Odisha: 13 ಶವಗಳು ಕುಟುಂಬಕ್ಕೆ ಹಸ್ತಾಂತರ

Team Udayavani, Jul 3, 2023, 7:06 AM IST

ಭುವನೇಶ್ವರ: ಬಾಲಾಸೋರ್‌ ರೈಲ್ವೆ ಅಪಘಾತದಲ್ಲಿ ಮೃತಪಟ್ಟವರ ಪೈಕಿ 13 ಮಂದಿಯ ಮೃತದೇಹವನ್ನು ಅವರವರ ಕುಟುಂಬಕ್ಕೆ ಹಸ್ತಾಂತರಿಸಲಾಗಿದೆ ಎಂದು ಅಧಿಕಾರಿಗಳು ಭಾನುವಾರ ತಿಳಿಸಿದ್ದಾರೆ. ಗುರುತು ಪತ್ತೆಹಚ್ಚಲಾಗದ ಸ್ಥಿತಿಯಲ್ಲಿ ಇದ್ದಂಥ ಮೃತದೇಹಗಳ ಪೈಕಿ 29 ಮೃತದೇಹಗಳನ್ನು ಡಿಎನ್‌ಎ ಮಾದರಿಗಳ ಸಹಾಯದಿಂದ ಪತ್ತೆಹಚ್ಚಲಾಗಿದೆ. ಈ ಪೈಕಿ 6 ಮೃತದೇಹಗಳನ್ನು ಶುಕ್ರವಾರವೇ ಅವರವರ ಕುಟುಂಬಸ್ಥರಿಗೆ ಒಪ್ಪಿಸಲಾಗಿದೆ.

ಶನಿವಾರ ಮತ್ತೆ 13 ಮಂದಿಯ ಮೃತದೇಹಗಳನ್ನು ಕುಟುಂಬಸ್ಥರಿಗೆ ಹಸ್ತಾಂತರಿಸಿದ್ದೇವೆ ಎಂದು ರೈಲ್ವೆ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. 13 ಮೃತದೇಹಗಳ ಪೈಕಿ 4 ಮೃತದೇಹಗಳು ಬಿಹಾರ ಮೂಲದ ಪ್ರಯಾಣಿಕರದ್ದಾಗಿದ್ದು, 1 ಜಾರ್ಖಂಡ್‌ ಹಾಗೂ 8 ಮೃತದೇಹಗಳು ಪಶ್ಚಿಮ ಬಂಗಾಳದ ಪ್ರಯಾಣಿಕರದ್ದಾಗಿತ್ತು ಎಂದೂ ತಿಳಿಸಿದ್ದಾರೆ.