ಥರ್ಮಾ, ಪಲ್ಸ್‌ ಆಕ್ಸಿಮೀಟರ್‌ ಬೆಲೆ ಇಳಿಕೆ : 5 ಸಾಧನಗಳ ಗರಿಷ್ಠ ದರ ಮಿತಿ ನಿಗದಿ

Team Udayavani, Jul 25, 2021, 7:10 AM IST

ಹೊಸದಿಲ್ಲಿ : ಕೊರೊನಾ ಕಾಲದಲ್ಲಿ ಅತೀ ಹೆಚ್ಚು ಮಾರಾಟವಾದ ವೈದ್ಯಕೀಯ ಸಾಧನಗಳಾದ ಥರ್ಮಾಮೀಟರ್‌, ಪಲ್ಸ್‌ ಆಕ್ಸಿಮೀಟರ್‌ ಬೆಲೆ ಇನ್ನು ಕಡಿಮೆಯಾಗಲಿದೆ. ರಾಷ್ಟ್ರೀಯ ಫಾರ್ಮಾಸುಟಿಕಲ್‌ ಪ್ರೈಸಿಂಗ್‌ ಅಥಾರಿಟಿ (ಎನ್‌ಪಿಪಿಎ) ಈ ಸಂಬಂಧ ಮಹತ್ವದ ನಿರ್ಧಾರ ತೆಗೆದುಕೊಂಡಿದ್ದು, ಐದು ವೈದ್ಯಕೀಯ ಸಾಧನಗಳ ಗರಿಷ್ಠ ಮಾರಾಟ ದರವನ್ನು ನಿಗದಿ ಮಾಡಿದೆ.

ಥರ್ಮಾ ಮೀಟರ್‌, ಪಲ್ಸ್‌ ಆಕ್ಸಿಮೀಟರ್‌, ಬ್ಲಡ್‌ ಪ್ರಶರ್‌ ಮಾನಿಟರಿಂಗ್‌ ಮೆಶಿನ್‌, ನೆಬ್ಯುಲೈಸರ್‌, ಗ್ಲೂಕೋ ಮೀಟರ್‌ ಬೆಲೆ ಶೇ. 88ರಷ್ಟು ಕಡಿಮೆಯಾಗಲಿದೆ. ಜು. 20ರಿಂದಲೇ ಪೂರ್ವಾನ್ವಯವಾಗುವಂತೆ ಈ ಬೆಲೆ ಜಾರಿಯಾಗಬೇಕು ಎಂದು ಸೂಚಿಸಲಾಗಿದೆ. ಸದ್ಯ ದೇಶದಲ್ಲಿ 684 ಬ್ರ್ಯಾಂಡ್‌ ಗಳಿದ್ದು, 620 ಬ್ರ್ಯಾಂಡ್‌ ಗಳು ಬೆಲೆ ಕಡಿಮೆ ಮಾಡಲು ಒಪ್ಪಿಗೆ ನೀಡಿವೆ ಎಂದು ಕೇಂದ್ರ ರಾಸಾಯನಿಕ ಸಚಿವಾಲಯ ಹೇಳಿದೆ.

ಆಮದಿತ ಪಲ್ಸ್‌ ಆಕ್ಸಿಮೀಟರ್‌ನ ಫಿಂಗರ್‌ ಟಿಪ್‌ ಘಟಕಕ್ಕೆ 5,150 ರೂ., ಇತರ ಪಲ್ಸ್‌ ಆಕ್ಸಿ ಮೀಟರ್‌ಗೆ 2,95,375 ರೂ., ಬಿಪಿ ಮಾನಿಟರಿಂಗ್‌ ಮೆಶಿನ್‌ಗೆ 6,495 ರೂ., ನೆಬ್ಯುಲೈಸರ್‌ಗೆ 15,175 ರೂ., ಡಿಜಿಟಲ್‌ ಥರ್ಮಾಮೀಟರ್‌ಗೆ 5,360 ರೂ., ಗ್ಲುಕೋ ಮೀಟರ್‌ಗೆ 1,500 ರೂ. ಗಳಷ್ಟು ಬೆಲೆ ಇಳಿಕೆಯಾಗಿದೆ.