ಮೊಮ್ಮಗಳ ಆತ್ಮಹತ್ಯೆ; ಸಾಹೇಬ್ರು ಇಷ್ಟು ಕಣ್ಣೀರಿಟ್ಟಿದ್ದು ನೋಡಿರಲಿಲ್ಲ;ಕಂಬನಿಯಾದ‌ ಸಿಬ್ಬಂದಿ

Team Udayavani, Jan 29, 2022, 10:42 AM IST

ಬೆಂಗಳೂರು :“ಪಾಪ ಸಾಹೇಬ್ರು ತುಂಬಾನೆ ಅತ್ತು ಬಿಟ್ಟರು. ಅವರು ಕಣ್ಣೀರು ಹಾಕಿದ್ದೇ ನೋಡಿರಲಿಲ್ಲ. ಈ ರೀತಿ ಬಿಕ್ಕಿ ಬಿಕ್ಕಿ ಅತ್ತಿದ್ದು ಇದೇ ಮೊದಲು. ಎಲ್ಲರಿಗೂ ಅಯ್ಯೋ ಅನ್ನಿಸಿಬಿಡ್ತು”……ಮೊಮ್ಮಗಳು ಡಾ.ಸೌಂದರ್ಯ ಆತ್ಮಹತ್ಯೆ ಬಳಿಕ ಮಾಜಿ ಸಿಎಂ ಬಿ.ಎಸ್.ಯಡಿಯೂರಪ್ಪ ಕಣ್ಣೀರಿಟ್ಟಿದ್ದನ್ನು ಕಂಡು ಕಾವೇರಿಯಲ್ಲಿ ಇರುವ ಉದ್ಯೋಗಿಗಳು ಈ‌ ರೀತಿ ನೋವು ತೋಡಿಕೊಂಡಿದ್ದಾರೆ.

ಎಂಥ ವಿಷಮ‌ ಸ್ಥಿತಿಯಲ್ಲೂ ಧೃತಿಗೆಡದ ಯಡಿಯೂರಪ್ಪ ಮೊಮ್ಮಗಳ ಸಾವಿನಿಂದ ಅಕ್ಷರಶಃ ಕುಸಿದು ಹೋಗಿದ್ದರಂತೆ . ಎರಡು ದಿನ‌ ಹಿಂದಿನವರೆಗೂ ತಮ್ಮ ಜತೆಯೇ ಇದ್ದ‌ ಮೊಮ್ಮಗಳು ಆತ್ಮಹತ್ಯೆ ಮಾಡಿಕೊಂಡ ಸುದ್ದಿ ಅವರನ್ನು ತೀವ್ರವಾಗಿ ಕಾಡುತ್ತಿದ್ದು, ಇಷ್ಟೊಂದು ದುಃಖಪಟ್ಟಿದ್ದನ್ನು ಇದುವರೆಗೆ ಯಾರೂ ನೋಡೇ ಇರಲಿಲ್ಲ ಎನ್ನುತ್ತಾರೆ ಸಿಬ್ಬಂದಿ.

ಖಿನ್ನತೆ ಕಾರಣವೇ ? : ಯಡಿಯೂರಪ್ಪ ಆಪ್ತ ಮೂಲದ ಪ್ರಕಾರ ಸೌಂದರ್ಯ ಕುಟುಂಬದಲ್ಲಿ ಯಾವುದೇ ವಿವಾದ ಇರಲಿಲ್ಲ. ಅವರ ಪತಿ ಡಾ.ನೀರಜ್ ತುಂಬಾ ಒಳ್ಳೆಯ ವ್ಯಕ್ತಿ. ಹೆರಿಗೆ ಬಳಿಕ ಕಾಣಿಸಿಕೊಂಡ ಖಿನ್ನತೆಯೇ ಇದಕ್ಕೆ ಕಾರಣ ಎಂದು ಪ್ರತಿಪಾದಿಸುತ್ತಾರೆ.

ಆತ್ಮಹತ್ಯೆಗೆ ಮುನ್ನ ಆ ಮಗುವನ್ನು‌ ಒಮ್ಮೆ ನೆನೆಸಿಕೊಂಡರೆ ಈ ರೀತಿ ಮಾಡುತ್ತಿರಲಿಲ್ಲವೇನೋ ? ಒಳ್ಳೆ ಗೊಂಬೆ ತರ ಇದ್ದ ಮಗುವನ್ನು ನೆನೆಸಿಕೊಂಡರೆ ಬೇಸರವಾಗುತ್ತದೆ. ಇತ್ತೀಚೆಗಂತೂ ಸಾಹೇಬ್ರು ಆ ಮಗುವಿನ‌ ಜತೆಯೇ ಇರುತ್ತಿದ್ದರು ಎಂದು ಸಿಬ್ಬಂದಿ ಬೇಸರ ತೋಡಿಕೊಂಡಿದ್ದಾರೆ.

ಮಹಜರು :
ಪ್ರಕರಣ ಸಂಬಂಧ ಹೈಗ್ರೌಂಡ್ಸ್ ಠಾಣೆ ಪೊಲೀಸರು ಇಂದು ಘಟನಾ ಸ್ಥಳದ ಮಹಜರು ನಡೆಸಲಿದ್ದಾರೆ. ಡಾ.ನೀರಜ್ ಅವರ ಹೇಳಿಕೆ ದಾಖಲಿಸಲಿದ್ದಾರೆ.