ಗ್ರೇಟ್ ಫ್ರೆಂಡ್ ಪ್ರಧಾನಿ ಮೋದಿ, ಥ್ಯಾಂಕ್ಯೂ…ಸಬರಮತಿ ಸಂದರ್ಶಕರ ಪುಸ್ತಕದಲ್ಲಿ ಟ್ರಂಪ್

Team Udayavani, Feb 24, 2020, 1:33 PM IST

ಅಹಮದಾಬಾದ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸೋಮವಾರ ಪ್ರಧಾನಿ ನರೇಂದ್ರ ಮೋದಿ ಜತೆಗೂಡಿ ಸಬರ್ ಮತಿ ಆಶ್ರಮಕ್ಕೆ ಭೇಟಿ ನೀಡಿದರು. ಈ ವೇಳೆ ಟ್ರಂಪ್ ದಂಪತಿಗೆ ಮೋದಿಯೇ ಆಶ್ರಮ, ಚರಕ, ಗಾಂಧಿ ಕುರಿತು ವಿವರಣೆ ನೀಡಿದರು.

ಸಬರಮತಿ ಆಶ್ರಮಕ್ಕೆ ಭೇಟಿ ನೀಡಿದ ಟ್ರಂಪ್ ಸಂದರ್ಶಕರ ಪುಸ್ತಕದಲ್ಲಿ ತಮ್ಮ ಸಂದೇಶವನ್ನು ದಾಖಲಿಸಿದರು. “ಟು ಮೈ ಗ್ರೇಟ್ ಫ್ರೆಂಡ್ ಪ್ರಧಾನಿ ನರೇಂದ್ರ ಮೋದಿ, ಥ್ಯಾಂಕ್ಯೂ ಫಾರ್ ದಿಸ್ ವಂಡರ್ ಫುಲ್ ವಿಸಿಟ್ ಎಂದು ಸಂದೇಶ ಬರೆದು ಟ್ರಂಪ್ ಸಹಿ ಮಾಡಿದ್ದಾರೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹಾಗೂ ಪತ್ನಿ ಮೆಲಾನಿಯಾ ಟ್ರಂಪ್ ಭಾರತಕ್ಕೆ ಎರಡು ದಿನಗಳ ಕಾಲ ಭೇಟಿ ನೀಡಿದ್ದು, ಸೋಮವಾರ ರೋಡ್ ಶೋ ಮೂಲಕ ಆಗಮಿಸಿ ಸಬರಮತಿ ಆಶ್ರಮಕ್ಕೆ ಭೇಟಿ ನೀಡಿದರು.

ಸಬರಮತಿ ಆಶ್ರಮದಲ್ಲಿ ಟ್ರಂಪ್ ದಂಪತಿ ಚರಕದಲ್ಲಿ ನೂಲನ್ನು ನೇಯ್ದಿದ್ದರು. ಈ ಕುರಿತು ಪ್ರಧಾನಿ ಮೋದಿ ಹಾಗೂ ಆಶ್ರಮದ ಹಿರಿಯ ಗೈಡ್ ಮಾಹಿತಿ ನೀಡಿದ್ದರು. ನಂತರ ಟ್ರಂಪ್ ಹಾಗೂ ಮೋದಿ ಮೊಟೆರಾ ಸ್ಟೇಡಿಯಂನತ್ತ ಆಗಮಿಸಿದರು.