Paris Olympics: ಹಾಕಿ ವೀರರಿಗೆ ಸಿಎಂ ಭಗವಂತ್‌ ಮಾನ್‌ ಸಮ್ಮಾನ

Team Udayavani, Aug 19, 2024, 12:11 AM IST

ಚಂಡೀಗಢ: ಪ್ಯಾರಿಸ್‌ ಒಲಿಂಪಿಕ್ಸ್‌ನ ಹಾಕಿ ಸ್ಪರ್ಧೆಯಲ್ಲಿ ಕಂಚಿನ ಪದಕ ಗೆದ್ದ ಭಾರತೀಯ ತಂಡ ಪಂಜಾಬ್‌ ರಾಜ್ಯದ ಆಟಗಾರರಿಗೆ ಮುಖ್ಯಮಂತ್ರಿ ಭಗವಂತ್‌ ಮಾನ್‌ ಅವರು ತಲಾ ಒಂದು ಕೋಟಿ ರೂ. ನಗದು ಬಹುಮಾನ ನೀಡಿ ಗೌರವಿಸಿದ್ದಾರೆ.

ಈ ಸಂದರ್ಭ ಮಾತನಾಡಿದ ಅವರು ರಾಜ್ಯ ಮತ್ತು ದೇಶಕ್ಕೆ ಕೀರ್ತಿ ತಂದ ಈ ಮಣ್ಣಿನ ಪುತ್ರರನ್ನು ಸಮ್ಮಾನಿಸುತ್ತಿರುವುದು ಐತಿಹಾಸಿಕ ಸಂದರ್ಭವಾಗಿದೆ ಎಂದರು. ರಾಜ್ಯದ ಎಂಟು ಹಾಕಿ ಆಟಗಾರರಿಗೆ ತಲಾ 1 ಕೋಟಿ ರೂ. ಮತ್ತು ರಾಜ್ಯದಿಂದ ಒಲಿಂಪಿಕ್‌ ಗೇಮ್ಸ್‌ನಲ್ಲಿ ಭಾಗವಹಿಸಿದ 11 ಮಂದಿಗೆ ತಲಾ 15 ಲಕ್ಷ ರೂ.ಗಳ ಚೆಕ್‌ ಅನ್ನು ಅವರು ವಿತರಿಸಿದರು.

ಭಾರತ ತಂಡದ ಪ್ರತಿಯೊಂದು ಹಾಕಿ ಪಂದ್ಯವನ್ನು ತಾನು ವೀಕ್ಷಿಸಿದ್ದೇನೆ ಮತ್ತು ಈ ಆಟಗಾರರ ಅದ್ಭುತ ಪ್ರದರ್ಶನ ಎಲ್ಲರಿಗೂ ಹೆಮ್ಮೆ ತಂದಿದೆ ಎಂದು ಮಾನ್‌ ಹೇಳಿದರು. ಪದಕ ಗೆಲ್ಲುವುದು ಪ್ರತಿಯೊಬ್ಬ ಸ್ಪರ್ಧಿಯ ಕನಸು ಆಗಿದೆ. ನಾಯಕ ಹರ್ಮನ್‌ಪ್ರೀತ್‌ ಸಿಂಗ್‌ ಮುಂಚೂಣಿಯಲ್ಲಿ ನಿಂತು ತಂಡವನ್ನು ಮುನ್ನಡೆಸಿದ ರೀತಿ ಅದ್ಭುತವಾಗಿದೆ ಎಂದವರು ತಿಳಿಸಿದರು.