ಭಾರೀ ಗಾಳಿ-ಮಳೆ ಪ್ರವಾಹಕ್ಕೆ ಕೊಚ್ಚಿ ಹೋದ ಬಿಹಾರದ ಸೇತುವೆ, ದುರಸ್ತಿ ಕಾಮಗಾರಿ ಶುರು

Team Udayavani, Jun 2, 2021, 8:37 AM IST

ಪಾಟ್ನಾ:ಬಿಹಾರದ ಪಾಟ್ನಾ ನಗರದ ಸಮೀಪದಲ್ಲಿರುವ ದಾನಾಪುರ್ ಪಟ್ಟಣದ ಪಿಪಾ ಸೇತುವೆ ಎರಡು ತುಂಡಾದ ಪರಿಣಾಮ, ಭಾರೀ ಗಾಳಿ ಮಳೆಯಿಂದಾಗಿ ನದಿಯಲ್ಲಿ ಕೊಚ್ಚಿಕೊಂಡು ಹೋಗಿರುವ ಘಟನೆ ನಡೆದಿದೆ ಎಂದು ವರದಿ ತಿಳಿಸಿದೆ.

ಈ ಪಿಪಾ ಸೇತುವೆ ಡಿಯಾರಾ ಜನರ ಜೀವನಾಡಿ ಎಂದು ಪರಿಗಣಿಸಲಾಗುತ್ತಿತ್ತು. ಈ ಭಾಗದ ಜನರು ಸೇತುವೆಯ ನೆರವಿನಿಂದ ಪಾಟ್ನಾಕ್ಕೆ ಆಗಮಿಸುತ್ತಿದ್ದರು. ಸೇತುವೆ ಕೊಚ್ಚಿಕೊಂಡು ಹೋದ ಹಿನ್ನೆಲೆಯಲ್ಲಿ ಆರು ಪಂಚಾಯ್ತಿಗಳನ್ನು ಸಂಪರ್ಕಿಸುವ ದಾನಾಪುರ, ಡಯಾರಾ ಮಾರ್ಗ ಸಂಪೂರ್ಣವಾಗಿ ಬಂದ್ ಆದಂತಾಗಿದೆ ಎಂದು ವರದಿ ವಿವರಿಸಿದೆ.

ಸೇತುವೆ ದುರಸ್ತಿ ಕೆಲಸವನ್ನು ಜೂನ್ 1ರಿಂದ 7ರವರೆಗೆ ನಿಗದಿಪಡಿಸಲಾಗಿದೆ ಎಂದು ಬಿಹಾರ ನವ ನಿರ್ಮಾಣ್ ನಿಗಮ್ ಲಿಮಿಟೆಡ್ ನ ಕಾರ್ಯನಿರ್ವಾಹಕ ಅಧಿಕಾರಿ ಮೊಹಮ್ಮದ್ ಖುರ್ಷಿದ್ ತಿಳಿಸಿದ್ದು, ಈ ಬಗ್ಗೆ ಮೇ 26ರಂದು ನೋಟಿಸ್ ಜಾರಿಗೊಳಿಸಲಾಗಿದೆ ಎಂದು ತಿಳಿಸಿದ್ದಾರೆ.

ಚಂಡಮಾರುತದಿಂದಾಗಿ ಕುಛ್ ಪ್ರದೇಶದಲ್ಲಿದ್ದ ಮನೆಯ ಮೇಲ್ಛಾವಣಿಗಳು ಹಾರಿ ಹೋಗಿದ್ದವು, ಅಲ್ಲದೇ ರಾಜ್ಯದ ಹಲವಾರು ಭಾಗಗಳಲ್ಲಿ ಭಾರೀ ಮಳೆಯಿಂದ ನೂರಾರು ಜನರು ತೊಂದರೆ ಅನುಭವಿಸುವಂತಾಗಿತ್ತು ಎಂದು ವರದಿ ಹೇಳಿದೆ.