Bhopal fire: 25 ಕೋಟಿ ರೂ.ನಷ್ಟ- 12,000ಕ್ಕೂ ಅಧಿಕ ಫೈಲ್‌ಗ‌ಳು ಬೂದಿ

Team Udayavani, Jun 14, 2023, 7:29 AM IST

ಭೋಪಾಲ: ಮಧ್ಯಪ್ರದೇಶ ರಾಜಧಾನಿ ಭೋಪಾಲದಲ್ಲಿರುವ ಸಾತ್ಪುರ ಭವನದಲ್ಲಿ ಸೋಮವಾರ ಸಂಭವಿಸಿದ್ದ ಬೆಂಕಿಯನ್ನು ಮಂಗಳವಾರ ಶಮನಗೊಳಿಸಲಾಗಿದೆ. ಈ ಘಟನೆಯಲ್ಲಿ ಜೀವಹಾನಿಯಾಗದಿದ್ದರೂ, 12,000ಕ್ಕೂ ಅಧಿಕ ಪ್ರಮುಖ ಫೈಲ್‌ಗ‌ಳು, 25 ಕೋಟಿ ರೂ. ಮೌಲ್ಯದ ಉಪಕರಣಗಳು ನಾಶವಾಗಿವೆ.

ಈ ಪೈಕಿ ಬೆಂಕಿ ಶಮನಗೊಳಿಸಲು 5.5 ಕೋಟಿ ರೂ. ವೆಚ್ಚದಲ್ಲಿ ಖರೀದಿಸಲಾಗಿದ್ದ ಅತ್ಯಾಧುನಿಕ ಹೈಡ್ರಾಲಿಕ್‌ ಏಣಿಯೂ ನಾಶವಾಗಿದೆ. ಅಗ್ನಿ ದುರಂತ ಉಂಟಾದ ಕಟ್ಟಡದ ಪಕ್ಕವೇ ಅದನ್ನು ಪಾರ್ಕ್‌ ಮಾಡಲಾಗಿತ್ತು. ಕಳೆದ ಒಂದು ದಶಕದಲ್ಲಿ ಮೂರನೇ ಬಾರಿಗೆ ಇಂಥ ಘಟನೆ ನಡೆದಿದೆ. 2012, 2018ರಲ್ಲೂ ಇದೇ ಕಟ್ಟಡದಲ್ಲಿ ಬೆಂಕಿ ಕಾಣಿಸಿಕೊಂಡಿತ್ತು.

ಘಟನೆಗೆ ಕಾರಣವೇನು?: ಹಲವಾರು ಸರ್ಕಾರಿ ಇಲಾಖೆಗಳಿಗೆ ಆಶ್ರಯ ನೀಡಿರುವ ಸಾತ್ಪುರ ಭವನದಲ್ಲಿ ಬೆಂಕಿ ಅನಾಹುತವಾಗಿರುವುದಕ್ಕೆ ಖಚಿತ ಕಾರಣ ತಿಳಿದುಬಂದಿಲ್ಲ. ಸಂಜೆ 4 ಗಂಟೆಗೆ 3ನೇ ಮಹಡಿಯಲ್ಲಿ ಮೊದಲು ಬೆಂಕಿ ಪತ್ತೆಯಾಗಿದೆ. ನಂತರ ಅದು 4,5,6,ನೇ ಮಹಡಿಗೆ ವಿಸ್ತರಿಸಿಕೊಂಡಿದೆ. ಬಹುಶಃ ಎಸಿ ಸ್ಫೋಟಿಸಿ ಹೀಗಾಗಿರಬಹುದು ಎಂದು ಶಂಕಿಸಲಾಗಿದೆ. ವರ್ಷಾಂತ್ಯಕ್ಕೆ ವಿಧಾನಸಭೆ ಚುನಾವಣೆ ಇರುವ ಹಿನ್ನೆಲೆಯಲ್ಲಿ ಈ ಘಟನೆ ಹಿಂದೆ ಪಿತೂರಿ ಇದೆ ಎಂದು ಪ್ರತಿಪಕ್ಷ ಕಾಂಗ್ರೆಸ್‌ ಆರೋಪಿಸಿದೆ.