಬಾಲವನ್ನು ಬೀಸುತ್ತದೆ. ಆ ರೈಲ್ವೇ ನಿಲ್ದಾಣಕ್ಕೆ ಬರುವ ಜನರನ್ನು ಆದರದಿಂದ ಸ್ವಾಗತಿಸುತ್ತದೆ.

ಆದರೆ “ಓಝೀ’ ಎನ್ನುವ ಹೆಸರಿಗೆ ಮತ್ತೊಂದು ಕಥೆಯಿದೆ. ಸಾಮಾನ್ಯವಾಗಿ ಆಸ್ವಾಲ್ಡ್‌ ಅಥವಾ ಆಸ್ಕರ್‌ ಎನ್ನುವ ಹುಡುಗರ ಹೆಸರನ್ನು ಮೊಟಕುಗೊಳಿಸಿ ಓಝೀ ಎಂದು ಕರೆಯುವ ವಾಡಿಕೆ ಇಂಗ್ಲಿಷರಲ್ಲಿದೆ. ಆದರೆ ಈ ಪ್ರಸಿದ್ಧ ಗಾಯಕನ ಹೆಸರಲ್ಲಿ ಓಝೀ ಪದ ಸೇರಿದ್ದು ಒಂದು ವಿಶೇಷ. ಏಕೆಂದರೆ ಆತನ ಹೆಸರು ಆಸ್ವಾಲ್ಡ್‌ ಅಥವಾ ಆಸ್ಕರ್‌ ಎರಡೂ ಆಗಿರಲಿಲ್ಲ! ಓಝೀ ಹೆಸರಿನಿಂದ ಜಗದ್ವಿಖ್ಯಾತನಾದ ಓಝೀ ಓಸಬೋರ್ನನ ನಿಜವಾದ ಹೆಸರು, ಜಾನ್‌ ಮೈಕೇಲ್‌ ಓಸಬೋರ್ನ್. ಅವನ ಹೆಸರಿಸಲ್ಲಿ “ಓಝಿ’ ಎನ್ನುವ ಪದ ಸೇರಿದ್ದರ ಹಿಂದೆ ಒಂದು ವಿಷಾದವಿದೆ.

ಈತ 6 ಮಕ್ಕಳಲ್ಲಿ ಒಬ್ಬನಾಗಿದ್ದ. ಬಡತನವಿದ್ದ ಸಂಸಾರದ ಹುಡುಗನಿಗೆ ಡಿಸ್ಲೆಕ್ಸಿಯಾ (ಗ್ರಹಣ ದೋಷಗಳ)ದ ತೊಂದರೆಯಿತ್ತು. ಅವನನ್ನು ಚುಡಾಯಿಸುತ್ತಿದ್ದ ಇತರ ಮಕ್ಕಳು ಅವನನ್ನು ಆಡಿಕೊಂಡು “ಓಝೀ’ ಎಂದು ಗೇಲಿ ಮಾಡುತ್ತಿದ್ದರು. ಜಾನ್‌ ಎನ್ನುವ ಈ ಹುಡುಗ, ಅದನ್ನು ಸಹಿಸಿಕೊಂಡದ್ದೇ ಅಲ್ಲದೇ ಅದನ್ನೇ ತನ್ನ ಹೆಸರೆಂದು ಒಪ್ಪಿಕೊಂಡುಬಿಟ್ಟ. ಮುಂದೆ, ಆತ ತನ್ನ ತೊಂದರೆಯನ್ನು ಸಂಭಾಳಿಸಿಕೊಂಡು ಮುಂದೆ ಬಂದ. ತನ್ನದೇ ಮ್ಯೂಸಿಕ್‌ ಬ್ಯಾಂಡ್‌ನ‌ ಮೂಲಕ ಅತ್ಯಂತ ಪ್ರಖ್ಯಾತನಾದ, ಕೋಟ್ಯಾಧಿಪತಿಯಾದ.

ಎಲ್ಲರೂ ಆತನ ನಿಜವಾದ ಹೆಸರೇ ಓಝೀ ಓಸ್ಬೋರ್ನ ಎಂದುಕೊಳ್ಳುವ ಮಟ್ಟಕ್ಕೆ ಅದು ಜನಜನಿತವಾಗಿದೆ. ಜೀವನದ ಎಳೆಯ ಹಂತದಲ್ಲೇ ಆತನ ಮೇಲೆ ನಡೆದ ಬುಲ್ಲಿಯಿಂಗ್‌ನ್ನು ಎದುರಿಸಿ ಗೆದ್ದ “ರೇಜಿಂಗ್‌ ಬುಲ್‌’ನ ಕಥೆಯೇ “ಓಝೀ, ದಿ ಬುಲ್‌’ ಹೇಳುತ್ತಿರುವಂತೆ ಭಾಸವಾಗುತ್ತದೆ. 75 ವರ್ಷದ ಈತ ಈಗಲೂ ಬದುಕಿದ್ದಾನೆ. ಕೆಲವು ನರದೋಷದ ಖಾಯಿಲೆಗಳ ಕಾರಣ ಹೆಚ್ಚಾಗಿ ಕಾಣಿಸಿಕೊಳ್ಳುವುದಿಲ್ಲ. ಈ ಗೂಳಿಯನ್ನು ಆತನ ಹೆಂಡತಿ ಶಾರನ್‌ ಓಸ್ಬಾರ್ನ್ ಉದ್ಘಾಟನೆ ಮಾಡಿ, ಜೀವಿತಾವಧಿಯಲ್ಲಿ ಆತನಿಗೆ ದೊರೆತ ಪ್ರೀತಿ ಮತ್ತು ಗೌರವದ ಪ್ರತೀಕ ಇದೆಂಬ ಹೇಳಿಕೆ ನೀಡಿದಳು.