9 ಮಂದಿಯನ್ನು ಕೊಂದ ಬಾಲಕ-ಸೆರ್ಬಿಯಾ ಶಾಲೆಯಲ್ಲಿ ದುರಂತ

Team Udayavani, May 4, 2023, 6:07 AM IST

ಬೆಲ್ಗ್ರೇಡ್‌: ಅಮೆರಿಕದಲ್ಲಿ ಶಾಲಾಮಕ್ಕಳು ಬೇಕಾಬಿಟ್ಟಿ ಗುಂಡು ಹಾರಿಸಿ ಹತ್ತಾರು ಮಂದಿಯನ್ನು ಕೊಲ್ಲುವುದನ್ನು ಕೇಳಿದ್ದೀರಿ. ಅಂತಹದ್ದೇ ಒಂದು ಭೀಕರ ಘಟನೆ ಸೆರ್ಬಿಯ ರಾಜಧಾನಿ ಬೆಲ್ಗ್ರೇಡ್‌ನ‌ಲ್ಲಿ ಬುಧವಾರ ನಡೆದಿದೆ. 14 ವರ್ಷದ ಬಾಲಕನೊಬ್ಬ ತನ್ನದೇ ಶಾಲೆಯ ವಿದ್ಯಾರ್ಥಿಗಳ ಮೇಲೆ ಬೇಕಾಬಿಟ್ಟಿ ಗುಂಡುಹಾರಿಸಿ ಎಂಟು ಮಕ್ಕಳು, ಒಬ್ಬ ಭದ್ರತಾ ಸಿಬ್ಬಂದಿ ಸಾವಿಗೆ ಕಾರಣವಾಗಿದ್ದಾನೆ. ವಿದ್ಯಾರ್ಥಿಯನ್ನು ಪೊಲೀಸರು ವಶಕ್ಕೆ ತೆಗೆದುಕೊಂಡಿದ್ದಾರೆ. ಘಟನೆಗೆ ಕಾರಣವೇನೆಂದು ಇನ್ನೂ ಖಚಿತವಾಗಿಲ್ಲ.
ಪ್ರಾಥಮಿಕ ಶಾಲೆಗೆ ಸೇರಿಸಿದ ವಿದ್ಯಾರ್ಥಿಯನ್ನು ಕೆ.ಕೆ. ಎಂದಷ್ಟೇ ಹೇಳಲಾಗಿದೆ. ಆತನ ಮುಖಕ್ಕೆ ಮುಸುಕುಹಾಕಿ ಒಯ್ಯಲಾಗಿದೆ. ಬಾಲಕ ತನ್ನಅಪ್ಪನ ಗನ್‌ ತೆಗೆದುಕೊಂಡು ಸತತವಾಗಿ ಗುಂಡು ಹಾರಿಸಿದ್ದಾನೆ.

ಕೆ.ಕೆ.ಯನ್ನು ಹತ್ತಿರದಲ್ಲಿ ನೋಡಿರುವ ಕೆಲವು ಇತರೆ ವಿದ್ಯಾರ್ಥಿಗಳು ಪ್ರತಿಕ್ರಿಯೆ ನೀಡಿ, ಆತ ಸಭ್ಯನಾಗಿದ್ದ, ಶಾಂತವಾಗಿದ್ದ. ಯಾರೊಂದಿಗೂ ಹೆಚ್ಚು ಬೆರೆಯುತ್ತಿರಲಿಲ್ಲ. ವಿದ್ಯಾಭ್ಯಾಸದಲ್ಲೂ ಚುರುಕಿದ್ದ. ಆತನ ಬಗ್ಗೆ ಬಹಳ ಗೊತ್ತಿಲ್ಲ. ಆದರೆ ಈ ಕೃತ್ಯವನ್ನು ನಿರೀಕ್ಷೆ ಮಾಡಿರಲಿಲ್ಲ ಎಂದು ಹೇಳಿದ್ದಾರೆ.