ಕೊರೊನಾ: ದೇಶಕ್ಕೆ ಎರಡನೇ ಅಲೆ ಭಯವಿಲ್ಲ; ಆರೋಗ್ಯ ತಜ್ಞರ ವಿಶ್ಲೇಷಣೆ

Team Udayavani, Dec 20, 2020, 7:00 AM IST

ಹೊಸದಿಲ್ಲಿ: ದೇಶಕ್ಕೆ ಕೊರೊನಾ ವೈರಸ್‌ನ ಎರಡನೇ ಅಲೆಯ ಆತಂಕ ಇಲ್ಲ!
-ಇದು ಆರೋಗ್ಯ ವಲಯದ ತಜ್ಞರ ವಿಶ್ಲೇಷಣೆ. ಒಂದು ವೇಳೆ 2ನೇ ಅಲೆ ಎದುರಾದರೂ ಅದು ಮೊದಲಿನದರಷ್ಟು ತೀವ್ರವಾಗಿರುವುದಿಲ್ಲ ಎಂದು ಅವರು ತಿಳಿಸಿದ್ದಾರೆ.

ದೇಶದಲ್ಲಿ ಕೊರೊನಾ ಪೀಡಿತರ ಸಂಖ್ಯೆ ಒಂದು ಕೋಟಿ ದಾಟಿದ ಬೆನ್ನಲ್ಲೇ ಆರೋಗ್ಯ ತಜ್ಞರಿಂದ ಈ ಹೇಳಿಕೆ ಹೊರಬಿದ್ದಿದೆ. ಜತೆಗೆ ಇತ್ತೀಚೆಗೆ ದಿನನಿತ್ಯ ದೃಢವಾಗುತ್ತಿರುವ ಸೋಂಕು ಪ್ರಕರಣಗಳ ಸಂಖ್ಯೆಯೂ ಇಳಿಕೆಯಾಗಿರುವುದರಿಂದ ಅವರು ಈ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಪ್ರಸಿದ್ಧ ವೈರಾಲಜಿಸ್ಟ್‌ ಡಾ| ಶಹೀದ್‌ ಜಮೀಲ್‌ ಅವರ ಪ್ರಕಾರ ದೇಶದಲ್ಲಿ ದಿನನಿತ್ಯ ಕೇಸುಗಳ ಸಂಖ್ಯೆ ಇಳಿಕೆಯಾಗುತ್ತಿದೆ. ಸೆಪ್ಟಂಬರ್‌ ಮಧ್ಯ ಭಾಗದಲ್ಲಿ ಪ್ರಕರಣಗಳ ಸಂಖ್ಯೆ ಉಚ್ಛಾಯದಲ್ಲಿದ್ದರೆ, ಈಗ ಇಳಿಕೆಯ ಹಾದಿಯಲ್ಲಿದೆ. ಸದ್ಯ ನಾವು ದಿನನಿತ್ಯ ಸುಮಾರು 25,500 ಸೋಂಕು ಪ್ರಕರಣಗಳನ್ನು ಕಾಣುತ್ತಿದ್ದೇವೆ. ಆದರೆ ಸೆಪ್ಟಂಬರ್‌ ಮಧ್ಯಭಾಗದಲ್ಲಿ ದಿನಕ್ಕೆ 93 ಸಾವಿರ ಪ್ರಕರಣಗಳು ದೃಢಪಡುತ್ತಿದ್ದವು ಎಂದಿದ್ದಾರೆ. ಅವರ ಪ್ರಕಾರ ಕೊರೊನಾ ಸೋಂಕಿನ ಅತ್ಯಂತ ಕೆಟ್ಟ ದಿನಗಳು ಕಳೆದಿವೆ.

1 ಕೋಟಿ ಸೋಂಕು
ದೇಶದಲ್ಲಿ ಕೊರೊನಾ ಪೀಡಿತರ ಸಂಖ್ಯೆ 1 ಕೋಟಿ ದಾಟಿದೆ. ಶುಕ್ರವಾರ ಬೆಳಗ್ಗೆಯಿಂದ ಶನಿವಾರ ಬೆಳಗ್ಗೆಯವರೆಗೆ ದೇಶದಲ್ಲಿ 25,152 ಪ್ರಕರಣಗಳು ದೃಢ ಪಟ್ಟಿವೆ. 347 ಮಂದಿ ಸಾವನ್ನಪ್ಪಿದ್ದಾರೆ. ಈ ಮೂಲಕ ಒಟ್ಟು ಸೋಂಕುಪೀಡಿತರ ಸಂಖ್ಯೆ 1,00,04,599ಕ್ಕೆ ಮುಟ್ಟಿತು. ಸಮಾಧಾನಕರ ವಿಷಯವೆಂದರೆ, ಕೊರೊನಾದಿಂದ ಚೇತರಿಸಿಕೊಂಡವರ ಸಂಖ್ಯೆ 95.50 ಲಕ್ಷ ದಾಟಿದೆ.