Putturu: ಬಿಜೆಪಿ ಸದಸ್ಯತ್ವ ಅಭಿಯಾನ: ಕಾಂಗ್ರೆಸ್‌ ಕಾರ್ಯಕರ್ತನಿಂದ ಚಿತ್ರೀಕರಣ; ವಾಗ್ವಾದ

Team Udayavani, Nov 12, 2024, 7:20 AM IST

ಪುತ್ತೂರು: ನಗರಸಭೆಯ ಮುಂಭಾಗದ ಕಿಲ್ಲೆ ಸಂತೆಯ ಸಮೀಪ ಬಿಜೆಪಿ ಸದಸ್ಯತ್ವ ಅಭಿಯಾನ ಮಾಡುತ್ತಿರುವುದನ್ನು ಕಾಂಗ್ರೆಸ್‌ ಕಾರ್ಯಕರ್ತ ವೀಡಿಯೋ ಚಿತ್ರೀಕರಣಕ್ಕೆ ಮುಂದಾಗಿದ್ದಾರೆ ಎನ್ನುವ ವಿಚಾರ ವಾಗ್ವಾದಕ್ಕೆ ಕಾರಣವೆನಿಸಿದೆ.

ಬಿಜೆಪಿ ಸದಸ್ಯತ್ವ ಅಭಿಯಾನ ಪರ್ವದ ವತಿಯಿಂದ ಸೋಮವಾರ ಪುತ್ತೂರು ಸಂತೆ ಬಳಿ ಸದಸ್ಯತ್ವ ಅಭಿಯಾನ ನಡೆದಿತ್ತು. ನಗರಸಭೆಯ ಆವರಣ ಗೋಡೆ ಬದಿಯಲ್ಲಿ ಶಾಮಿಯಾನ ಅಳವಡಿಸಿ ಅಭಿಯಾನ ನಡೆಯುತ್ತಿತ್ತು. ಸದಸ್ಯರಾಗುವವರಿಗೆ ಚಹಾ ವ್ಯವಸ್ಥೆಯನ್ನು ಮಾಡಲಾಗಿತ್ತು. ಇದನ್ನು ಗಮಸಿದ ಕಾಂಗ್ರೆಸ್‌ ಕಾರ್ಯಕರ್ತ ವೀಡಿಯೋ ಚಿತ್ರೀಕರಣ ಮಾಡಿದ್ದಾರೆ. ಈ ಸಂದರ್ಭ ಮೊಬೈಲ್‌ ಎಳೆದು ವೀಡಿಯೋ ಡಿಲೀಟ್‌ ಮಾಡಲು ಯತ್ನಿಸಿರುವ ಆರೋಪ ಮಾಡಲಾಗಿದ್ದು, ಆದರೆ ಈ ಬಗ್ಗೆ ಬಿಜೆಪಿ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.

ಕಾಂಗ್ರೆಸ್‌ ಪ್ರಧಾನ ಕಾರ್ಯದರ್ಶಿ ರವಿಪ್ರಸಾದ್‌ ಶೆಟ್ಟಿ ಬಂದು ಕಾರ್ಯಕರ್ತನ ಸಹಾಯಕ್ಕೆ ನಿಂತಿದ್ದಾರೆ ಎನ್ನಲಾಗಿದೆ. ಸಂತೆಗೆ ಆಗಮಿಸಿದವರನ್ನು ಸದಸ್ಯತ್ವ ಅಭಿಯಾನದಲ್ಲಿ ಭಾಗವಹಿಸುವಂತೆ ಮಾಡಿದ್ದಾರೆಂಬ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ.