Pro Kabaddi: ದಬಾಂಗ್‌ ಡೆಲ್ಲಿಯನ್ನು ಕೆಡವಿದ ಪಾಟ್ನಾ ಪೈರೆಟ್ಸ್‌

Team Udayavani, Nov 1, 2024, 5:31 AM IST

ಹೈದರಾಬಾದ್‌: ಗುರುವಾರದ ಪ್ರೊ ಕಬಡ್ಡಿ ಪಂದ್ಯದಲ್ಲಿ ಅಮೋಘ ಪ್ರದರ್ಶನ ನೀಡಿದ ಪಾಟ್ನಾ ಪೈರೆಟ್ಸ್‌ 44-30 ಅಂತರದಿಂದ ದಬಾಂಗ್‌ ಡೆಲ್ಲಿಯನ್ನು ಕೆಡವಿದೆ. ಇದು 4 ಪಂದ್ಯಗಳಲ್ಲಿ ಪಾಟ್ನಾ ದಾಖಲಿಸಿದ 2ನೇ ಜಯವಾದರೆ, 6 ಪಂದ್ಯಗಳಲ್ಲಿ ಡೆಲ್ಲಿಗೆ ಎದುರಾದ 4ನೇ ಸೋಲು.

ಪಾಟ್ನಾ ಜಯದಲ್ಲಿ ರೈಡರ್‌ಗಳಾದ ದೇವಾಂಕ್‌ ಮತ್ತು ಅಯಾನ್‌ ಅವರ ಪಾತ್ರ ಅಮೋಘವಾಗಿತ್ತು. ಇಬ್ಬರೂ ತಲಾ 12 ಅಂಕ ಗಳಿಸಿದರು. ಡೆಲ್ಲಿ ಪರ ನಾಯಕ ಆಶು ಮಲಿಕ್‌ ಮತ್ತು ರೈಡರ್‌ ವಿನಯ್‌ ತಲಾ 10 ಅಂಕ ತಂದಿತ್ತರು.

ಮುಂಬಾ ಗೆಲುವು
ಭಾರೀ ಜಿದ್ದಾಜಿದ್ದಿಯಿಂದ ಕೂಡಿದ ದ್ವಿತೀಯ ಪಂದ್ಯದಲ್ಲಿ ಯು ಮುಂಬಾ 39-37 ಅಂಕಗಳಿಂದ ಜೈಪುರ್‌ ಪಿಂಕ್‌ ಪ್ಯಾಂಥರ್ ತಂಡವನ್ನು ಪರಾಭವ ಗೊಳಿಸಿತು. ಇದು 4 ಪಂದ್ಯಗಳಲ್ಲಿ ಮುಂಬಾಕ್ಕೆ ಒಲಿದ 2ನೇ ಗೆಲುವು. ಜೈಪುರ್‌ 5 ಪಂದ್ಯಗಳಲ್ಲಿ 2ನೇ ಸೋಲನುಭವಿಸಿತು. ಮುಂಬಾ ಪರ ರೈಡರ್‌ ಅಜಿತ್‌ ಚವಾಣ್‌ 14, ಜೈಪುರ್‌ ಪರ ನೀರಜ್‌ ನರ್ವಾಲ್‌ 12 ಅಂಕ ಗಳಿಸಿದರು.