ಅತ್ತ ದರಿ, ಇತ್ತ ಪುಲಿ.. ಹೀಗಿದೆ ಉಕ್ರೇನ್‌ ಪರಿಸ್ಥಿತಿ

Team Udayavani, Feb 27, 2022, 7:55 AM IST

ಕೀವ್‌: ಒಂದು ಕಡೆ, ದೇಶದ ಗಡಿ ಪ್ರಾಂತ್ಯಗಳಲ್ಲಿನ ನಗರಗಳ ಮೇಲೆ ರಷ್ಯಾ ಪಡೆಗಳಿಂದ ದಾಳಿ… ಮತ್ತೊಂದು ಕಡೆ, ದೇಶದಲ್ಲಿ ಕೊರೊನಾ ಸೋಂಕು ಹಾಗೂ ಆರೋಗ್ಯ ಕ್ಷೇತ್ರದ ಮೂಲಸೌಕರ್ಯಕ್ಕೆ ಸಂಬಂಧಿಸಿದ ಸವಾಲುಗಳು. ಹೀಗೆ, ಉಕ್ರೇನ್‌ ರಾಷ್ಟ್ರದ ಪರಿಸ್ಥಿತಿ, ಅತ್ತ ದರಿ, ಇತ್ತ ಪುಲಿ ಎಂಬಂತಾಗಿದೆ.

ಯುದ್ಧ ಶುರುವಾದಾಗ ಕೊರೊನಾ ಇನ್ನೂ ನಿಯಂತ್ರಣಕ್ಕೆ ಬಂದಿರಲಿಲ್ಲ. ಅದನ್ನು ನಿಭಾಯಿಸುವುದೇ ಕಷ್ಟಕರ ಎಂಬಂತಾಗಿತ್ತು. ಈಗ ದಿಢೀರನೆ ಯುದ್ಧ ಪ್ರತ್ಯಕ್ಷವಾಗಿದೆ. ಫೆ. 24ರಂದು ರಷ್ಯಾ ದಾಳಿ ಆರಂಭಿಸಿತು. ಏಳು ದಿನಗಳ ಮುಂದೆ, ಉಕ್ರೇನ್‌ನಲ್ಲಿ ಕೊರೊನಾ ಸಾವಿನ ಸಂಖ್ಯೆ 26,740ರಷ್ಟಿತ್ತು. ಕೇವಲ 4.4 ಕೋಟಿ ಜನಸಂಖ್ಯೆಯಿರುವ ಉಕ್ರೇನ್‌ ರಾಷ್ಟಕ್ಕೆ ಇದು ದೊಡ್ಡ ಸಂಖ್ಯೆ.

ಇನ್ನು, ಲಸಿಕೆ ವಿಚಾರಕ್ಕೆ ಬರುವುದಾದರೆ, ದೇಶದ ಶೇ. 35.6ರಷ್ಟು ಜನರಿಗೆ ಕೊರೊನಾ ಲಸಿಕೆಯ ಮೊದಲ ಡೋಸ್‌ ನೀಡಲಾಗಿದೆ. ಎರಡನೇ ಡೋಸ್‌ ಪಡೆದವರ ಪ್ರಮಾಣ ಶೇ. 34.3ರಷ್ಟಿದೆ. ಬೂಸ್ಟರ್‌ ಡೋಸ್‌ ಪಡೆದವರ ಪ್ರಮಾಣ ಶೇ. 1.6ರಷ್ಟಿದೆ.

ಇನ್ನು, ಕೊರೊನಾದಿಂದ ಸಾವಿಗೀಡಾದವರ ಸಂಖ್ಯೆ ಹೆಚ್ಚಾಗಿರುವ ದೇಶಗಳಲ್ಲಿ ಉಕ್ರೇನ್‌ ಕೂಡ ಒಂದು. ಉಕ್ರೇನ್‌ ವಿರೋಧಿ ಬಂಡುಕೋರರ ಹಿಡಿತದಲ್ಲಿದ್ದ ಡೊನೆಟ್ಸ್‌ ಹಾಗೂ ಲುಹಾನ್ಸ್ಕ್ ಗಳಲ್ಲಿಯೂ ಸಾವಿನ ಸಂಖ್ಯೆ ಅಧಿಕವಾಗಿತ್ತು.

ಹೀಗಾಗಿ, ಕೊರೊನಾ ನಿಯಂತ್ರಿಸು ಹೈರಾಣಾಗಿದ್ದ ಉಕ್ರೇನ್‌ನ ತನ್ನ ಬಜೆಟ್‌ನಲ್ಲಿ ಗಣನೀಯ ಮೊತ್ತವನ್ನು ಆರೋಗ್ಯ ಇಲಾಖೆಗೆ ನೀಡುತ್ತಿತ್ತು. ಆದರೆ, ಅದರ ಜೊತೆಯಲ್ಲೇ ಈವರೆಗೆ 137 ಉಕ್ರೇನಿಯನ್ನರು ಜೀವ ತೆತ್ತಿದ್ದಾರೆ. ಯುದ್ಧ ಮುಂದುವರಿದಂತೆಲ್ಲಾ ಸಾವಿನ ಸಂಖ್ಯೆಯೂ ಹೆಚ್ಚಾಗಲಿದೆ.