ಸೋಲಾರ್‌ ಹಗರಣದ ಆರೋಪಿ ಸರಿತಾ ನಾಯರ್‌ಗೆ 6 ವರ್ಷ ಜೈಲು

Team Udayavani, Apr 27, 2021, 9:20 PM IST

ಕಲ್ಲಿಕೋಟೆ: ಕೇರಳದಲ್ಲಿ ಕಾಂಗ್ರೆಸ್‌ ನೇತೃತ್ವದ ಯುಡಿಎಫ್ ಸರ್ಕಾರದ ಅವಧಿಯಲ್ಲಿ ಭಾರೀ ಸದ್ದು ಮಾಡಿದ್ದ ಸೌರ ಫ‌ಲಕ ಹಗರಣಕ್ಕೆ ಸಂಬಂಧಿಸಿದ ವಂಚನೆ ಪ್ರಕರಣವೊಂದರಲ್ಲಿ ಸರಿತಾ ಎಸ್‌. ನಾಯರ್‌ ಅವರಿಗೆ 6 ವರ್ಷಗಳ ಕಠಿಣ ಜೈಲು ಶಿಕ್ಷೆ ವಿಧಿಸಿ ಇಲ್ಲಿನ ಕೋರ್ಟ್‌ ಮಂಗಳವಾರ ತೀರ್ಪು ನೀಡಿದೆ.

ಸೋಲಾರ್‌ ಹಗರಣದಲ್ಲಿ ಸರಿತಾ ಅವರು ಎರಡನೇ ಆರೋಪಿಯಾಗಿದ್ದಾರೆ. ವಂಚನೆ ಸೇರಿದಂತೆ 4 ವಿವಿಧ ಅಪರಾಧಗಳಿಗೆ ಸಂಬಂಧಿಸಿ ಕೋರ್ಟ್‌ ತೀರ್ಪು ನೀಡಿದೆ. ಜತೆಗೆ, ನಾಲ್ಕೂ ಅಪರಾಧಗಳಿಗೆ ತಲಾ 10 ಸಾವಿರ ರೂ.ಗಳಂತೆ ಒಟ್ಟು 40 ಸಾವಿರ ರೂ. ದಂಡ ಪಾವತಿಸುವಂತೆಯೂ ಸೂಚಿಸಿದೆ.

ಇದನ್ನೂ ಓದಿ :ಪ್ಲೀಸ್ ನಮ್ಮ ಜನರ ಹಸಿವು ನೀಗಿಸಿ : ಭಾವುಕರಾದ ನಟಿ ಶಿಲ್ಪಾ ಶೆಟ್ಟಿ

ಆರೋಪಿಗಳಾದ ಸರಿತಾ ಹಾಗೂ ಬಿಜು ರಾಧಾಕೃಷ್ಣನ್‌ ಅವರು ತಮ್ಮ ಕಂಪನಿಗೆ ಫ್ರಾಂಚೈಸಿ ನೀಡುವುದಾಗಿ ಹಾಗೂ ತಮ್ಮ ಮನೆ-ಕಚೇರಿಯಲ್ಲಿ ಸೌರ ಫ‌ಲಕ ಅಳವಡಿಸುವುದಾಗಿ ಭರವಸೆ ನೀಡಿ 42.70 ಲಕ್ಷ ರೂ. ಪಡೆದುಕೊಂಡು ವಂಚಿಸಿದ್ದರು ಎಂದು ಅಬ್ದುಲ್‌ ಮಜೀದ್‌ ಎಂಬವರು ದೂರು ನೀಡಿದ್ದರು.