ಪಾಕ್‌ನಲ್ಲಿ ಸದ್ಯದಲ್ಲೇ ಪೋಲಿಯೋ ನಿರ್ಮೂಲನ ಅಭಿಯಾನಕ್ಕೆ ಚಾಲನೆ

Team Udayavani, Jun 11, 2020, 10:30 PM IST

ಸಾಂದರ್ಭಿಕ ಚಿತ್ರ.

ಇಸ್ಲಾಮಾಬಾದ್‌: ಕೋವಿಡ್ -19 ಸಂಕಷ್ಟದ ನಡುವೆಯೇ ಪಾಕಿಸ್ತಾನ ಸರ್ಕಾರ ಪೋಲಿಯೋ ನಿರ್ಮೂಲನಾ ಅಭಿಯಾನವನ್ನು ಆರಂಭಿಸಲು ಮುಂದಾಗಿದೆ. ಇದಕ್ಕೆ ಪಾಕ್‌ ಮಿಲಿಟರಿ ಬೆಂಬಲ ನೀಡುವುದಾಗಿ ಹೇಳಿದೆ ಎಂದು ಪಾಕ್‌ ಸೇನೆ ಮುಖ್ಯಸ್ಥ ಜನರಲ್‌ ಖಾಮರ್‌ ಜಾವೇದ್‌ ಬಾಜ್ವ ಮೈಕ್ರೊಸಾಫ್ಟ್ ಸಂಸ್ಥಾಪಕ, ಲೋಕೋಪಕಾರಿ ಬಿಲ್‌ಗೇಟ್ಸ್‌ಗೆ ತಿಳಿಸಿದ್ದಾರೆ.

ದೂರವಾಣಿಯಲ್ಲಿ ಈ ಕುರಿತು ಬಿಲ್‌ಗೇಟ್ಸ್‌ ಜೊತೆ ಮಾತನಾಡಿದ ಬಾಜ್ವ ಪಾಕಿಸ್ತಾನದಲ್ಲಿ ಪೋಲಿಯೊ ತೊಡೆದುಹಾಕುವ ಕುರಿತು ಚರ್ಚಿಸಿದ್ದಾರೆ. ಜೊತೆಗೆ, ಪಾಕಿಸ್ತಾನದಲ್ಲಿ ಪೋಲಿಯೋ ನಿರ್ಮೂಲನೆ ಅಭಿಯಾನಕ್ಕೆ ಕೈಜೋಡಿಸಿರುವ ಬಿಲ್‌ಗೇಟ್ಸ್‌ ಫೌಂಡೇಷನ್‌ಗೆ ಬಾಜ್ವ ಧನ್ಯವಾದ ತಿಳಿಸಿದ್ದಾರೆ. ಫೆ.17ರಂದೇ ಈ ಅಭಿಯಾನ ಆರಂಭಿಸಲಾಗಿತ್ತು. ಆದರೆ ಕೋವಿಡ್ -19 ಸಾಂಕ್ರಾಮಿಕ ಕಾಯಿಲೆಯಿಂದಾಗಿ ಅಭಿಯಾನವನ್ನು ಸ್ಥಗಿತಗೊಳಿಸಲಾಗಿತ್ತು.