ಬಿಜೆಪಿ ಸಂಸದ ಸಾಕ್ಷಿ ಮಹಾರಾಜ್ ಗೆ ಪಾಕಿಸ್ತಾನದ ನಂಬರ್ ನಿಂದ ಕೊಲೆ ಬೆದರಿಕೆ ಕರೆ

Team Udayavani, Aug 11, 2020, 11:36 AM IST

ಲಕ್ನೋ: ಉನ್ನಾವೊ ಭಾರತೀಯ ಜನತಾ ಪಕ್ಷದ ಸಂಸದ ಸಾಕ್ಷಿ ಮಹಾರಾಜ್ ಅವರನ್ನು ಕೊಲ್ಲುವ ಹಾಗೂ ಮನೆಗೆ ಬಾಂಬ್ ಹಾಕುವ ಬೆದರಿಕೆ ಕರೆ ಬಂದಿರುವುದಾಗಿ ಉತ್ತರಪ್ರದೇಶ ಪೊಲೀಸರಿಗೆ ದೂರು ನೀಡಿರುವುದಾಗಿ ವರದಿ ತಿಳಿಸಿದೆ.

ಉನ್ನಾವೊ ಪೊಲೀಸ್ ವರಿಷ್ಠಾಧಿಕಾರಿಗೆ ಸಲ್ಲಿಸಿರುವ ದೂರಿನ ಪ್ರಕಾರ, ತನಗೆ ಪಾಕಿಸ್ತಾನದ ನಂಬರ್ ನಿಂದ ಸೋಮವಾರ ಎರಡು ಬಾರಿ ಜೀವ ಬೆದರಿಕೆ ಕರೆ ಬಂದಿತ್ತು. ಅಷ್ಟೇ ಅಲ್ಲ ಮನೆ ಮೇಲೆ ಬಾಂಬ್ ಹಾಕುವುದಾಗಿಯೂ ಬೆದರಿಸಿರುವುದಾಗಿ ತಿಳಿಸಿದ್ದಾರೆ.

ಸಂಸದ ಸಾಕ್ಷಿ ಮಹಾರಾಜ್ ಈ ಕುರಿತು ಅನಾಮಧೇಯ ವ್ಯಕ್ತಿಯ ವಿರುದ್ಧ ದೂರು ನೀಡಿರುವುದಾಗಿ ವರದಿ ಹೇಳಿದೆ. “ನನ್ನ ಗೆಳೆಯ ಮೊಹಮ್ಮದ್ ಗಫಾರ್ ನನ್ನು ಹಿಡಿಯಲು ಪೊಲೀಸರಿಗೆ ನೆರವು ನೀಡುವ ಮೂಲಕ ನೀನು(ಸಾಕ್ಷಿ) ನಿನ್ನ ಸಾವನ್ನು ಆಹ್ವಾನಿಸಿಕೊಂಡಿರುವೆ”. ನಿನ್ನ ಹಾಗೂ ನಿನ್ನ ಜತೆಗಾರರನ್ನು ಹತ್ತು ದಿನದೊಳಗೆ ಕೊಲೆಗೈಯುವುದಾಗಿ” ಬೆದರಿಕೆ ಹಾಕಿರುವುದಾಗಿ ಸಾಕ್ಷಿ ಮಹಾರಾಜ್ ತಿಳಿಸಿದ್ದಾರೆ.

ಮುಜಾಹಿದೀನ್ ಗಳು ಸಾಕ್ಷಿ ಮಹಾರಾಜ್ ಅವರ 24 ಗಂಟೆಗಳ ಕಾಲ ಚಲವಲನದ ಮೇಲೆ ಕಣ್ಣಿಟ್ಟಿದ್ದಾರೆ. ಒಂದು ವೇಳೆ ಅವಕಾಶ ಸಿಕ್ಕ ಕೂಡಲೇ ಹತ್ಯೆಗೈಯಲಿದ್ದಾರೆ ಎಂದು ಕರೆ ಮಾಡಿದ ವ್ಯಕ್ತಿ ಬೆದರಿಕೆ ಒಡ್ಡಿರುವುದಾಗಿ ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.