ಶ್ರೀಲಂಕಾಗೆ ಐಎಂಎಫ್ 3 ಬಿಲಿಯನ್‌ ಡಾಲರ್‌ ನೆರವು

Team Udayavani, Mar 22, 2023, 9:22 AM IST

ವಾಷಿಂಗ್ಟನ್‌/ಕೊಲೊಂಬೊ: ಆರ್ಥಿಕ ಸಂಕಷ್ಟಕ್ಕೆ ತುತ್ತಾಗಿರುವ ಶ್ರೀಲಂಕಕ್ಕೆ ಐಎಂಎಫ್‌ನಿಂ ದ 3 ಬಿಲಿಯನ್‌ ಅಮೆರಿಕನ್‌ ಡಾಲರ್‌ ಆರ್ಥಿಕ ನೆರವು ಪ್ರಕಟಿಸಲಾಗಿದೆ. ಈ ಬಗ್ಗೆ ಸೋಮವಾರ ನಡೆದ ಸಭೆಯಲ್ಲಿ ತೀರ್ಮಾನಿಸಲಾಗಿದೆ.

ಈ ನಿರ್ಧಾರವನ್ನು ದ್ವೀಪರಾಷ್ಟ್ರದ ಸರ್ಕಾರ ಸ್ವಾಗತಿಸಿದ್ದು, “ಇದೊಂದು ಐತಿಹಾಸಿಕ ಘಟ್ಟ” ಎಂದು ಹೇಳಿದೆ. ವಿಸ್ತೃತ ನಿಧಿ ಸೌಲಭ್ಯದಡಿ ಮುಂದಿನ 48 ತಿಂಗಳಲ್ಲಿ 3 ಬಿಲಿಯನ್‌ ಡಾಲರ್‌ ಆರ್ಥಿಕ ನೆರವು ನೀಡುವ ಮೂಲಕ ಆ ದೇಶದ ವಿದೇಶಿ ಮೀಸಲು ವಿನಿಮಯ ನಿಧಿಯನ್ನು ಪುನಸ್ಥಾಪಿಸಲೂ ಅನುಕೂಲವಾಗಲಿದೆ.

2022ರ ಜುಲೈನಿಂದ ಶ್ರೀಲಂಕಾ ತೀವ್ರ ಆಹಾರ ಸಂಕಷ್ಟ ಎದುರಿಸುತ್ತಿದೆ. ಸಂಕಷ್ಟದ ವಿರುದ್ಧ ಜನರು ಬೀದಿಗೆ ಇಳಿದು ಬಹಳ ಕಾಲದಿಂದ ಆಡಳಿತ ನಡೆಸುತ್ತಿದ್ದ ರಾಜಪಕ್ಸ ಕುಟುಂಬ ಸದಸ್ಯರ ವಿರುದ್ಧ ಹಿಂಸಾತ್ಮಕ ಪ್ರತಿಭಟನೆ ನಡೆಸಿದ್ದರು.