ಫೇಸ್‌ಬುಕ್‌ ಮೂಲಕ ಪರಿಚಯಿಸಿಕೊಂಡು 4.5 ಲಕ್ಷ ರೂ. ವಂಚನೆ

Team Udayavani, Apr 20, 2023, 6:20 AM IST

ಮಂಗಳೂರು: ತನ್ನನ್ನು ವೈದ್ಯೆ ಎಂದು ಫೇಸ್‌ಬುಕ್‌ನಲ್ಲಿ ಪರಿಚಯಿಸಿಕೊಂಡು 4.5 ಲಕ್ಷ ರೂ. ವಂಚನೆ ಮಾಡಿರುವ ಕುರಿತಂತೆ ಸೆನ್‌ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ದೂರುದಾರರಿಗೆ ಮಾ. 21ರಂದು ಫೇಸ್‌ಬುಕ್‌ನಲ್ಲಿ ಡಾ| ಕತ್ರೀನಾ ರೊಬರ್ಟ್‌ ಯು.ಕೆ. ಎಂಬ ಹೆಸರಿನ ಫ್ರೆಂಡ್‌ ರಿಕ್ವೆಸ್ಟ್‌ ಬಂದಿದೆ. ಅವರು ಅದನ್ನು ಎಕ್ಸೆಪ್ಟ್ ಮಾಡಿ ಪರಸ್ಪರ ಚಾಟ್‌ ಮಾಡಿಕೊಂಡಿದ್ದರು. ತನ್ನನ್ನು ಡಾಕ್ಟರ್‌ ಎಂದು ಪರಿಚಯಿಸಿ, ಭಾರತವನ್ನು ನೋಡಬೇಕು ಎಂದು ತಿಳಿಸಿದ್ದಾರೆ. ಬಳಿಕ ವಾಟ್ಸ್‌ ಆ್ಯಪ್‌ ನಂಬರ್‌ ಕೇಳಿದ್ದು, ದೂರುದಾರರು ನೀಡಿದ್ದರು. ಎ. 12ರಂದು ಭಾರತಕ್ಕೆ ಬರುವುದಾಗಿಯೂ ತಿಳಿಸಿದ್ದಾರೆ.

ಅದರಂತೆ ಎ. 12ರಂದು ದೂರವಾಣಿ ಕರೆಯೊಂದು ಬಂದಿದ್ದು, ಕರೆ ಮಾಡಿದ ವ್ಯಕ್ತಿ ತನ್ನನ್ನು ವಿಮಾನ ನಿಲ್ದಾಣದ ಅಧಿಕಾರಿ ಎಂದು ಪರಿಚಯಿಸಿದ್ದಾನೆ. ಡಾ| ಕತ್ರೀನಾ ರೊಬರ್ಟ್‌ ಅವರು ನಿಲ್ದಾಣದಕ್ಕೆ ಬಂದಿದ್ದು, ಅವರಲ್ಲಿ ಟ್ರಾವೆಲ್‌ ಚೆಕ್‌ ಇದೆ, ಪೇಮೆಂಟ್‌ ಮಾಡಲು ಹಣ ಇಲ್ಲ. ಹಣ ಪಾವತಿಸದಿದ್ದರೆ ಅವರನ್ನು ವಾಪಸು ಅವರ ದೇಶಕ್ಕೆ ಕಳುಹಿಸಲಾಗುತ್ತದೆ. ನೀವು ಅವರ ಗಾರ್ಡಿಯನ್‌ ಆಗಿರುವುದರಿಂದ ನೀವೇ ಹಣ ಪಾವತಿಸಬೇಕು. ಕತ್ರೀನಾ ಅವರು ಸ್ವದೇಶಕ್ಕೆ ಹೋದ ಮೇಲೆ ಹಣ ವಾಪಸು ನೀಡುವುದಾಗಿ ಹೇಳಿದ್ದಾರೆ ಎಂದು ತಿಳಿಸಿದ್ದಾನೆ. ಬಳಿಕ ಹಣ ನೀಡುವಂತೆ ಒತ್ತಡ ತಂದಿದ್ದಾನೆ. ವ್ಯಕ್ತಿ ನೀಡಿದ ಅಕೌಂಟ್‌ಗೆ 4 ಲಕ್ಷ ರೂ. ಮತ್ತು 50 ಸಾವಿರ ರೂ.ಮೊತ್ತವನ್ನು ಹಂತ ಹಂತವಾಗಿ ವರ್ಗಾವಣೆ ಮಾಡಿದ್ದಾರೆ.

ಬಳಿಕ ಆ ವ್ಯಕ್ತಿ, ಮಹಿಳೆ ಕಡೆಯಿಂದ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ. ಅನಧಿಕೃತವಾಗಿ ಹಣ ವರ್ಗಾಯಿಸಿಕೊಂಡ ಆರೋಪಿತರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ದೂರುದಾರರು ಆಗ್ರಹಿಸಿದ್ದಾರೆ.