ದನಗಳ್ಳತನ : 6 ಆರೋಪಿಗಳ ಬಂಧನ, 7 ಲಕ್ಷ ರೂ. ಮೌಲ್ಯದ ಎಮ್ಮೆಗಳ ವಶ

Team Udayavani, Dec 16, 2021, 7:59 PM IST

ವಿಜಯಪುರ : ನಗರದಲ್ಲಿ ನಡೆಯುತ್ತಿದ್ದ ದನಗಳ ಕಳ್ಳತನ ಪ್ರಕರಣವನ್ನು ಬೇಧಿಸಿರುವ ಪೊಲಿಸರು, ಆರು ಆರೋಪಿಗಳನ್ನು ಬಂಧಿಸಿ ಏಳು ಲಕ್ಷ ರೂ. ಮೌಲ್ಯದ ಎಮ್ಮೆಗಳನ್ನು ವಶಕ್ಕೆ ಪಡೆದಿದ್ದಾರೆ.

ನಗರದಲ್ಲಿ ನಡೆಯುತ್ತಿದ್ದ ದನಗಳ ಕಳ್ಳತನ ಪತ್ತೆಗಾಗಿ ಡಿಎಸ್ಪಿ ಲಕ್ಷ್ಮೀನಾರಾಯಣ ಮಾರ್ಗದರ್ಶನದಲ್ಲಿ ಗೋಲಗುಮ್ಮಟ ವೃತ್ತದ ಸಿಪಿಐ ರಮೇಶ ಅವಜಿ ನೇತೃತ್ವದಲ್ಲಿ ರಚಿಸಿದ್ದ ಪೊಲಿಸರ ತಂಡ ಆರೋಪಿಗಳನ್ನು ಬಂಧಿಸಿದ್ದಾರೆ.

ಬಂಧಿತ ಆರೋಪಿಗಳನ್ನು ಬೇಗಂ ತಲಾಬ್ ದೊಡ್ಡಿ ನಿವಾಸಿಗಳಾದ ಶ್ರೀಕಾಂತ ಲಕ್ಷ್ಮಣ ಅಂಕುಶ, ಮೈಲಾರಿ ಲಕ್ಷ್ಮಣ ಅಂಕುಶ, ರಾಮು ತಾಯಪ್ಪ ಗೋಪಣೆ, ಭೀಮು ಅಂಬಾಜಿ ಗೋಪಣೆ, ಭೀಮಶಿ ಶಂಕರ ಗೋಪಣೆ ಹಾಗೂ ಮಾರುತಿ ಅಣ್ಣಪ್ಪ ಗೋಪಣೆ ಎಂದು ಗುರುತಿಸಲಾಗಿದೆ.

ಬಂಧಿತರಿಂದ 7 ಲಕ್ಷ ರೂ. ಮೌಲ್ಯದ 11 ಎಮ್ಮೆಗಳು ಮತ್ತು ಕಾರುಗಳನ್ನು ವಶಕ್ಕೆ ಪಡೆದಿರುವುದಾಗಿ ಎಸ್ ಪಿ ಆನಂದಕುಮಾರ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.