1 ಕೋ.ರೂ. ಬಾಳೆಹಣ್ಣು ತಿಂದ ವಿದ್ಯಾರ್ಥಿ!

Team Udayavani, May 4, 2023, 7:58 AM IST

ಸಿಯೋಲ್‌: ಒಂದು ಪಚ್ಚಬಾಳೆಹಣ್ಣಿಗೆ ಗರಿಷ್ಠವೆಂದರೆ ಎಷ್ಟು ರೂ.ಗಳಾಗಬಹುದು? ಪಂಚತಾರಾ ಹೋಟೆಲ್‌ಗ‌ಳಾದರೆ 100 ರೂ. ಹೇಳಬಹುದೇನೋ? ದ.ಕೊರಿಯದಲ್ಲಿ ನೊಹ್‌ ಹಯ್ನ ಸೂ ಎಂಬ ವಿದ್ಯಾರ್ಥಿಯೊಬ್ಬ 1 ಕೋಟಿ ರೂ. ಮೌಲ್ಯದ ಬಾಳೆಹಣ್ಣನ್ನು ತಿಂದುಬಿಟ್ಟಿದ್ದಾನೆ! ಇದು ದೊಡ್ಡಸುದ್ದಿಯಾಗಿದೆ. ಇದು ಹೇಗೆ ಸಾಧ್ಯ ಎಂಬ ಪ್ರಶ್ನೆಗಳು ನಿಮ್ಮ ತಲೆಯೊಳಗೆ ಸುತ್ತುತ್ತಿರಬಹುದು.

ಅದಕ್ಕೆ ಇಲ್ಲಿದೆ ಉತ್ತರ. ದಕ್ಷಿಣ ಕೊರಿಯಾದ ಲೀಯುಮ್‌ ಚಿತ್ರಶಾಲೆಯಲ್ಲಿ ಚಿತ್ರಕಲಾಕೃತಿಗಳ ಪ್ರದರ್ಶನ ನಡೆಯುತ್ತಿತ್ತು. ಅಲ್ಲಿ ಮೌರಿಜಿಯೊ ಕ್ಯಾಟೆಲಾನ್‌ ಎಂಬ ಕಲಾವಿದ ಒಂದು ಬಾಳೆಹಣ್ಣನ್ನು ನಲ್ಲಿ ಟೇಪ್‌ನಿಂದ ಗೋಡೆಗೆ ಅಂಟಿಸಿದ್ದ. ಇದೂ ಒಂದು ಕಲಾಕೃತಿ! ಇದರ ಬೆಲೆ 1 ಕೋಟಿ ರೂ. ಅಷ್ಟರಲ್ಲಿ ಅಲ್ಲಿಗೆ ಬಂದ ನೊಹ್‌ ಸೂಗೆ ಸಿಕ್ಕಾಪಟ್ಟೆ ಹಸಿವಾಗಿತ್ತು. ಅವನಿಗೆ ಉಳಿದಿದ್ದು ಹೊಳೆಯಲಿಲ್ಲ. ಸುಮ್ಮನೆ ಬಾಳೆಹಣ್ಣನ್ನು ತಿಂದು ಸಿಪ್ಪೆಯನ್ನು ಅದೇ ಟೇಪ್‌ಗೆ ಅಂಟಿಸಿ ಜಾಗ ಖಾಲಿ ಮಾಡಿದ. ವಿಷಯ ಕೇಳಿ ಮೌರಿಜಿಯೊ ಕ್ಯಾಟೆಲಾನ್‌ ಕೂಡ ಹೋಗಲಿಬಿಡಿ ಏನು ಮಾಡಲಿಕ್ಕಾಗುತ್ತೆ ಎಂದು ಸುಮ್ಮನಾಗಿದ್ದಾರಂತೆ.