ಚುನಾವಣೆ ಬಂದಾಗ ಕಾಂಗ್ರೆಸ್ ಗೆ ಸಶಸ್ತ್ರ ಪಡೆಗಳ ಮೇಲೆ ಪ್ರೀತಿ : ಪ್ರಹ್ಲಾದ್ ಜೋಶಿ

Team Udayavani, Jan 30, 2022, 8:44 PM IST

ಡೆಹ್ರಾಡೂನ್: ಕಾಂಗ್ರೆಸ್ ಪಕ್ಷ ಚುನಾವಣೆಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ಸಶಸ್ತ್ರ ಪಡೆಗಳ ಮೇಲೆ ಪ್ರೀತಿಯನ್ನು ತೋರಿಸುತ್ತಿದೆ ಎಂದು ಭಾನುವಾರ ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ಆರೋಪಿಸಿದ್ದಾರೆ.

ಬಿಜೆಪಿಯ ಉತ್ತರಾಖಂಡ ಚುನಾವಣಾ ಉಸ್ತುವಾರಿಯಾಗಿರುವ ಜೋಶಿ, INC ಎಂದರೆ “ಇಂಡಿಯನ್ ನ್ಯಾಷನಲ್ ಕನ್‌ಫ್ಯೂಷನ್” ಎಂಬುದಕ್ಕೆ ಸಂಕ್ಷಿಪ್ತ ರೂಪ ಎಂದು ಕರೆದಿದ್ದಾರೆ. ಅನುಕೂಲಕರವಾದಾಗಲೆಲ್ಲಾ ಅದು ಹಿಂದೂಗಳ ಪಕ್ಷವಾಗುತ್ತದೆ ಮತ್ತು ಚುನಾವಣೆಗಳು ಬಂದಾಗ ಸಶಸ್ತ್ರ ಪಡೆಗಳ ಪ್ರೇಮಿಯಾಗುತ್ತದೆ ಅವರಿಗೆ ಅಷ್ಟು ಕಾಳಜಿ ಇದ್ದರೆ ಏಕ ಶ್ರೇಣಿ-ಒಂದು ಪಿಂಚಣಿ ಯೋಜನೆಯನ್ನು ಏಕೆ ಜಾರಿಗೊಳಿಸಲಿಲ್ಲ ಎಂದು ಪ್ರಶ್ನಿಸಿದರು.

”ಕೇಂದ್ರದಲ್ಲಿ ದಶಕಗಳಿಂದ ಅಧಿಕಾರದಲ್ಲಿದ್ದರೂ ಓಆರ್‌ಒಪಿ ಯೋಜನೆಯನ್ನು ಏಕೆ ಜಾರಿಗೊಳಿಸಲಿಲ್ಲ ಎಂಬುದನ್ನು ಕಾಂಗ್ರೆಸ್ ವಿವರಿಸಬೇಕು. ಸಶಸ್ತ್ರ ಪಡೆಗಳಿಗೆ ಅಗತ್ಯವಿರುವ ಆಧುನಿಕ ಶಸ್ತ್ರಾಸ್ತ್ರಗಳು ಮತ್ತು ಸಲಕರಣೆಗಳನ್ನು ಏಕೆ ಖರೀದಿಸಲಿಲ್ಲ ಎಂದು ಅದು ಹೇಳಬೇಕು, ”ಎಂದರು.

“ಕಾಂಗ್ರೆಸ್ ಒಮ್ಮೆ ದೇಶದ ಮೊದಲ ರಕ್ಷಣಾ ಸಿಬ್ಬಂದಿ ಮತ್ತು ರಾಜ್ಯದ ಹೆಮ್ಮೆಯ ಜನರಲ್ ಬಿಪಿನ್ ರಾವತ್ ಅವರನ್ನು “ಬೀದಿ ಬದಿಯ ಗೂಂಡಾ” ಎಂದು ಕರೆದಿದ್ದನ್ನು ಮತ್ತು ಸರ್ಜಿಕಲ್ ಸ್ಟ್ರೈಕ್ ನ ಪುರಾವೆಯನ್ನು ಕೇಳಿರುವುದನ್ನು ಉತ್ತರಾಖಂಡದ ಜನರು ಎಂದಿಗೂ ಮರೆಯಲು ಸಾಧ್ಯವಿಲ್ಲ,” ಎಂದರು.