ಸ್ಟೆಫ‌ನೋಸ್‌ ಸಿಸಿಪಸ್‌-ಅಲೆಕ್ಸಾಂಡರ್‌ ಜ್ವೆರೇವ್‌ ಸೆಮಿಫೈನಲ್‌ ಶೋ

Team Udayavani, Jun 10, 2021, 12:57 AM IST

ಪ್ಯಾರಿಸ್ : 5 ಹಾಗೂ 6ನೇ ಶ್ರೇಯಾಂಕದ ಟೆನಿಸಿಗರಾದ ಸ್ಟೆಫ‌ನೋಸ್‌ ಸಿಸಿಪಸ್‌ ಮತ್ತು ಅಲೆಕ್ಸಾಂಡರ್‌ ಜ್ವೆರೇವ್‌ ಗುರುವಾರದ ಫ್ರೆಂಚ್‌ ಓಪನ್‌ ಸೆಮಿಫೈನಲ್‌ನಲ್ಲಿ ಮುಖಾಮುಖೀಯಾಗಲಿದ್ದಾರೆ.

ಗ್ರೀಸ್‌ನ ಸಿಸಿಪಸ್‌ ವಿಶ್ವದ ನಂ.2 ಟೆನಿಸಿಗ ರಶ್ಯದ ಡ್ಯಾನಿಲ್‌ ಮೆಡ್ವೆಡೇವ್‌ ಅವರನ್ನು 6-3, 7-6 (7-3), 7-5 ಅಂತರದಿಂದ ಹಿಮ್ಮೆಟ್ಟಿಸುವಲ್ಲಿ ಯಶಸ್ವಿಯಾದರು. ಇದರೊಂದಿಗೆ ಕಳೆದ ಆಸ್ಟ್ರೇಲಿಯನ್‌ ಓಪನ್‌ ಸೆಮಿಫೈನಲ್‌ನಲ್ಲಿ ಅನುಭವಿಸಿದ ಸೋಲಿಗೆ ಸಿಸಿಪಸ್‌ ಸೇಡು ತೀರಿಸಿಕೊಂಡರು. ಜತೆಗೆ ತಮ್ಮ ಗ್ರ್ಯಾನ್‌ಸ್ಲಾಮ್‌ ಕ್ವಾರ್ಟರ್‌ ಫೈನಲ್‌ ದಾಖಲೆಯನ್ನು 4-0 ಅಂತರಕ್ಕೆ ವಿಸ್ತರಿಸಿದರು.

“ಇದೊಂದು ಕ್ಲೋಸ್‌ ಮ್ಯಾಚ್‌ ಆಗಿತ್ತು. ಇಬ್ಬರ ಸರ್ವ್‌ ಕೂಡ ಉತ್ತಮವಾಗಿತ್ತು. ಆಟದ ತೀವ್ರತೆಯನ್ನು ಕಾಯ್ದುಕೊಂಡು ಬಂದಿರುವುದು ಯಶಸ್ಸಿಗೆ ಕಾರಣ’ ಎಂದು ಸಿಸಿಪಸ್‌ ಹೇಳಿದರು.

ಇನ್ನೊಂದು ಕ್ವಾರ್ಟರ್‌ ಫೈನಲ್‌ನಲ್ಲಿ ಅಲೆಕ್ಸಾಂಡರ್‌ ಜ್ವೆರೇವ್‌ ಸ್ಪೇನಿನ ಅಲೆಕ್ಸಾಂಡ್ರೊ ಡೇವಿಡೊವಿಕ್‌ ಅವರನ್ನು 6-4, 6-1, 6-1ರಿಂದ ಸುಲಭದಲ್ಲಿ ಮಣಿಸಿದರು. ಜ್ವೆರೇವ್‌ 1996ರ ಬಳಿಕ ಫ್ರೆಂಚ್‌ ಓಪನ್‌ ಸೆಮಿಫೈನಲ್‌ ತಲುಪಿದ ಮೊದಲ ಜರ್ಮನ್‌ ಆಟಗಾರನೆನಿಸಿದರು. ಅಂದು ಮೈಕಲ್‌ ಸ್ಟಿಕ್‌ ಉಪಾಂತ್ಯ ಪ್ರವೇಶಿಸಿದ್ದರು.