ಮತ್ತೆ ಗೋವಾಕ್ಕೆ ಗೋಮಾಂಸ ಸಾಗಾಟ : ನಾಲ್ಕು ವಾಹನಗಳು ವಶಕ್ಕೆ

Team Udayavani, Jun 12, 2020, 11:37 AM IST

ಬೆಳಗಾವಿ:ಕಿತ್ತೂರು ಮಾರ್ಗವಾಗಿ ಗೋವಾಕ್ಕೆ ಗೋಮಾಂಸವನ್ನು ಸಾಗಿಸುತ್ತಿದ್ದ ನಾಲ್ಕು ವಾಹನಗಳನ್ನು ವಿಶ್ವ ಹಿಂದೂ ಪರಿಷದ್ ಬಜರಂಗ ದಳ ಕಾರ್ಯಕರ್ತರು ಹಿರೇಬಾಗೇವಾಡಿ ಟೋಲ್ ನಾಕಾ ಬಳಿ ತಡೆದು ಪೊಲೀಸರಿಗೆ ಒಪ್ಪಿಸಿದ್ದಾರೆ.

ಗುರುವಾರ ರಾತ್ರಿ 12 ಗಂಟೆ ಸುಮಾರಿಗೆ ವಂಟಮೂರಿಯಿಂದ ಗೋಮಾಂಸವನ್ನು ತುಂಬಿಕೊಂಡು ಗೋವಾಕ್ಕೆ ವಾಹನಗಳು ಹೊರಟಿದ್ದವು. ಈ ಬಗ್ಗೆ ಖಚಿತ ಮಾಹಿತಿ ಪಡೆದ ಕಾರ್ಯಕರ್ತರು ಟೋಲ್ ಬಳಿ ನಾಲ್ಕೂ ವಾಹನಗಳನ್ನು ತಡೆದು ವಿಚಾರಣೆ ನಡೆಸಿದಾಗ ಗೋ ಮಾಂಸ ಇರುವುದು ಗೊತ್ತಾಗಿದೆ.‌ ಕೂಡಲೇ ನಾಲ್ಕೂ ವಾಹನಗಳನ್ನು ಪೊಲೀಸರ ವಶಕ್ಕೆ ಒಪ್ಪಿಸಿದ್ದಾರೆ.

ಗೋವಾಕ್ಕೆ ಹೋಗುವ ಚೋರ್ಲಾ ಘಾಟ್ ಮಾರ್ಗದಲ್ಲಿ ರಾತ್ರಿ ಹೊತ್ತಿನಲ್ಲಿ ವಾಹನಗಳ ಸಂಚಾರ ಕಡಿಮೆ‌ ಇರುತ್ತದೆ. ಚೆಕ್ ಪೋಸ್ಟ್ ಗಳಲ್ಲಿ ಸುಳ್ಳು ಹೇಳಿ ದಾಟುತ್ತಿದ್ದ ವಾಹನಗಳ ಬಗ್ಗೆ ಮಾಹಿತಿ ಪಡೆದುಕೊಂಡಿದ್ದಾರೆ. ಗೋವಾದಲ್ಲಿ ಗೋಮಾಂಸಕ್ಕೆ ಹೆಚ್ಚಿನ ಬೇಡಿಕೆ ಇರುವುದರಿಂದ ಬೆಳಗಾವಿಯಿಂದ ಸಾಗಾಟ ಆಗುತ್ತಿದೆ ಎನ್ನಲಾಗಿದೆ.

ಕಳೆದ ಕೆಲವು ದಿನಗಳಿಂದ ಬೆಳಗಾವಿಯಲ್ಲಿ ಅಕ್ರಮವಾಗಿ ಗೋಮಾಂಸ ಸಾಗಾಟ ಮಾಡುತಿದ್ದ ಅನೇಕ ವಾಹನಗಳನ್ನು ತಡೆಯಲಾಗಿದೆ. ಟಿಳಕವಾಡಿಯ ಬಿಗ್ ಬಜಾರ್, ನಗರದ ಚನ್ನಮ್ಮ ವೃತ್ತದಲ್ಲಿ ವಾಹನಗಳು ಸಿಕ್ಕಿವೆ. ತಾಲೂಕಿನ ಕರ್ಲೆ ಬಳಿ ಅಪರಿಚಿತ ವಾಹನಕ್ಕೆ ಬೆಂಕಿ ಹಚ್ವಿ ಆಕ್ರೋಶ ವ್ಯಕ್ತಪಡಿಸಲಾಗಿತ್ತು.