Meta: ಜುಕರ್‌ಬರ್ಗ್‌ನೊಂದಿಗೆ ಜಗಳ ಬೇಡ- ಮಸ್ಕ್‌ಗೆ ತಾಯಿ ಬುದ್ಧಿವಾದ

Team Udayavani, Jun 24, 2023, 7:08 AM IST

ವಾಷಿಂಗ್ಟನ್‌: ಟ್ವಿಟರ್‌ಗೆ ಪರ್ಯಾಯವಾಗಿ “ಥ್ರೆಡ್ಸ್‌” ಆರಂಭಿಸುವುದಾಗಿ ಮೆಟಾ ಸಂಸ್ಥಾಪಕ ಮಾರ್ಕ್‌ ಜುಕರ್‌ಬರ್ಗ್‌ ಘೋಷಣೆ ಮಾಡಿದಾಗಿನಿಂದ ಟ್ವಿಟರ್‌ ಮಾಲೀಕ ಎಲಾನ್‌ ಮಸ್ಕ್ ಮತ್ತು ಜುಕರ್‌ಬರ್ಗ್‌ ನಡುವೆ ಮಾತಿನ ಸಮರ ಆರಂಭವಾಗಿದೆ.

“ಅಖಾಡದಲ್ಲಿ ಜಂಗೀಕುಸ್ತಿಗೆ ಸಿದ್ಧವೇ?” ಎಂದು ಮಸ್ಕ್ ಸವಾಲೆಸೆದಿದ್ದಾರೆ. ಸವಾಲಿಗೆ ಸಿದ್ಧವಿದ್ದು, ಸ್ಥಳ ನಿಗದಿಪಡಿಸುವಂತೆ ಜುಕರ್‌ಬರ್ಗ್‌ ಪ್ರತಿಕ್ರಿಯಿಸಿದ್ದಾರೆ. “ಯುಎಫ್ಸಿ ಕುಸ್ತಿಗೆ ಪ್ರಸಿದ್ಧವಾಗಿರುವ ವೇಗಸ್‌ ಅಕ್ಟೋಗನ್‌ನಲ್ಲಿ ಕಾದಾಡೋಣ’ ಎಂದು ಮಸ್ಕ್ ಟ್ವೀಟ್‌ ಮಾಡಿದ್ದಾರೆ. ಈ ನಡುವೆ ಮಸ್ಕ್ ಅವರಿಗೆ ಅವರ ತಾಯಿ ಮೆಯೆ ಮಸ್ಕ್ ಬುದ್ಧಿವಾದ ಹೇಳಿದ್ದಾರೆ. “ಯಾವಾಗಲೂ ಸಮರ ಮಾತಿನಲ್ಲಿ ಇರಬೇಕು. ದೈಹಿಕವಾಗಿ ಅಲ್ಲ. ಇಬ್ಬರೂ ಪರಸ್ಪರ ನಾಲ್ಕು ಅಡಿ ದೂರ ಕೂತು ಚರ್ಚೆ ಮಾಡಿ, ತಮ್ಮ ವಾದವನ್ನು ಮಂಡಿಸಿ. ತಮಾಷೆಯ ವ್ಯಕ್ತಿ ವಾದದಲ್ಲಿ ಗೆಲುತ್ತಾನೆ’ ಎಂದು ಮೆಯೆ ಮಸ್ಕ್ ಹೇಳಿದ್ದಾರೆ.