ಪೊಲೀಸ್ ಅಧಿಕಾರಿ, ಮಲಯಾಳಂ ಸಿನಿಮಾ ನಟ ಪಿ.ಸಿ.ಜಾರ್ಜ್ ವಿಧಿವಶ

Team Udayavani, May 14, 2021, 8:27 AM IST

ತಿರುವನಂತಪುರಂ: ಜನಪ್ರಿಯ ಪೊಲೀಸ್ ಅಧಿಕಾರಿ, ಮಲಯಾಳಂ ಚಿತ್ರರಂಗದ ನಟ ಪಿ.ಸಿ.ಜಾರ್ಜ್ (74ವರ್ಷ) ಶುಕ್ರವಾರ( ಮೇ 14) ಇಲ್ಲಿನ ಖಾಸಗಿ ಆಸ್ಪತ್ರೆಯಲ್ಲಿ ನಿಧನರಾಗಿರುವುದಾಗಿ ಚಿತ್ರರಂಗದ ಮೂಲಗಳು ತಿಳಿಸಿವೆ.

ಪೊಲೀಸ್ ವರಿಷ್ಠಾಧಿಕಾರಿಯಾಗಿ(ಎಸ್ ಪಿ) ಜಾರ್ಜ್ ನಿವೃತ್ತಿ ಹೊಂದಿದ್ದರು. ಮಲಯಾಳಂ ಸಿನಿಮಾಗಳಲ್ಲಿ ಜಾರ್ಜ್ ಅವರು ಹಲವು ವಿಲನ್ ಪಾತ್ರಗಳಲ್ಲಿ ನಟಿಸಿದ್ದರು.

1980ರ ಆರಂಭದಲ್ಲಿ ಕೇರಳ ರಾಜಧಾನಿಯಲ್ಲಿ ಪೊಲೀಸ್ ಅಧಿಕಾರಿಯಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದ ಸಂದರ್ಭದಲ್ಲಿ ಮಮ್ಮುಟ್ಟಿ ಅಭಿನಯದ “ಸಂಗಂ” ಸಿನಿಮಾದಲ್ಲಿ ಪಿ.ಸಿ.ಜಾರ್ಜ್ ಅಭಿನಯಿಸುವ ಮೂಲಕ ಪ್ರೇಕ್ಷಕರ ಮನ ಗೆದ್ದಿದ್ದರು. ಆ ಬಳಿಕ ಅವರು ಸಿನಿ ಕ್ಷೇತ್ರದಲ್ಲಿ ತಿರುಗಿ ನೋಡಿದ್ದೇ ಇಲ್ಲ.

ಸಿನಿಮಾದ ಮೇಲೆ ಆಸಕ್ತಿ ಬೆಳೆಸಿಕೊಂಡಿದ್ದ ಪಿ.ಸಿ.ಜಾರ್ಜ್ ಅವರು ಪೊಲೀಸ್ ಕೆಲಸಕ್ಕೆ ದೀರ್ಘಾವಧಿ ರಜೆ ಹಾಕಿ ಸುಮಾರು 75ಕ್ಕೂ ಅಧಿಕ ಚಿತ್ರಗಳಲ್ಲಿ ಅಭಿನಯಿಸಿದ್ದರು. ಶನಿವಾರ(ಮೇ 15) ಹುಟ್ಟೂರು ತ್ರಿಶ್ಶೂರ್ ನಲ್ಲಿ ಪಿ.ಸಿ.ಜಾರ್ಜ್ ಅವರ ಅಂತ್ಯಸಂಸ್ಕಾರ ನಡೆಯಲಿದೆ ಎಂದು ವರದಿ ತಿಳಿಸಿದೆ.