Bangladesh ದಂಗೆ ಹಿಂದೆ ಪಾಕ್‌-ಚೀನ ಕುತಂತ್ರ?

Team Udayavani, Aug 6, 2024, 7:10 AM IST

ಢಾಕಾ: ಬಾಂಗ್ಲಾದಲ್ಲಿ ಸೃಷ್ಟಿಯಾಗಿರುವ ಅರಾಜಕತೆ ಹಿಂದೆ ಪಾಕ್‌ ಸೇನೆ ಹಾಗೂ ಐಎಸ್‌ಐ ಕೈವಾಡ ಇದೆ ಎಂಬ ಶಂಕೆ ಮೂಡಿದೆ. ವಿದ್ಯಾರ್ಥಿ ಸಂಘಟನೆಗಳ ಪ್ರತಿಭಟನೆಯಲ್ಲಿ ಮಧ್ಯಪ್ರವೇಶಿಸಿ ಅದನ್ನು ರಾಜಕೀಯಗೊಳಿಸುವ ಪ್ರಯತ್ನವನ್ನು ಪಾಕ್‌ ಸೇನೆ-ಐಎಸ್‌ಐ ಮಾಡಿದೆ ಎಂದು ಹೇಳಲಾಗುತ್ತಿದೆ.

ಹಿಂಸಾಚಾರ ಹೆಚ್ಚಿಸುವ ಮೂಲಕ ಹಸೀನಾರನ್ನು ಅಧಿಕಾರದಿಂದ ಇಳಿಸಿ, ವಿಪಕ್ಷ ಬಿಎನ್‌ಪಿಯನ್ನು ಅಧಿಕಾರಕ್ಕೆ ತರಲು ಪಾಕ್‌ ಕುತಂತ್ರ ನಡೆಸಿದೆ. ಬಾಂಗ್ಲಾ-ಭಾರತ ಸಂಬಂಧದಲ್ಲಿ ಬಿರುಕು ಮೂಡಿಸಬೇಕೆಂದರೆ ಹಸೀನಾ ಅಧಿಕಾರದಿಂದ ಕೆಳಗಿಳಿಯಬೇಕು ಎಂದರಿತ ಪಾಕ್‌ ಕುತಂತ್ರ ನಡೆಸಿ ದಂಗೆ ಸೃಷ್ಟಿಸಿ ಭಾರತ ವಿರೋಧಿ ಸರಕಾರ ಸ್ಥಾಪಿಸಲು ಪ್ರಯತ್ನಿಸುತ್ತಿದೆ ಎಂದು ವರದಿಯಾಗಿದೆ.

ನಿಷೇಧಿತ ಸಂಘಟನೆ ಜಮಾತ್‌-ಎ-ಇಸ್ಲಾಮಿಯ ವಿದ್ಯಾರ್ಥಿ ಘಟಕ ಛಾತ್ರ ಶಿಬಿರ್‌, ಗುಪ್ತಚರ ಸಂಸ್ಥೆ ಐಎಸ್‌ಐ ಜತೆಗೆ ನಂಟು ಹೊಂದಿದೆ. ಮೊದಲು ಮೀಸ ಲಾತಿ ಪ್ರತಿ ಭಟನೆ ಆರಂಭಿಸಿದ್ದು ಇದೇ ಸಂಘಟನೆ. ಇದಲ್ಲದೇ ಚೀನ ಕೂಡ ಶೇಖ್‌ ಹಸೀ ನಾರನ್ನು ಆಡಳಿತದಿಂದ ಇಳಿಸಲು ಪಿತೂರಿ ನಡೆಸಿದೆ ಎನ್ನಲಾಗುತ್ತಿದೆ.

ಇತ್ತೀಚೆಗಷ್ಟೇ ಹಸೀನಾ ಅವರು ಚೀನ ಪ್ರವಾಸ ಹೋಗಿದ್ದಾಗ, ಚೀನದಿಂದ ಆರ್ಥಿಕ ಸಹಾಯ ದೊರೆಯದ್ದಕ್ಕೆ ಬೇಸರ ವ್ಯಕ್ತಪಡಿಸಿ, ಪ್ರವಾಸವನ್ನು ಅರ್ಧಕ್ಕೆ ಮೊಟಕುಗೊಳಿಸಿ ವಾಪಸಾಗಿದ್ದರು. ಹೀಗಾಗಿ ದಂಗೆಯಲ್ಲಿ ಚೀನದ ಕುಮ್ಮಕ್ಕೂ ಇದೆ ಎನ್ನಲಾಗುತ್ತಿದೆ.