US Consulate: ಬೆಂಗಳೂರಲ್ಲಿ ಜ.17ಕ್ಕೆ ಅಮೆರಿಕ ದೂತಾವಾಸ ಕಚೇರಿ ಆರಂಭ

Team Udayavani, Jan 15, 2025, 11:17 PM IST

ಬೆಂಗಳೂರು: ರಾಜಧಾನಿ ಬೆಂಗಳೂರಿನಲ್ಲಿ ಅಮೆರಿಕದ ದೂತಾವಾಸ (ಕಾನ್ಸುಲೇಟ್‌) ಕಚೇರಿ ಶುರುವಾಗಬೇಕು ಎಂಬ ಬಹುಕಾಲದ ಬೇಡಿಕೆ ಕೊನೆಗೂ ಈಡೇರಿದೆ. ಜ.17ರಂದು ಕಚೇರಿ ಆರಂಭವಾಗುವ ಬಗ್ಗೆ ಬೆಂಗಳೂರು ದಕ್ಷಿಣ ಸಂಸದ ತೇಜಸ್ವಿ ಸೂರ್ಯ ಎಕ್ಸ್‌ ಖಾತೆಯಲ್ಲಿ ಮಾಹಿತಿ ಹಂಚಿಕೊಳ್ಳುವ ಜೊತೆಗೆ ವಿದೇಶಾಂಗ ಸಚಿವ ಜೈಶಂಕರ್‌ ಅವರಿಗೆ ಶುಭಾಶಯವನ್ನೂ ಕೋರಿದ್ದಾರೆ.

ಬೆಂಗಳೂರಿನಲ್ಲಿ ಅಮೆರಿಕದ ದೂತಾವಾಸ ಕಚೇರಿ ಆರಂಭಿಸಿದ್ದಕ್ಕೆ ಸಂಸದ ತೇಜಸ್ವಿ ಸೂರ್ಯ ದಿಲ್ಲಿಯ ವಿದೇಶಾಂಗ ಸಚಿವಾಲಯದಲ್ಲಿ ಜೈ ಶಂಕರ್‌ ಅವರನ್ನು ಭೇಟಿಯಾಗಿ ಧನ್ಯವಾದಗಳ ಸಲ್ಲಿಸಿ ರಾಜ್ಯದ ಹೆಮ್ಮೆಯ ಸಿಹಿತಿಂಡಿಯಾದ “ಮೈಸೂರು ಪಾಕ್‌ “ನೀಡಿದರು. ಈ ವೇಳೆ ವಿದೇಶಾಂಗ ಸಚಿವ ಜೈ ಶಂಕರ್‌ ಮಾತನಾಡಿ ವೈಯಕ್ತಿಕವಾಗಿ ಬೆಂಗಳೂರು ಹಾಗೂ ಅಲ್ಲಿನ ಜನರೊಂದಿಗೆ ನಾನು ವಿಶೇಷ ಭಾವನೆಗಳ ಹೊಂದಿದ್ದೇನೆ. ಅಮೆರಿಕ ಕಾನ್ಸಲೇಟ್‌ ಆರಂಭಿಸುವ ಬಗ್ಗೆ ಉತ್ಸುಕನಾಗಿದ್ದೆ. ಇದರ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳುವೆ. ಈ ಸಂದರ್ಭದಲ್ಲಿ ಕಾನ್ಸುಲೇಟ್‌ ಬಗೆಗಿನ ಪ್ರಾಮುಖ್ಯತೆ ಬಗ್ಗೆ ಮಾತನಾಡಲಿದ್ದೇನೆ. ಇದೊಂದು ಪ್ರಮುಖ ಮೈಲುಗಲ್ಲು, ಬೆಂಗಳೂರಿಗೆ ಅರ್ಹವಾಗಿಯೇ ಈ ಕಾನ್ಸುಲೇಟ್‌ ಲಭ್ಯವಾಗಿದೆ ಎಂದು ಹೇಳಿದರು.

ಖಾಸಗಿ ಹೋಟೆಲಿನಲ್ಲಿ ಕಚೇರಿ ತಾತ್ಕಾಲಿಕವಾಗಿ ಆರಂಭ:
ಬೆಂಗಳೂರಿನ ಖಾಸಗಿ ಹೋಟೆಲೊಂದರಲ್ಲಿ ತಾತ್ಕಾಲಿಕ ನೆಲೆಯಲ್ಲಿ ಕಚೇರಿ ಶುರುವಾಗಲಿದೆ. ಇದರಿಂದಾಗಿ ವೀಸಾ ಸಂದರ್ಶನ, ಅನುಮೋದನೆ ಸೇರಿದಂತೆ ಪ್ರಮುಖ ವಿಚಾರಗಳಿಗೆ ಹೈದರಾಬಾದ್‌ ಅಥವಾ ಚೆನ್ನೈಗೆ ಕರ್ನಾಟಕದವರು ಪ್ರಯಾಣಿಸುವ ಅನಿವಾರ್ಯತೆ ತಪ್ಪಲಿದೆ. ಬೆಂಗಳೂರಿನ ವಿಠಲ್‌ ಮಲ್ಯ ರಸ್ತೆಯಲ್ಲಿರುವ ಜೆ.ಡಬ್ಲ್ಯು.ಮಾರಿಯೆಟ್‌ ಹೋಟೆಲ್‌ನಲ್ಲಿ ದೂತಾವಾಸ ಕಚೇರಿ ತಾತ್ಕಾಲಿಕ ನೆಲೆಯಲ್ಲಿ ಆರಂಭವಾಗಲಿದೆ. ಅಲ್ಲಿಂದಲೇ ಅಮೆರಿಕದ ವಾಣಿಜ್ಯ ಸೇವೆಗಳ ವಿಭಾಗ (ಯುಎಸ್‌ಸಿಎಸ್‌) ಕಾರ್ಯನಿರ್ವಹಿಸುತ್ತಿದೆ. ಉದ್ಯಾನನಗರಿಯ ಯಾವ ಭಾಗದಲ್ಲಿ ಕಚೇರಿ ಆರಂಭವಾಗಲಿದೆ ಎಂಬ ಬಗ್ಗೆ ಇನ್ನೂ ಸ್ಪಷ್ಟತೆ ಸಿಕ್ಕಿಲ್ಲ.

My dear Bengaluru,

It’s official. The US Consulate is opening on January 17th.

It’s been made possible only and only because of PM @narendramodi and EAM @DrSJaishankar’s efforts.

What better way to thank our EAM than with our own Mysuru Pak! pic.twitter.com/uo85y2vsfl

— Tejasvi Surya (@Tejasvi_Surya) January 15, 2025