ಹಗಲಿನಲ್ಲಿ ಅಲ್‌ಜಜೀರಾ ಪತ್ರಕರ್ತ, ರಾತ್ರಿ ವೇಳೆ ಹಮಾಸ್‌ ಕಮಾಂಡರ್‌!

Team Udayavani, Feb 13, 2024, 6:30 AM IST

ಹೊಸದಿಲ್ಲಿ: ಕತಾರ್‌ ಮೂಲದ ಅಲ್‌ಜಜೀರಾ ಸುದ್ದಿವಾಹಿನಿಯ ಖ್ಯಾತ ಪತ್ರಕರ್ತರೊಬ್ಬರು ಹಮಾಸ್‌ ಉಗ್ರ ಸಂಘಟನೆಯೊಂದಿಗೆ ನಿಕಟ ಸಂಪರ್ಕ ಹೊಂದಿದ್ದು, ಮಿಲಿಟರಿ ಉಪಕರಣಗಳ ತಯಾರಿಕೆಗೆ ನೆರವು ನೀಡಿದ್ದಾರೆ ಎಂದು ಇಸ್ರೇಲ್‌ ಆರೋಪಿಸಿದೆ. “ಈತ ಹಗಲು ಪತ್ರಕರ್ತನಾಗಿ­ದ್ದರೆ, ರಾತ್ರಿ ಹಮಾಸ್‌ ಕಮಾಂಡರ್‌ ಆಗಿ ಕಾರ್ಯನಿರ್ವಹಿ­ಸುತ್ತಿದ್ದಾನೆ’ ಎಂಬ ಗಂಭೀರ ಆರೋಪವನ್ನೂ ಮಾಡಿದೆ.

ಹಿರಿಯ ವರದಿಗಾರ ಮೊಹಮ್ಮದ್‌ ವಾಷಾಹ್‌ ಹಮಾಸ್‌ನ ಹಿರಿಯ ಕಮಾಂಡರ್‌ ಆಗಿ ಮೂನ್‌ಲೈಟಿಂಗ್‌(ನಿಯಮಿತ ಉದ್ಯೋಗದ ಜತೆಗೆ ರಹಸ್ಯವಾಗಿ ಇನ್ನೊಂದು ಉದ್ಯೋಗ ಮಾಡು­ವುದು) ಮಾಡುತ್ತಿದ್ದು, ಡ್ರೋನ್‌, ಗ್ರೆನೇಡ್‌ ಸೇರಿ ಹಲವು ಸೇನಾ ಉಪಕರಣಗಳ ತಯಾರಿಕೆಗೆ ನೆರವು ನೀಡಿದ್ದಾರೆ. ಅವರಿಂದ ವಶಪಡಿಸಿಕೊಳ್ಳ­ಲಾದ ಲ್ಯಾಪ್‌ಟಾಪ್‌ನಲ್ಲಿ ಉಗ್ರರಿಗೆ ಶಸ್ತ್ರಾಸ್ತ್ರ ತರಬೇತಿ ಸೇರಿ ಯುದ್ಧೋಪಕರಣಗಳ ತಯಾರಿಕೆ­ಯಲ್ಲಿ ತೊಡಗಿರುವ ಫೋಟೋಗಳು ದೊರೆತಿವೆ ಎಂದು ಇಸ್ರೇಲ್‌ ಸೇನೆ ತಿಳಿಸಿದೆ.

ಇಬ್ಬರು ಒತ್ತೆಯಾಳುಗಳ ರಕ್ಷಣೆ
ಗಾಜಾ ಪಟ್ಟಿಯಲ್ಲಿ ಉಗ್ರರ ಒತ್ತೆಯ­ಲ್ಲಿದ್ದ ಇಬ್ಬರನ್ನು ಇಸ್ರೇಲ್‌ ಸೇನೆ ಸೋಮವಾರ ರಕ್ಷಿಸಿದೆ. ಈ ಕಾರ್ಯಾಚರಣೆ ವೇಳೆ ನಡೆಸಿದ ವೈಮಾನಿಕ ದಾಳಿಯಲ್ಲಿ 50 ಪ್ಯಾಲೆಸ್ತೀನಿಯರು ಮೃತಪಟ್ಟಿದ್ದಾರೆ. ಇನ್ನೂ 100ರಷ್ಟು ಇಸ್ರೇಲಿಯರು ಉಗ್ರರ ಒತ್ತೆಯಲ್ಲಿದ್ದಾರೆ.