Parliament: ಆಡಳಿತಾರೂಢ, ವಿಪಕ್ಷ ಸಂಸದರಿಗೆ ಶೋಭೆಯಲ್ಲ…ಕೋಲಾಹಲಕ್ಕೆ ಸ್ಪೀಕರ್‌ ಆಕ್ರೋಶ

Team Udayavani, Dec 10, 2024, 3:23 PM IST

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ, ಗೌತಮ್‌ ಅದಾನಿ ಹಾಗೂ ಸೋನಿಯಾ ಗಾಂಧಿ, ಜಾರ್ಜ್‌ ಸೊರೊಸ್‌ ವಿಷಯಕ್ಕೆ ಸಂಬಂಧಿಸಿದಂತೆ ಆಡಳಿತಾರೂಢ ಬಿಜೆಪಿ ಮತ್ತು ವಿಪಕ್ಷ ಸಂಸದರ ನಡುವೆ ಮಾತಿನ ಚಕಮಕಿ, ತೀವ್ರ ಕೋಲಾಹಲ ನಡೆದ ಪರಿಣಾಮ ಮಂಗಳವಾರ(ಡಿ.09)ವೂ ಸಂಸತ್‌ ಕಲಾಪವನ್ನು ಸ್ಪೀಕರ್‌ ಮುಂಡೂಡುವಂತಾಗಿದೆ.

ಸ್ಪೀಕರ್‌ ಅಸಮಾಧಾನ, ಆಕ್ರೋಶ:

ಸಂಸತ್‌ ಕಲಾಪಕ್ಕೆ ಅಗೌರವ ತೋರಿದ ಸಂಸದರ ವಿರುದ್ಧ ತೀವ್ರ ಅಸಮಾಧಾನ ಹೊರಹಾಕಿರುವ ಸ್ಪೀಕರ್‌ ಓಂ ಬಿರ್ಲಾ ಅವರು, ನಮ್ಮದು ಜಗತ್ತಿನ ಅತೀ ದೊಡ್ಡ ಪ್ರಜಾಪ್ರಭುತ್ವ ದೇಶವಾಗಿದೆ. ನಾವು ಕೋಟ್ಯಂತರ ಜನರ ನಿರೀಕ್ಷೆ ಮತ್ತು ಆಶಯಗಳನ್ನು ಪೂರ್ಣಗೊಳಿಸಬೇಕಾದ ಹೊಣೆಗಾರಿಕೆ ಹೊಂದಿದ್ದೇವೆ. ಅದಕ್ಕಾಗಿ ಲೋಕಸಭೆಯ ಗೌರವವನ್ನು ಕಾಪಾಡಬೇಕು. ಆದರೆ ಇಲ್ಲಿ ನಡೆಯುತ್ತಿರುವ ಬೆಳವಣಿಗೆ ಒಳ್ಳೆಯದಲ್ಲ ಎಂದು ಹೇಳಿದರು.

ಇಲ್ಲಿ ಆಡಳಿತಾರೂಢ ಇರಲಿ ಅಥವಾ ವಿಪಕ್ಷ ಸದಸ್ಯರಿರಲಿ ಪ್ರತಿಯೊಬ್ಬರು ಗೌರವವನ್ನು ಕಾಪಾಡಬೇಕು. ನಾವೆಲ್ಲಾ ಒಗ್ಗಟ್ಟಾಗಿ ಕಾರ್ಯನಿರ್ವಹಿಸುವ ಮೂಲಕ ಈ ಪ್ರಜಾಪ್ರಭುತ್ವದ ದೇಗುಲದಿಂದ ಪಾಸಿಟಿವ್‌ ಸಂದೇಶ ಹೊರ ಹೋಗುವಂತಾಗಬೇಕು ಎಂದು ಸ್ಪೀಕರ್‌ ಬಿರ್ಲಾ ಸಂಸದರಿಗೆ ನೀತಿ ಸಂದೇಶ ರವಾನಿಸಿದ್ದರು.

ಒಂದು ವಿಚಾರವನ್ನು ಒಪ್ಪುವುದು, ಬಿಡುವುದು ಪ್ರಜಾಪ್ರಭುತ್ವದ ಆರೋಗ್ಯಕರ ಲಕ್ಷಣದ ಒಂದು ಭಾಗವಾಗಿದೆ. ಆಡಳಿತಾರೂಢ ಹಾಗೂ ವಿಪಕ್ಷ ಸಂಸದರು ಒಟ್ಟಾಗಿ ಕುಳಿತು ಭಿನ್ನಾಭಿಪ್ರಾಯಗಳನ್ನು ಸೌಹಾರ್ದಯುತವಾಗಿ ಬಗೆಹರಿಸಿಕೊಳ್ಳಬೇಕು ಎಂದು ಬಿರ್ಲಾ ಮನವಿ ಮಾಡಿಕೊಂಡರು.

ಈ ಸಂದರ್ಭದಲ್ಲಿ ವಿಪಕ್ಷ ಸಂಸದರು, ಸೊರೊಸ್‌ ಮತ್ತು ಸೋನಿಯಾ ಗಾಂಧಿ ವಿರುದ್ಧದ ಬಿಜೆಪಿ ಆರೋಪದ ಬಗ್ಗೆ ಚರ್ಚೆ ನಡೆಸಲು ಅನುಮತಿ ನೀಡುವಂತೆ ಒತ್ತಾಯಿಸಿದರು. ಆದರೆ ಸ್ಪೀಕರ್‌ ಬಿರ್ಲಾ ಅವರು ಪ್ರಶ್ನೋತ್ತರ ವೇಳೆ ಆರಂಭಿಸಲು ನಿರಾಕರಿಸಿದರು. ದಯವಿಟ್ಟು ಸುಗಮ ಕಲಾಪ ನಡೆಸಲು ಅವಕಾಶ ನೀಡಿ ಎಂದು ಸ್ಪೀಕರ್‌ ಮತ್ತೊಮ್ಮೆ ಮನವಿ ಮಾಡಿಕೊಂಡರು.

ರಾಜ್ಯಸಭೆಯಲ್ಲೂ ವಿಪಕ್ಷ ಸದಸ್ಯರು ಸೊರೊಸ್‌, ಸೋನಿಯಾ ಗಾಂಧಿ, ಅದಾನಿ ವಿಷಯ ಕುರಿತು ಚರ್ಚೆ ನಡೆಸಲು ಅವಕಾಶ ನೀಡುವಂತೆ ಪಟ್ಟು ಹಿಡಿದರು. ಆದರೆ ತೀವ್ರ ಕೋಲಾಹಲದಿಂದಾಗಿ ರಾಜ್ಯಸಭೆ ಕಲಾಪವನ್ನು ಬುಧವಾರಕ್ಕೆ ಮುಂದೂಡಲಾಯಿತು. ಅದೇ ರೀತಿ ಲೋಕಸಭೆಯ ಕಲಾಪವನ್ನು ಸ್ಪೀಕರ್‌ ಓಂ ಬಿರ್ಲಾ ಬುಧವಾರಕ್ಕೆ ಮುಂದೂಡಿದರು.