ಟೋಕಿಯೊ ಒಲಿಂಪಿಕ್ಸ್‌ಗೆ ಆಯ್ಕೆಯಾದ ಮನುಗೆ ಶೂಟಿಂಗ್‌ ನಡುವೆಯೇ ಪರೀಕ್ಷಾ ಸವಾಲು!

Team Udayavani, May 17, 2021, 6:40 AM IST

ಹೊಸದಿಲ್ಲಿ : ಟೋಕಿಯೊ ಒಲಿಂಪಿಕ್ಸ್‌ಗೆ ಆಯ್ಕೆಯಾಗಿ ಈಗ ಕ್ರೊವೇಶಿಯಾದಲ್ಲಿ ತರಬೇತಿಗೆ ತೆರಳಿರುವ ಶೂಟರ್‌ ಮನು ಭಾಕರ್‌ ಅವರಿಗೆ ಹೆಚ್ಚುವರಿ ಜವಾಬ್ದಾರಿಯೊಂದಿದೆ. ಅದು ಬಿಎ 4ನೇ ಸೆಮಿಸ್ಟರ್‌ ಎಕ್ಸಾಮ್‌ ಬರೆಯುವುದು!

ಈ ಪರೀಕ್ಷೆಯನ್ನು ಅವರು ಕ್ರೊವೇಶಿಯಾದಿಂದಲೇ ಬರೆಯಬೇಕಾದುದು ಅನಿವಾರ್ಯವಾಗಿದೆ. ಹೀಗಾಗಿ ಸದ್ಯ ಶೂಟಿಂಗ್‌ ಅಭ್ಯಾಸದ ಜತೆ ಜತೆಯಲ್ಲೇ ಪರೀಕ್ಷಾ ಸಿದ್ಧತೆಯನ್ನೂ ಮಾಡಿಕೊಳ್ಳುತ್ತಿದ್ದಾರೆ ಮನು ಭಾಕರ್‌. ಎಕ್ಸಾಮ್‌ ಬರೆದ (ಮೇ 18) ಎರಡೇ ದಿನಗಳಲ್ಲಿ ಯುರೋಪಿಯನ್‌ ಚಾಂಪಿಯನ್‌ಶಿಪ್‌ ಶೂಟಿಂಗ್‌ ಸ್ಪರ್ಧೆ ಆರಂಭವಾಗಲಿದೆ (ಮೇ 20).

19 ವರ್ಷದ ಮನು ಡೆಲ್ಲಿ ಯುನಿವರ್ಸಿಟಿಯ ಪ್ರತಿಷ್ಠಿತ “ಲೇಡಿ ಶ್ರೀ ರಾಮ್‌ ಕಾಲೇಜ್‌’ನ ವಿದ್ಯಾರ್ಥಿನಿಯಾಗಿದ್ದಾರೆ.

“ಎರಡನ್ನೂ ನಿಭಾಯಿಸುವೆ’
“ನಾನು ಎರಡನ್ನೂ ನಿಭಾ ಯಿಸಬಲ್ಲೆ. ಹಿಂದೆಯೂ ಇಂಥ ಜಂಟಿ ಸವಾಲು ನನಗೆ ಎದುರಾಗಿತ್ತು. ಎಕ್ಸಾಮ್‌ ದಿನ ಯಾವುದೇ ಸ್ಪರ್ಧೆ ಇಲ್ಲದ ಕಾರಣ ಸಮಸ್ಯೆ ಇಲ್ಲ. ಮೊಬೈಲ್‌ ಸ್ಕ್ಯಾನರ್‌ ಮೂಲಕ ಉತ್ತರ ಪತ್ರಿಕೆಗಳನ್ನು ರವಾನಿಸುತ್ತೇನೆ’ ಎಂದು ಮನು ಭಾಕರ್‌ ತುಂಬು ಆತ್ಮವಿಶ್ವಾಸದಲ್ಲಿ ಹೇಳಿದ್ದಾರೆ.

ಮೊದಲ ಆಯ್ಕೆ ಶೂಟಿಂಗ್‌
“ಮನು ವಿದ್ಯಾಭ್ಯಾಸವನ್ನು ಬಹಳ ಗಂಭೀರವಾಗಿ ತೆಗೆದುಕೊಳ್ಳುತ್ತಾಳೆ. ಆದರೆ ಎಕ್ಸಾಮ್‌ ಮತ್ತು ಕಾಂಪಿಟೀಶನ್‌ ಒಂದಕ್ಕೊಂದು ಕ್ಲಾ$Âಶ್‌ ಆಗುವುದಿದ್ದರೆ ಆಕೆಯ ಮೊದಲ ಆಯ್ಕೆ ಶೂಟಿಂಗ್‌…’ ಎಂಬುದು ತಂದೆ ರಾಮ್‌ಕಿಶನ್‌ ಭಾಕರ್‌ ಅವರ ಹೇಳಿಕೆ.