ಜೆಡಿಎಸ್‌ಗೆ ಮತ ಹಾಕುವುದು ಕಾಂಗ್ರೆಸ್‌ಗೆ ಮತ ಹಾಕಿದಂತೆ: ಅಮಿತ್ ಶಾ

Team Udayavani, Dec 31, 2022, 9:47 PM IST

ಬೆಂಗಳೂರು: ಕರ್ನಾಟಕದಲ್ಲಿ ಬಿಜೆಪಿ ಮೂರನೇ ಎರಡರಷ್ಟು ಬಹುಮತದೊಂದಿಗೆ ಸರ್ಕಾರ ರಚಿಸುವುದನ್ನು ಖಚಿತಪಡಿಸಿಕೊಳ್ಳಲು ಪಕ್ಷದ ಕಾರ್ಯಕರ್ತರನ್ನು ಒತ್ತಾಯಿಸಿದ ಕೇಂದ್ರ ಗೃಹ ಸಚಿವ ಅಮಿತ್ ಶಾ, 2023 ರ ವಿಧಾನಸಭಾ ಚುನಾವಣೆಯಲ್ಲಿ ಪಕ್ಷವು ಏಕಾಂಗಿಯಾಗಿ ಸ್ಪರ್ಧಿಸಲಿದೆ ಎಂದು ಶನಿವಾರ ಪ್ರತಿಪಾದಿಸಿದರು.

ಅರಮನೆ ಮೈದಾನದಲ್ಲಿ ನಡೆದ ಬಿಜೆಪಿ ಬೂತ್ ಅಧ್ಯಕ್ಷರು ಮತ್ತು ಬೂತ್ ಮಟ್ಟದ ಏಜೆಂಟರ ಸಮಾವೇಶದಲ್ಲಿ ಪಕ್ಷದ ಕಾರ್ಯಕರ್ತರನ್ನು ಉದ್ದೇಶಿಸಿ ಮಾತನಾಡಿದ ಅವರು, ”ಜೆಡಿಎಸ್ ಗೆ ಮತ ಚಲಾಯಿಸಿದರೆ ಕಾಂಗ್ರೆಸ್‌ಗೆ ಮತ ಹಾಕಿದಂತೆ.ದೇಶಭಕ್ತರ ಪಕ್ಷದೊಂದಿಗೆ ನಿಂತಿದ್ದಾರೆಯೇ ಅಥವಾ ಕಾಂಗ್ರೆಸ್ ನಾಯಕತ್ವದಲ್ಲಿ “ತುಕ್ಡೆ ತುಕ್ಡೆ ಗ್ಯಾಂಗ್” ಜೊತೆ ನಿಂತಿದ್ದಾರೆಯೇ ಎಂಬುದನ್ನು ನಿರ್ಧರಿಸಬೇಕು ಎಂದು ಅವರು ಜನರನ್ನು ಒತ್ತಾಯಿಸಿದರು.

“ಸ್ಪಷ್ಟವಾಗಿ ಎರಡು ಬದಿಗಳಿವೆ ಮತ್ತು ಇದು ಈ ಬಾರಿ ನೇರ ಹೋರಾಟವಾಗಿದೆ. ತ್ರಿಕೋನ ಹೋರಾಟ ನಡೆಯುತ್ತಿದೆ ಎಂದು ಪತ್ರಕರ್ತರು ಹೇಳುತ್ತಾರೆ. ನಾನು ಇಲ್ಲ, ಇದು ನೇರ ಹೋರಾಟ, ಏಕೆಂದರೆ ಜೆಡಿಎಸ್‌ಗೆ ಮತ ಹಾಕುವುದು ಎಂದರೆ ಕಾಂಗ್ರೆಸ್‌ಗೆ ಮತ ಹಾಕುವುದು. ಹಾಗಾದರೆ ಇದು ನೇರ ಹೋರಾಟವಲ್ಲವೇ” ಎಂದು ಶಾ ಪ್ರಶ್ನಿಸಿದರು.

”ಜೆಡಿಎಸ್ ಪಕ್ಷದೊಂದಿಗೆ ಬಿಜೆಪಿ ಮೈತ್ರಿ ಮಾಡಿಕೊಳ್ಳುತ್ತದೆ ಎಂದು ವದಂತಿ ಹಬ್ಬಿಸುತ್ತಿದೆ” ಎಂದು ಆರೋಪಿಸಿ, ”ನಾವು ಯಾವುದೇ ಪಕ್ಷದೊಂದಿಗೆ ಹೋಗುವುದಿಲ್ಲ ಎಂದು ಕಾರ್ಯಕರ್ತರು ಮತ್ತು ಕರ್ನಾಟಕದ ಜನರಿಗೆ ಹೇಳಲು ಬಂದಿದ್ದೇನೆ. ನಾವು ಏಕಾಂಗಿಯಾಗಿ ಹೋರಾಡುತ್ತೇವೆ ಮತ್ತು ಸ್ವಂತವಾಗಿ ಸರ್ಕಾರ ರಚಿಸುತ್ತೇವೆ. ಒಂದೆಡೆ ಬಿಜೆಪಿ ರೂಪದಲ್ಲಿ ದೇಶಪ್ರೇಮಿಗಳ ಸಂಘಟನೆಯಾದರೆ, ಇನ್ನೊಂದೆಡೆ ತುಕಡೆ-ತುಕ್ಡೆ ಗ್ಯಾಂಗ್ ಕಾಂಗ್ರೆಸ್ ನೇತೃತ್ವದಲ್ಲಿ ಒಗ್ಗೂಡಿದೆ. ಅವರು ದೇಶಭಕ್ತರೊಂದಿಗಿದ್ದಾರೋ ಅಥವಾ ಈ ದೇಶವನ್ನು ವಿಭಜಿಸಲು ಬಯಸುವವರನ್ನು ಬೆಂಬಲಿಸುವವರ ಜೊತೆಗಿದ್ದಾರೋ ಎಂಬುದನ್ನು ಕರ್ನಾಟಕದ ಜನರು ಈಗ ನಿರ್ಧರಿಸಬೇಕು” ಎಂದರು.

”ಕರ್ನಾಟಕದಲ್ಲಿ ಒಂದು ಕಡೆ ಪಿಎಫ್ ಐ ನಿಷೇಧಿಸಿದ ಮೋದಿ ಇದ್ದರೆ, ಇನ್ನೊಂದು ಕಡೆ ಪಿಎಫ್ ಐನ 1700 ಜನರ ಮೇಲಿನ ಕೇಸ್ ವಾಪಸ್ ಪಡೆದ ಜನರಿದ್ದಾರೆ. ಒಂದು ಕಡೆ ರಾಮಮಂದಿರ ನಿರ್ಮಾಣ ಮಾಡುತ್ತಿರುವ ಮೋದಿ, ಇನ್ನೊಂದು ಕಡೆ ಟಿಪ್ಪು ಜಯಂತಿ ಆಚರಿಸುವವರು.ಒಂದೆಡೆ ಬಿಜೆಪಿಯ ಅಭಿವೃದ್ಧಿ ಪರವಾದ ಡಬಲ್ ಇಂಜಿನ್ ಸರ್ಕಾರ, ಮತ್ತೊಂದೆಡೆ ರಾಜ್ಯವನ್ನು ಲೂಟಿ ಮಾಡುವವರು” ಎಂದರು.

ಗುಜರಾತ್‌ನಲ್ಲಿ ಬಿಜೆಪಿ ಬೃಹತ್ ವಿಜಯವನ್ನು ಉಲ್ಲೇಖಿಸಿ, ಕರ್ನಾಟಕದಾದ್ಯಂತ ನೆರೆದಿದ್ದ ಪಕ್ಷದ ಕಾರ್ಯಕರ್ತರಿಗೆ ”ನೀವು ಸರ್ಕಾರ ರಚಿಸಲು ಬಯಸಿದರೆ, ಅಪೂರ್ಣ ಸರ್ಕಾರವನ್ನು ರಚಿಸಬೇಡಿ, ಪೂರ್ಣ ಮೂರನೇ ಎರಡರಷ್ಟು ಬಹುಮತದೊಂದಿಗೆ ಸರ್ಕಾರವನ್ನು ರಚಿಸಿ.ನಾನು ಕರ್ನಾಟಕದ ಜನರ ಮನಸ್ಥಿತಿಯನ್ನು ನೋಡಿದ್ದೇನೆ. ಜನರು ನಮ್ಮನ್ನು ಬೆಂಬಲಿಸಲು ಸಿದ್ಧರಾಗಿದ್ದಾರೆ. ನಾವು ಅವರ ಬಳಿಗೆ ಹೋಗಬೇಕಾಗಿದೆ”ಎಂದರು.