Orleans Masters:ನಿಶಿಮೊಟೊಗೆ ಆಘಾತ-ಪ್ರಿಯಾಂಶು ರಾಜಾವತ್‌ ಕ್ವಾರ್ಟರ್‌ಫೈನಲಿಗೆ

Team Udayavani, Apr 7, 2023, 6:47 AM IST

ನವದೆಹಲಿ: ಫ್ರಾನ್ಸ್‌ನಲ್ಲಿ ನಡೆಯುತ್ತಿರುವ ಓರ್ಲಿಯನ್ಸ್‌ ಮಾಸ್ಟರ್ ಸೂಪರ್‌ 300 ಬ್ಯಾಡ್ಮಿಂಟನ್‌ ಕೂಟದಲ್ಲಿ ಭಾರತದ ಪ್ರಿಯಾಂಶು ರಾಜಾವತ್‌ ಅವರು ಅಗ್ರ ಶ್ರೇಯಾಂಕದ ಕೆಂಟಾ ನಿಶಿಮೊಟೊ ಅವರನ್ನು ಅದ್ಭುತ ರೀತಿಯಲ್ಲಿ ಕೆಡಹಿ ಕ್ವಾರ್ಟರ್‌ಫೈನಲ್‌ ಹಂತಕ್ಕೇರಿದ್ದಾರೆ.

ಗುರುವಾರ ನಡೆದ ಈ ಪಂದ್ಯದಲ್ಲಿ ವಿಶ್ವದ 58ನೇ ರ್‍ಯಾಂಕಿನ ರಾಜಾವತ್‌ ಅವರು 21-8, 21-16 ಗೇಮ್‌ಗಳಿಂದ ನಿಶಿಮೊಟೊ ಅವರನ್ನು ಕೆಡಹಿ ಅಚ್ಚರಿಯ ಫ‌ಲಿತಾಂಶಕ್ಕೆ ಕಾರಣರಾದರು. ಪರಿಶುದ್ಧ ಕೌಶಲ ಮತ್ತು ತಂತ್ರದ ಆಟಗಾರಿಕೆಯಿಂದ ಎದುರಾಳಿಯನ್ನು ಮಣಿಸಲು ರಾಜಾವತ್‌ ಯಶಸ್ವಿಯಾದರು. ನಿಶಿಮೊಟೊ ಕಳೆದ ವಾರ ನಡೆದ ಮ್ಯಾಡ್ರಿಡ್‌ ಸ್ಪೇನ್‌ ಮಾಸ್ಟರ್ ಪ್ರಶಸ್ತಿ ಜಯಿಸಿದ್ದರು.

ಗುರುವಾರ ಸಂಜೆ ನಡೆಯುವ ಇನ್ನೊಂದು ಪಂದ್ಯದಲ್ಲಿ ಒಂದು ವೇಳೆ ಭಾರತದ ಮಿಥುನ್‌ ಮಂಜುನಾಥ್‌ ಅವರು ಚೈನೀಸ್‌ ತೈಪೆಯ ಚಿ ಯು ಜೆನ್‌ ಅವರನ್ನು ಸೋಲಿಸಿದರೆ ಕ್ವಾರ್ಟರ್‌ಫೈನಲ್‌ ಹೋರಾಟವು ಭಾರತೀಯ ಆಟಗಾರರ ನಡುವೆ ನಡೆಯಲಿದೆ.

ಥಾಮಸ್‌ ಕಪ್‌ ಗೆಲುವಿನ ವೇಳೆ ಭಾರತೀಯ ತಂಡದಲ್ಲಿದ್ದ ರಾಜಾವತ್‌ ಈ ಪಂದ್ಯದಲ್ಲಿ ಅದ್ಭುತ ರೀತಿಯಲ್ಲಿ ಹೋರಾಡಿದ್ದರು. 10-0 ಮುನ್ನಡೆ ಸಾಧಿಸುವ ಮೂಲಕ ಅವು ನಿಶಿಮೊಟೊ ಅವರನ್ನು ತಬ್ಬಿಬ್ಬುಗೊಳಿಸಿದ್ದರು. ಮೊದಲ ಗೇಮ್‌ ಗೆದ್ದಾಗ ನಿಶಿಮೊಟೊ ಕೇವಲ 8 ಅಂಕ ಗಳಿಸಿದ್ದರು.