ಮುಳುಗುವ ಹಡಗು ಎಂದವರಿಗೆ ಹಾನಗಲ್ ಗೆಲುವು ಉತ್ತರ : ಡಿ.ಕೆ.ಶಿವಕುಮಾರ್

Team Udayavani, Nov 3, 2021, 4:01 PM IST

ಬೆಂಗಳೂರು : ‘ಕಾಂಗ್ರೆಸ್ ಪಕ್ಷ ಮುಳುಗುವ ಹಡಗು ಎಂದು ಬಣ್ಣಿಸಿದವರಿಗೆ ಹಾನಗಲ್ ಚುನಾವಣಾ ಫಲಿತಾಂಶ ಉತ್ತರ ನೀಡಿದೆ’ ಎಂದು ಬುಧವಾರ ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್ ಹೇಳಿದ್ದಾರೆ.

ಕೆಪಿಸಿಸಿ ಕಚೇರಿಯಲ್ಲಿ ಪತ್ರಿಕಾಗೋಷ್ಠಿ ನಡೆಸಿ ಮಾತನಾಡಿದ ಡಿ.ಕೆ.ಶಿವಕುಮಾರ್ ಅವರು, ‘ಉಪ ಚುನಾವಣೆ ಫಲಿತಾಂಶ ಕಾಂಗ್ರೆಸ್ ಮೂರು ಗುಂಪು,ಒಡೆದ ಮನೆ, ಮುಳುಗುವ ಹಡಗು ಎಂದೆಲ್ಲಾ ಬಣ್ಣಿಸಿದ್ದವರಿಗೆ ಸೂಕ್ತ ಉತ್ತರ ನೀಡಿದೆ’ ಎಂದರು.

‘ಹಾನಗಲ್ ಗೆಲುವು ಮಾತ್ರವಲ್ಲದೆ ಸಿಂದಗಿ ಯಲ್ಲಿ ನಮ್ಮ ಪಕ್ಷದ 40 ಸಾವಿರ ಮತ ಗಳಿಕೆ ಹೆಚ್ಚಾಗಿದೆ. ಇದರಿಂದ ಪಕ್ಷಕ್ಕೆ ಶಕ್ತಿ ಬಂದಿದೆ’ ಎಂದರು.

‘ಹಾನಗಲ್ ನಲ್ಲಿ ಮುಖ್ಯಮಂತ್ರಿ ಯವರು ಅಳಿಯ ಎಂದು ಇಡೀ ಸರಕಾರ ಕೊಂಡೊಯ್ದು ಕುಳಿಸಿ ಒತ್ತಡ ಆಮಿಷ ಒಡ್ಡಿದರು. ಆದರೆ ಅಲ್ಲಿನ ಜನ ಕಾಂಗ್ರೆಸ್ ಕೈ ಹಿಡಿದು ದೇಶಕ್ಕೆ ಸಂದೇಶ ರವಾನಿಸಿದ್ದಾರೆ’ ಎಂದರು.

‘ಜನರ ಜತೆ ಸ್ಪಂದನೆ ಮಾಡುವವರಿಗೆ ಮತದಾರ ಒಪ್ಪಿಕೊಳ್ಳುತ್ತಾರೆ ಎಂಬುದಕ್ಕೆ ಹಾನಗಲ್ ಫಲಿತಾಂಶ ಸಾಕ್ಷಿ’ ಎಂದರು.