ಬೃಹತ್ ರೋಡ್ ಶೋ: ಬಂಗಾಳದ ರಿಕ್ಷಾವಾಲಾ ನಿವಾಸದಲ್ಲಿ ಭೋಜನ ಸವಿದ ಅಮಿತ್ ಶಾ

Team Udayavani, Apr 7, 2021, 5:02 PM IST

ಕೋಲ್ಕತಾ: ಪಶ್ಚಿಮಬಂಗಾಳದ ಹೌರಾ ಜಿಲ್ಲೆಯ ದೋಮ್ಜೂರ್ ವಿಧಾನಸಭಾ ಕ್ಷೇತ್ರದಲ್ಲಿ ಬುಧವಾರ(ಏಪ್ರಿಲ್ 07) ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಬೃಹತ್ ರೋಡ್ ಶೋ ನಡೆಸಿದ ನಂತರ ರಿಕ್ಷಾವಾಲಾರೊಬ್ಬರ ಮನೆಯಲ್ಲಿ ಭೋಜನ ಸವಿದಿರುವುದಾಗಿ ವರದಿ ತಿಳಿಸಿದೆ.

ಪುಟ್ಟ ಮನೆಯಲ್ಲಿ ಅಮಿತ್ ಶಾ ಅವರು ನೆಲದ ಮೇಲೆ ಕುಳಿತು ಭೋಜನ ಸವಿದಿದ್ದರು. ಅನ್ನ, ದಾಲ್, ತರಕಾರಿ ಹಾಗೂ ಸಲಾಡ್ ಸೇವಿಸಿರುವುದಾಗಿ ವರದಿ ಹೇಳಿದೆ. ಈ ಸಂದರ್ಭದಲ್ಲಿ ಶಾ ಜತೆಗೆ ದೋಮ್ಜೂರ್ ಬಿಜೆಪಿ ಅಭ್ಯರ್ಥಿ ರಾಜೀವ್ ಬ್ಯಾನರ್ಜಿ ಹಾಗೂ ಇತರ ಮುಖಂಡರು ಉಪಸ್ಥಿತರಿದ್ದರು.

ಬೆಳಗ್ಗೆ ದೋಮ್ಜೂರ್ ನಲ್ಲಿ ಅಮಿತ್ ಶಾ ಅವರು ನಗರದಲ್ಲಿ ಬೃಹತ್ ರೋಡ್ ಶೋ ನಡೆಸಿದ್ದರು. ಹೂವಿನಿಂದ ಅಲಂಕರಿಸಿದ್ದ ವಾಹನದಲ್ಲಿ ತೆರಳಿದ್ದ ಶಾ, ಬಿಜೆಪಿ ಅಭ್ಯರ್ಥಿ ರಾಜೀವ್ ಬ್ಯಾನರ್ಜಿ ರಸ್ತೆಯ ಎರಡೂ ಕಡೆಗಳಲ್ಲಿ ನೆರೆದಿದ್ದ ಅಪಾರ ಜನಸ್ತೋಮದತ್ತ ಕೈಬೀಸಿ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದರು.

ಪ್ರಚಾರ ಯಾತ್ರೆಯ ವೇಳೆ ವಾದ್ಯಗಳಿದ್ದು, ಸಾರೇ ಜಹಾಂಸೇ ಅಚ್ಚ ಹಾಡನ್ನು ನುಡಿಸಿದ್ದು, ನೆರೆದಿದ್ದ ಜನರತ್ತ ಅಮಿತ್ ಶಾ ಅವರು ಹೂವಿನ ಎಸಳನ್ನು ಎಸೆದು ಅಭಿಮಾನ ವ್ಯಕ್ತಪಡಿಸಿರುವುದಾಗಿ ವರದಿ ಹೇಳಿದೆ.