ರಸಗೊಬ್ಬರ ಹಗರಣ; ಗೆಹ್ಲೋಟ್ ಸಹೋದರನ ಆಸ್ತಿ, ಪಾಸ್ತಿ ಮೇಲೆ ಇ.ಡಿ. ದಾಳಿ, ಪ್ರಕರಣ ದಾಖಲು

Team Udayavani, Jul 22, 2020, 3:01 PM IST

ಜೈಪುರ್: ರಾಸಾಯನಿಕ ಗೊಬ್ಬರ ಹಗರಣದ ಹಣ ದುರುಪಯೋಗ ಪ್ರಕರಣದಲ್ಲಿ ಜಾರಿ ನಿರ್ದೇಶನಾಲಯ ಬುಧವಾರ ರಾಜಸ್ಥಾನ ಮುಖ್ಯಮಂತ್ರಿ ಅಶೋಕ್ ಗೆಹ್ಲೋಟ್ ಸಹೋದರ ಅಗ್ರಸೇನ್ ಗೆಹ್ಲೋಟ್ ವಿರುದ್ಧ ಪ್ರಕರಣ ದಾಖಲಿಸಿರುವುದಾಗಿ ವರದಿ ತಿಳಿಸಿದೆ.

ಅಗ್ರಸೇನ್ ಗೆಹ್ಲೋಟ್ ಗೆ ನಾಲ್ಕು ರಾಜ್ಯಗಳಲ್ಲಿ ಇರುವ ಕಚೇರಿ ಮೇಲೆ ಜಾರಿ ನಿರ್ದೇಶನಾಲಯ ಏಕಕಾಲದಲ್ಲಿ ದಾಳಿ ನಡೆಸಿದ್ದರು. ಪ್ರಕರಣದ ಸಂಬಂಧ ಇ.ಡಿ.ಅಧಿಕಾರಿಗಳ ತಂಡ ದೆಹಲಿ, ಗುಜರಾತ್, ಪಶ್ಚಿಮಬಂಗಾಳ ಮತ್ತು ರಾಜಸ್ಥಾನ್ ಗಳಲ್ಲಿ ಇರುವ ಕಚೇರಿ ಮೇಲೆ ದಾಳಿ ನಡೆಸಿದ್ದರು.

ಮೂಲಗಳ ಪ್ರಕಾರ, ರಾಜಸ್ಥಾನದ ಆರು ಸ್ಥಳಗಳಲ್ಲಿ, ಗುಜರಾತ್ ನ ನಾಲ್ಕು, ಪಶ್ಚಿಮಬಂಗಾಳದ ಎರಡು ಹಾಗೂ ನವದೆಹಲಿ ಒಂದು ಪ್ರದೇಶದಲ್ಲಿ ಶೋಧ ಕಾರ್ಯ ನಡೆಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.ಏತನ್ಮಧ್ಯೆ ಮಾಜಿ ಸಂಸದ ಬದ್ರಿರಾಮ್ ಜಾಖಾರ್ ಅವರ ನಿವಾಸದ ಮೇಲೂ ಇ.ಡಿ.ಅಧಿಕಾರಿಗಳು ದಾಳಿ ನಡೆಸಿ ಶೋಧ ಕಾರ್ಯ ನಡೆಸಿದ್ದರು.

ಅಗ್ರಸೇನ್ ಗೆಹ್ಲೋಟ್ “ಅನುಪಮ್ ಕೃಷಿ” ಹೆಸರಿನ ಕಂಪನಿಯ ಮಾಲೀಕ. ರಫ್ತು ಕಾಯ್ದೆಯನ್ನು ಉಲ್ಲಂಘಿಸಿದ ಆರೋಪದಡಿಯಲ್ಲಿ ಕಸ್ಟಮ್ಸ್ ಇಲಾಖೆ ಏಳು ಕೋಟಿ ರೂಪಾಯಿ ದಂಡ ವಿಧಿಸಿತ್ತು ಎಂದು ವರದಿ ವಿವರಿಸಿದೆ.