ಬಜೆಟ್ ಕುರಿತು ಟೀಕೆ: ಡಿ.ಕೆ.ಸುರೇಶ್ ಗೆ ಡಾ.ಅಶ್ವತ್ಥ ನಾರಾಯಣ,ರೇಣುಕಾಚಾರ್ಯ ತಿರುಗೇಟು

Team Udayavani, Feb 2, 2022, 11:36 AM IST

ಬೆಂಗಳೂರು : ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಮಂಡಿಸಿದ ಕೇಂದ್ರ ಬಜೆಟ್ ನಲ್ಲಿ ಉಪ್ಪು ಹುಳಿ ಖಾರ ಇಲ್ಲ ಎಂದು ಹೇಳಿಕೆ ನೀಡಿದ್ದ ರಾಜ್ಯದ ಕಾಂಗ್ರೆಸ್ ಸಂಸದ ಡಿ.ಕೆ.ಸುರೇಶ್ ಅವರಿಗೆ ಬಿಜೆಪಿ ನಾಯಕರು ವ್ಯಂಗ್ಯವಾಗಿ ತಿರುಗೇಟು ನೀಡಿದ್ದಾರೆ.

ರೇಣುಕಾಚಾರ್ಯ ಅವರು ಟ್ವೀಟ್ ಮೂಲಕ , ರುಚಿ ಗೊತ್ತಾಗದಿರುವುದು ಕೋವಿಡ್ 19 ಲಕ್ಷಣಗಳಲ್ಲಿ ಒಂದಾಗಿರುವ ಕಾರಣ ಕೋವಿಡ್ ಪರೀಕ್ಷೆ ಮಾಡಿಸಿಕೊಳ್ಳುವುದು ಉತ್ತಮ.! ಎಂದು ಬರೆದಿದ್ದರು.

ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ರಾಮನಗರ ಜಿಲ್ಲಾ ಉಸ್ತುವಾರಿ ಸಚಿವ ಡಾ. ಅಶ್ವತ್ಥ ನಾರಾಯಣ, ಇರಲಿ ಬಿಡಿ ರೇಣುಕಾಚಾರ್ಯ ಅವರೇ, ಡಿಕೆ ಸಹೋದರರು #ಸೋಂಕಿನಜಾತ್ರೆ ಗುಂಗಿನಿಂದ ಹೊರಬಂದಂತೆ ಕಾಣುತ್ತಿಲ್ಲ.ಅದಲ್ಲದೇ, ಹೊಡಿ ಬಡಿ ದಾಂಡಿಗರ ನಾಲಿಗೆಗೆ ಸಿಹಿ ಸುದ್ದಿ ಹಿಡಿಸದು! ಕಸ್ತೂರಿಯ ಪರಿಮಳ, ಮಾಣಿಕ್ಯದ ಮೌಲ್ಯ, ಬಜೆಟ್‌ನ ದೂರದೃಷ್ಟಿ ಎಲ್ಲರಿಗೂ ತಿಳಿಯದು. ಮುಳುಗುತ್ತಿರುವ ಹಡಗಿಗೆ ಬೆಳಗುತ್ತಿರುವ ನವಭಾರತ ಕಾಣುತ್ತಿಲ್ಲ ಅಷ್ಟೇ! ಎಂದು ಬರೆದಿದ್ದಾರೆ.