ಪ.ಬಂಗಾಳದಿಂದ BJPಯ ಮೊದಲ ರಾಜ್ಯಸಭೆ ಸದಸ್ಯ- ಲಿಸ್ಟ್‌ನಲ್ಲಿ ಮಿಥುನ್‌ ಚಕ್ರವರ್ತಿ, ಗಂಗೂಲಿ…

Team Udayavani, Jul 7, 2023, 7:33 AM IST

ನವದೆಹಲಿ: ತೃಣಮೂಲ ಕಾಂಗ್ರೆಸ್‌ ಬಾಹುಳ್ಯವಿರುವ ಪಶ್ಚಿಮ ಬಂಗಾಳದಿಂದ ಬಿಜೆಪಿ ಇದೇ ಮೊದಲ ಬಾರಿಗೆ ರಾಜ್ಯಸಭೆಯ ಸದಸ್ಯರನ್ನು ಹೊಂದಲಿದೆ. ಜು.24ರಂದು ಆರು ಸ್ಥಾನಗಳಿಗೆ ನಡೆಯುವ ಚುನಾವಣೆಯಲ್ಲಿ ಒಂದು ಸ್ಥಾನವನ್ನು ಗೆಲ್ಲುವ ಅವಕಾಶ ಪಡೆದುಕೊಂಡಿದೆ. ಆ ರಾಜ್ಯ ಒಟ್ಟು 16 ರಾಜ್ಯಸಭೆ ಸ್ಥಾನಗಳನ್ನು ಹೊಂದಿದೆ. ಹಿಂದಿನ ಚುನಾವಣೆಯಲ್ಲಿ 77 ಸ್ಥಾನಗಳನ್ನು ಹೊಂದಿದ್ದ ಬಿಜೆಪಿ ಈಗ 70 ಸ್ಥಾನಗಳನ್ನು ಹೊಂದಿದೆ.

ಒಂದು ಸ್ಥಾನದ ಆಯ್ಕೆಯಾಗಿ ಹಿರಿಯ ಸಿನಿಮಾ ನಟ ಮಿಥುನ್‌ ಚಕ್ರವರ್ತಿ, ಪಶ್ಚಿಮ ಬಂಗಾಳದ ಉತ್ತರ ಭಾಗದ ಪ್ರಮುಖ ನಾಯಕ ಅನಂತ ಮಹರಾಜ್‌, ಮಾಜಿ ಕ್ರಿಕೆಟಿಗ ಸೌರವ್‌ ಗಂಗೂಲಿ, “ಅಮಿತ್‌ ಶಾ ಆ್ಯಂಡ್‌ ಮಾರ್ಚ್‌ ಆಫ್ ಬಿಜೆಪಿ” ಎಂಬ ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಅವರ ಜೀವನಚರಿತ್ರೆಯ ಲೇಖಕ ಅನಿರ್ಬನ್‌ ಗಂಗೂಲಿ, ಹಿರಿಯ ಪತ್ರಕರ್ತ ಸ್ವಪನ್‌ ದಾಸ್‌ ಗುಪ್ತಾ, ನಿವೃತ್ತ ಐಪಿಎಸ್‌ ಅಧಿಕಾರಿ ಭಾರತಿ ಘೋಷ್‌ ಅವರ ಹೆಸರುಗಳನ್ನು ಪಶ್ಚಿಮ ಬಂಗಾಳ ಬಿಜೆಪಿ ಘಟಕ ವರಿಷ್ಠರಿಗೆ ಕಳುಹಿಸಿಕೊಟ್ಟಿದೆ. ಈ ಹೆಸರುಗಳ ಪೈಕಿ ಯಾರನ್ನು ಆಯ್ಕೆ ಮಾಡಿದರೂ, ಬಿಜೆಪಿಗೆ ರಾಜ್ಯಸಭೆಯ ಮೊದಲ ಸದಸ್ಯ ಸಿಗುವುದು ಖಚಿತ.